ಯುವಿ ಸೇರಿದಂತೆ ಹೊಸ ಮುಖಗಳಿಗೆ ಮುಂಬೈ ಗ್ರ್ಯಾಂಡ್ ವೆಲ್ಕಮ್

ಮುಂಬಯಿ: ಇಂಡಿಯನ್ ಪ್ರೀಮಿಯರ್ ಲೀಗ್ ಟ್ವೆಂಟಿ-20 ಕ್ರಿಕೆಟ್ ಚಾಂಪಿಯನ್‌ಶಿಪ್‌ನಲ್ಲಿ ತನ್ನ ಫ್ರಾಂಚೈಸಿ ಸೇರಿರುವ ಹಿರಿಯ ಅನುಭವಿ ಆಟಗಾರ ಯುವರಾಜ್ ಸಿಂಗ್ ಸೇರಿದಂತೆ ಹೊಸ ಮುಖಗಳಿಗೆ ಮುಂಬೈ ಇಂಡಿಯನ್ಸ್ ಭರ್ಜರಿ ಸ್ವಾಗತವನ್ನು ಕೋರಿದೆ.

ಮುಂಬೈ ಇಂಡಿಯನ್ಸ್ ಫ್ರಾಂಚೈಸಿ ಮಾಲಕಿ ನೀತಾ ಅಂಬಾನಿ ಅವರು ಮುಂಬೈ ಕ್ಯಾಂಪ್‌ಗೆ ಹೊಸ ಆಟಗಾರರನ್ನು ಸ್ವಾಗತ ಮಾಡಿದರು. ಅಲ್ಲದೆ ಒಂದೇ ಕುಟುಂಬ ಎಂಬುದನ್ನು ಸಾರಿದರು.

ಐಪಿಎಲ್ 12ನೇ ಆವೃತ್ತಿಗಾಗಿ ನಡೆದ ಹರಾಜಿನಲ್ಲಿ ಯುವರಾಜ್ ಸಿಂಗ್‌ರನ್ನು ಮುಂಬೈ ಇಂಡಿಯನ್ಸ್ ಖರೀದಿಸಿತ್ತು. ಯುವಿ ಜತೆಗೆ ಪಂಜಾಬ್‌ನ ಅಮೋಲ್‌ಪ್ರೀತ್ ಸಿಂಗ್ ಹಾಗೂ ಬರಿಂದರ್ ಸ್ರಾನ್ ಹೊಸ ಸೇರ್ಪಡೆಯಾಗಿದ್ದಾರೆ. ಅತ್ತ ಶ್ರೀಲಂಕಾದ ವೇಗಿ ಲಸಿತ್ ಮಾಲಿಂಗ ಸಹ ಆಟಗಾರನಾಗಿ ತಂಡಕ್ಕೆ ಮರಳಿದ್ದಾರೆ.

ಐಪಿಎಲ್ 2019 ಆವೃತ್ತಿಯು ಮಾರ್ಚ್ 23ರಂದು ಆರಂಭವಾಗಲಿದೆ. ಮಾರ್ಚ್ 24ರಂದು ರೋಹಿತ್ ಶರ್ಮಾ ಬಳಗದ ಮುಂಬೈ ತನ್ನ ಮೊದಲ ಹೋರಾಟದಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ಸವಾಲನ್ನು ಎದುರಿಸಲಿದೆ.

ರೋಹಿತ್ ನಾಯಕತ್ವದಲ್ಲೇ ಮುಂಬೈ ಮೂರು ಬಾರಿ 2013, 2015 ಹಾಗೂ 2017ನೇ ಸಾಲುಗಳಲ್ಲಿ ಐಪಿಎಲ್ ಕಿರೀಟಗಳನ್ನು ಎತ್ತಿ ಹಿಡಿದಿತ್ತು.