ರೈನಾ ಧೋನಿ ಉತ್ತರಾಧಿಕಾರಿ?

ಚೆನ್ನೈ: ಮಹೇಂದ್ರ ಸಿಂಗ್ ಧೋನಿ ಬಳಿಕ ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ನಾಯಕತ್ವವನ್ನು ಯಾರು ವಹಿಸಲಿದ್ದಾರೆ ಎಂಬುದಕ್ಕೆ ಸ್ವತ: ಸುರೇಶ್ ರೈನಾ ಅವರಿಂದಲೇ ಉತ್ತರ ದೊರಕಿದೆ.

ಇಂಡಿಯನ್ ಪ್ರೀಮಿಯರ್ ಲೀಗ್‌ನಲ್ಲಿ ಅತಿ ಹೆಚ್ಚು ಯಶಸ್ಸನ್ನು ಸಾಧಿಸಿರುವ ಚೆನ್ನೈ ಸೂಪರ್ ಕಿಂಗ್ಸ್, ಮಹೇಂದ್ರ ಸಿಂಗ್ ಧೋನಿ ನಾಯಕತ್ವದಲ್ಲಿ ಮೂರು ಬಾರಿ ಚಾಂಪಿಯನ್ ಪಟ್ಟ ಆಲಂಕರಿಸಿದೆ.

ಅಲ್ಲದೆ ಸಿಎಸ್‌ಕೆ ಅಭಿಮಾನಿಗಳು ಧೋನಿ ಹಾಗೂ ರೈನಾ ಅವರನ್ನು ತಲ ಹಾಗೂ ಚಿನ್ನ ತಲ ಎಂಬ ಅಕ್ಕರೆಯ ಹೆಸರಿನಿಂದ ಮನಸಾರೆ ಸ್ವೀಕರಿಸಿದ್ದಾರೆ.

ಇದೀಗ ಮುಂಬರುವ ಏಕದಿನ ವಿಶ್ವಕಪ್ ಬಳಿಕ 37ರ ಹರೆಯದ ಮಹೇಂದ್ರ ಸಿಂಗ್ ಧೋನಿ ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ನಿವೃತ್ತಿ ಘೋಷಿಸುವ ಸಾಧ್ಯತೆಯಿದೆ. ಹಾಗಾಗಿ ಮುಂದಿನ ವರ್ಷ ಐಪಿಎಲ್‌ನಲ್ಲಿ ಆಡುವರೇ ಎಂಬುದು ತಿಳಿದು ಬಂದಿಲ್ಲ.

ಕಳೆದೆರಡು ವರ್ಷಗಳಲ್ಲಿ ನಾಯಕ ಹಾಗೂ ಮೆಂಟರ್ ರೂಪದಲ್ಲಿ ಧೋನಿ ಅಮೂಲ್ಯ ಕೊಡುಗೆಯನ್ನು ಸಲ್ಲಿಸಿದ್ದಾರೆ. ಬಹುಶ: ಮುಂದಿನ ವರ್ಷ ಅವರ ಬಳಿಕ ನನ್ನನ್ನು ಹೆಚ್ಚೆಚ್ಚು ಕಾಣಬಹುದು. ಆದರೆ ಅವರಷ್ಟೇ ಯೋಗ್ಯತೆ ಅಗತ್ಯವಿದೆ ಎಂದು ರೈನಾ ತಿಳಿಸಿದರು.

ಅದೇ ಹೊತ್ತಿಗೆ ಧೋನಿ ಬಯಸುವ ವರೆಗೂ ಚೆನ್ನೈ ತಂಡದಲ್ಲೇ ಮುಂದುವರಿಯಲಿದ್ದಾರೆ ಎಂಬುದನ್ನು ರೈನಾ ಸ್ಪಷ್ಟಪಡಿಸಿದರು.

ಪ್ರಸಕ್ತ ಸಾಲಿನ ಐಪಿಎಲ್‌ನಲ್ಲೂ ಧೋನಿ ಗಾಯದ ಸಮಸ್ಯೆಗೊಳಗಾದಾಗ ರೈನಾ ತಂಡವನ್ನು ಮುನ್ನೆಡಿಸಿದ್ದಾರೆ. ಒಟ್ಟಿನಲ್ಲಿ ರೈನಾ ಹೇಳಿಕೆಗಳು ಹಲವಾರು ಗೊಂದಲಗಳಿಗೆ ಕಾರಣವಾಗಿದೆ. ಇವೆಲ್ಲಕ್ಕೂ ಮುಂದಿನ ದಿನಗಳಲ್ಲಿ ಸ್ಪಷ್ಟ ಉತ್ತರ ಸಿಗಲಿದೆ.