ಕೊನೆಯ 5 ಓವರ್‌ನಲ್ಲಿ 91 ರನ್ ಚಚ್ಚಿದ ಆರ್‌ಸಿಬಿ..!

ಕೋಲ್ಕತಾ: ಇಂಡಿಯನ್ ಪ್ರೀಮಿಯರ್ ಲೀಗ್ 2019ನೇ ಸಾಲಿನ ಟ್ವೆಂಟಿ-20 ಕ್ರಿಕೆಟ್ ಚಾಂಪಿಯನ್‌ಶಿಪ್‌ನಲ್ಲಿ ಸತತ ಸೋಲುಗಳೊಂದಿಗೆ ಅಂಕಪಟ್ಟಿಯಲ್ಲಿ ಕೊನೆಯ ಸ್ಥಾನದಲ್ಲಿರುವ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡವು ಕೊನೆಗೂ ತನ್ನ ಪ್ರತಿಭೆಗೆ ತಕ್ಕ ಪ್ರದರ್ಶನವನ್ನು ನೀಡಿದೆ.

ಕೋಲ್ಕತಾ ನೈಟ್ ರೈಡರ್ಸ್ ವಿರುದ್ಧ ಟಾಸ್ ಸೋತು ಬ್ಯಾಟಿಂಗ್‌ಗಿಳಿಸಲ್ಪಟ್ಟರೂ ನಾಯಕ ವಿರಾಟ್ ಕೊಹ್ಲಿ 5ನೇ ಐಪಿಎಲ್ ಶತಕ ಹಾಗೂ ಮೊಯಿನ್ ಅಲಿ ಬಿರುಸಿನ ಅರ್ಧಶತಕದ (66) ನೆರವಿನಿಂದ ನಾಲ್ಕು ವಿಕೆಟ್ ನಷ್ಟಕ್ಕೆ 213 ರನ್‌ಗಳ ಬೃಹತ್ ಮೊತ್ತ ಪೇರಿಸಿದೆ.

15 ಓವರ್‌ಗಳ ವೇಳೆಗೆ ಆರ್‌ಸಿಬಿ ಸ್ಕೋರ್ 122/2 ಆಗಿತ್ತು. ಈ ಹಂತದಲ್ಲಿ ಗೇರ್ ಬದಲಾಯಿಸಿದ ಮೊಲಿನ್ ಅಲಿ ಹಾಗೂ ನಾಯಕ ವಿರಾಟ್ ಕೊಹ್ಲಿ ಸಿಡಿಲಬ್ಬರದ ಬ್ಯಾಟಿಂಗ್ ಪ್ರದರ್ಶಿಸಿದರು.

24 ಎಸೆತಗಳಲ್ಲೇ ಅರ್ಧಶತಕ ಸಿಡಿಸಿದ ಮೊಯಿನ್, ಕುಲ್‌ದೀಪ್ ಯಾದವ್ ಓವರ್‌ವೊಂದರಲ್ಲಿ ಮೂರು ಸಿಕ್ಸರ್ ಹಾಗೂ ಎರಡು ಬೌಂಡರಿ ಸೇರಿದಂತೆ 27 ರನ್ ಕಸಿದುಕೊಂಡರು.

ಅತ್ತ ಮೊದಲ ಅರ್ಧಶತಕಕ್ಕಾಗಿ 40 ಎಸೆತಗಳನ್ನು ಎದುರಿಸಿರುವ ಕಿಂಗ್ ಕೊಹ್ಲಿ ಕೇವಲ 17 ಎಸೆತಗಳಲ್ಲಿ ಎರಡನೇ ಅರ್ಧಶತಕ ಬಾರಿಸಿದ್ದರು. ಈ ಮೂಲಕ ಅಂತಿಮ ಐದು ಓವರ್‌ಗಳಲ್ಲಿ 91 ರನ್ ಕಸಿದುಕೊಂಡಿದ್ದರು.

ಕೊನೆಯ ಐದು ಓವರ್ ಇಂತಿತ್ತು:
16ನೇ ಓವರ್: 27 ರನ್
17ನೇ ಓವರ್: 19 ರನ್
18ನೇ ಓವರ್: 10 ರನ್
19ನೇ ಓವರ್: 19 ರನ್
20ನೇ ಓವರ್: 16 ರನ್