ಐಪಿಎಲ್‌ನಲ್ಲಿ 100 ವಿಕೆಟ್ ಕಬಳಿಸಿದ ಚಹಲ್

ಬೆಂಗಳೂರು: ಇಂಡಿಯನ್ ಪ್ರೀಮಿಯರ್ ಲೀಗ್ 12ನೇ ಆವೃತ್ತಿಯ ಟ್ವೆಂಟಿ-20 ಕ್ರಿಕೆಟ್ ಚಾಂಪಿಯನ್‌ಶಿಪ್‌ನಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡವು ಪ್ಲೇ-ಆಫ್ ಪ್ರವೇಶಿಸಲು ಯಶಸ್ವಿಯಾಗದೇ ಇರಬಹುದು.

ಆದರೆ ಆರ್‌ಸಿಬಿ ತಂಡದ ಪ್ರಮುಖ ಲೆಗ್ ಸ್ಪಿನ್ ಅಸ್ತ್ರವಾಗಿರುವ ಯುಜ್ವೇಂದ್ರ ಚಹಲ್, ಐಪಿಎಲ್‌ನಲ್ಲಿ 100 ವಿಕೆಟ್‌ಗಳ ದಾಖಲೆ ಬರೆದಿದ್ದಾರೆ.

ಮನೆಯಂಗಣ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಸರ್‌ರೈಸರ್ಸ್ ಹೈದರಾಬಾದ್ ವಿರುದ್ಧ ನಡೆಯುತ್ತಿರುವ ಕೊನೆಯ ಲೀಗ್ ಪಂದ್ಯದಲ್ಲಿ ಚಹಲ್ ನೂತನ ದಾಖಲೆ ಬರೆದರು.

ಯೂಸುಫ್ ಪಠಾಣ್ ಚಹಲ್ ಅವರ 100ನೇ ಐಪಿಎಲ್‌ ವಿಕೆಟ್‌ಗೆ ಬಲಿಯಾದರು. ತಮ್ಮ 84ನೇ ಪಂದ್ಯದಲ್ಲಿ ಚಹಲ್ ಈ ಸಾಧನೆ ಮೆರಿದಿದ್ದಾರೆ. ಚಹಲ್ ಬೆಸ್ಟ್ ಬೌಲಿಂಗ್ 25/4 ಆಗಿದೆ.

ಅಷ್ಟೇ ಅಲ್ಲದೆ ಪ್ರಸಕ್ತ ಸಾಲಿನ ಐಪಿಎಲ್‌ನಲ್ಲಿ 14 ಪಂದ್ಯಗಳನ್ನು ಆಡಿರುವ ಚಹಲ್ 18 ವಿಕೆಟುಗಳನ್ನು ಕಬಳಿಸಿದ್ದಾರೆ. ಈ ಮೂಲಕ ವಿಕೆಟ್‌ಗಳ ಬೇಟೆಯಲ್ಲಿ ನಾಲ್ಕನೇ ಸ್ಥಾನದಲ್ಲಿದ್ದಾರೆ.