ವಾಂಖೆಡೆಯಲ್ಲಿ ರೋಹಿತ್‌ Vs ರಹಾನೆ

ಮುಂಬಯಿ: ಐಪಿಎಲ್‌-11ರ ದ್ವಿತೀಯಾರ್ಧದಲ್ಲಿ ಪುಟಿದೆದ್ದು ನಿಂತು ಪ್ಲೇ ಆಫ್‌ ರೇಸ್‌ನಲ್ಲಿರುವ ಮುಂಬಯಿ ಇಂಡಿಯನ್ಸ್‌ ಮತ್ತು ರಾಜಸ್ಥಾನ್‌ ರಾಯಲ್ಸ್‌ ತಂಡಗಳು, ಭಾನುವಾರದ 2ನೇ ಪಂದ್ಯದಲ್ಲಿ ಮುಖಾಮುಖಿಯಾಗಲಿವೆ.

ವಾಂಖೆಡೆ ಕ್ರೀಡಾಂಗಣದಲ್ಲಿ ನಡೆಯಲಿರುವ ಈ ಪಂದ್ಯ ಉಭಯ ತಂಡಗಳಿಗೆ ನಿರ್ಣಾಯಕ. ಸೋತ ತಂಡದ ಪ್ಲೇ ಆಫ್‌ ಕನಸು ಬಹುತೇಕ ಅಂತ್ಯಗೊಳ್ಳಲಿದ್ದರೆ, ಗೆದ್ದ ತಂಡದ ಕನಸಿಗೆ ಮತ್ತಷ್ಟು ಬಲ ಬರಲಿದೆ. ಹ್ಯಾಟ್ರಿಕ್‌ ಗೆಲುವಿನೊಂದಿಗೆ ಆತ್ಮವಿಶ್ವಾಸ ಹೆಚ್ಚಿಸಿಕೊಂಡಿರುವ ಹಾಲಿ ಚಾಂಪಿಯನ್‌ ಮುಂಬಯಿ ಇಂಡಿಯನ್ಸ್‌ ತಂಡ, ಈ ಹಿಂದಿನ ಆವೃತ್ತಿಗಳಲ್ಲಿ ಸತತ ಸೋಲುಗಳಿಂದ ಕಂಗೆಟ್ಟರೂ ಕೊನೆಯಲ್ಲೇ ಪ್ಲೇ ಆಫ್‌ ಹಂತಕ್ಕೇರಿ ನಂತರ ಚಾಂಪಿಯನ್‌ ಪಟ್ಟಕ್ಕೇರಿದ ಇತಿಹಾಸ ಹೊಂದಿದೆ. ಈ ಸಾಲಿನಲ್ಲೂ ರೋಹಿತ್‌ ಶರ್ಮಾ ಪಡೆ ಅದೇ ಹಾದಿಯಲ್ಲಿ ಮುನ್ನಡೆಯುತ್ತಿದೆ.

ಅಜಿಂಕ್ಯ ರಹಾನೆ ನಾಯಕತ್ವದ ರಾಜಸ್ಥಾನ್‌ ರಾಯಲ್ಸ್‌ ಕತೆಯೂ ಮುಂಬಯಿಗಿಂತ ಭಿನ್ನವೇನಲ್ಲ. ಮುಂಬಯಿನಷ್ಟೇ ಪಂದ್ಯಗಳನ್ನು(5) ಗೆದ್ದಿರುವ ರಾಯಲ್ಸ್‌, ಕಳೆದೆರಡು ಪಂದ್ಯಗಳಲ್ಲಿ ಬಲಿಷ್ಠ ತಂಡಗಳಾದ ಕಿಂಗ್ಸ್‌ ಇಲೆವೆನ್‌ ಪಂಜಾಬ್‌ ಮತ್ತು ಚೆನ್ನೈ ಸೂಪರ್‌ ಕಿಂಗ್ಸ್‌ಗೆ ಶಾಕ್‌ ನೀಡಿದ್ದು, ಇದೀಗ ಹ್ಯಾಟ್ರಿಕ್‌ ಗೆಲುವನ್ನು ಎದುರು ನೋಡುತ್ತಿದೆ. ಜೈಪುರದಲ್ಲಿ ನಡೆದ ಉಭಯ ತಂಡಗಳ ಈ ಹಿಂದಿನ ಮುಖಾಮುಖಿಯಲ್ಲಿ ರಾಯಲ್ಸ್‌ ಬಳಗ 3 ವಿಕೆಟ್‌ಗಳ ಗೆಲುವು ಸಾಧಿಸಿತ್ತು.