ಆರ್‌ಸಿಬಿ-ಸಿಎಸ್‌ಕೆ ಪಂದ್ಯದಲ್ಲಿ ಸಿಡಿದಿದ್ದು ದಾಖಲೆಯ 33 ಸಿಕ್ಸರ್!

ಬೆಂಗಳೂರು: ಇಂಡಿಯನ್ ಪ್ರೀಮಿಯರ್ ಲೀಗ್ ಟ್ವೆಂಟಿ-20 ಕ್ರಿಕೆಚ್ ಚಾಂಪಿಯನ್‌ಶಿಪ್‌ನಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಹಾಗೂ ಚೆನ್ನೈ ಸೂಪರ್ ಕಿಂಗ್ಸ್ ನಡುವಣ ಹೈ ವೋಲ್ಟೇಜ್ ಪಂದ್ಯದಲ್ಲಿ ಭರ್ಜರಿ 33 ಸಿಕ್ಸರ್‌ಗಳು ಸಿಡಿದಿದ್ದವು.

ಸದರ್ನ್ ಡರ್ಬಿ ನಡುವಣ ಜಿದ್ದಾಜಿದ್ದಿನ ಹಣಾಹಣಿ ಅಭಿಮಾನಿಗಳಲ್ಲೂ ಅತಿ ಹೆಚ್ಚಿನ ರೋಚಕತೆಯನ್ನು ಸೃಷ್ಟಿಮಾಡಿತ್ತು. ಇದಕ್ಕೆ ತಕ್ಕಂತೆ ಇತ್ತಂಡಗಳ ಬ್ಯಾಟ್ಸ್‌ಮನ್‌ಗಳು ಸಿಕ್ಸರ್‌ಗಳ ಸುರಿಮಳೆಗೈದಿದ್ದರು.

ಮೊದಲು ಬ್ಯಾಟಿಂಗ್ ನಡೆಸಿದ ಆರ್‌ಸಿಬಿ ಎಬಿಡಿ ವಿಲಿಯರ್ಸ್ ಹಾಗೂ ಕ್ವಿಂಟನ್ ಡಿ ಕಾಕ್ ಸ್ಫೋಟಕ ಅರ್ಧಶತಕದ ನೆರವಿನಿಂದ ನಿಗದಿತ 20 ಓವರ್‌ಗಳಲ್ಲಿ ಎಂಟು ವಿಕೆಟ್ ನಷ್ಟಕ್ಕೆ 205 ರನ್‌ಗಳ ಸವಾಲಿನ ಮೊತ್ತ ಪೇರಿಸಿತ್ತು.

ವಿಲಿಯರ್ಸ್ 8 ಸಿಕ್ಸರ್‌ಗಳನ್ನು ಸಿಡಿಸಿದ್ದರೆ ಡಿ ಕಾಕ್ ನಾಲ್ಕು ಬಾರಿ ಚೆಂಡನ್ನು ಬೌಂಡರಿ ಗೆರೆಯಿಂದ ಹೊರಗಟ್ಟಿದ್ದರು. ಹಾಗೆಯೇ ಮನ್‌ದೀಪ್ ಸಿಂಗ್ ಮೂರು ಹಾಗೂ ವಾಷಿಂಗ್ಟನ್ ಸುಂದರ್ ಒಂದು ಬಾರಿ ಸಿಕ್ಸರ್ ಬಾರಿಸಿದ್ದರು.

ಈ ಪೈಕಿ ಚೆಂಡನ್ನು ಸ್ಟೇಡಿಯಂನಿಂದ ಹೊರಗಟ್ಟಿದ ವಿಲಿಯರ್ಸ್ 2018ನೇ ಸಾಲಿನ ಅತಿ ದೊಡ್ಡ ಸಿಕ್ಸ್ ಬಾರಿಸಿದ್ದರು. ವಿಲಿಯರ್ಸ್ ಬಾರಿಸಿದ ಚೆಂಡು 111 ಮೀಟರ್ ದೂರಕ್ಕೆ ಸ್ಟೇಡಿಯಂ ಹೊರಗಡೆಗೆ ತೇಲಿತ್ತು.

ಬಳಿಕ ರನ್ ಬೆನ್ನತ್ತಿದ ಸಿಎಸ್‌ಕೆ ಅಂಬಟಿ ರಾಯುಡು ಹಾಗೂ ನಾಯಕ ಮಹೇಂದ್ರ ಸಿಂಗ್ ಧೋನಿ ಅಮೋಘ ಬ್ಯಾಟಿಂಗ್ ನೆರವಿನಿಂದ ಇನ್ನು ಎರಡು ಎಸೆತಗಳು ಬಾಕಿ ಉಳಿದಿರುವಂತೆಯೇ ಐದು ವಿಕೆಟ್ ನಷ್ಟಕ್ಕೆ ಗುರಿ ತಲುಪಿತ್ತು.

ರಾಯುಡು ಇನ್ನಿಂಗ್ಸ್‌ನಲ್ಲಿ 8 ಹಾಗೂ ನಾಯಕ ಧೋನಿ 7 ಸಿಕ್ಸರ್‌ಗಳು ಸೇರಿದ್ದವು. ಅಷ್ಟೇ ಯಾಕೆ ಕೊನೆಗೆ ಬಂದ ಡ್ವೇನ್ ಬ್ರಾವೋ ಸಹ ಸಿಕ್ಸರ್‌ವೊಂದನ್ನು ಬಾರಿಸಿದ್ದರು.

ಒಟ್ಟಾರೆಯಾಗಿ ಐಪಿಎಲ್ ಪಂದ್ಯವೊಂದರಲ್ಲಿ ಅತಿ ಹೆಚ್ಚು 33 ಸಿಕ್ಸರ್ ಸಿಡಿಸಿರುವ ದಾಖಲೆಗೆ ಆರ್‌ಸಿಬಿ-ಸಿಎಸ್‌ಕೆ ಪಂದ್ಯ ಪಾತ್ರವಾಗಿದೆ. ಈ ಹಿಂದೆ ಚೆನ್ನೈ-ಕೆೋಲ್ಕೊತಾ ನಡುವಣ ಪಂದ್ಯದಲ್ಲಿ 31 ಸಿಕ್ಸರ್‌ಗಳು ಸಿಡಿದಿದ್ದವು.