ಡ್ರಾಪ್...ಡ್ರಾಪ್...ಡ್ರಾಪ್; ಆರ್ಚರ್ ಹ್ಯಾಟ್ರಿಕ್ ಕ್ಯಾಚ್ ಮಿಸ್!

ಜೈಪುರ: 'ಕ್ಯಾಚ್ ವಿನ್ಸ್ ಮ್ಯಾಚ್' ಎಂಬ ಮಾತಿದೆ. ಆದರೆ ಇಲ್ಲೊಬ್ಬ ಫೀಲ್ಡರ್ ಪಂದ್ಯವೊಂದರಲ್ಲೇ ಮೂರು ಕ್ಯಾಚ್‌ಗಳನ್ನು ಮಿಸ್ ಮಾಡಿದರೆ ಪರಿಸ್ಥಿತಿ ಹೇಗಿರಬಹುದು ?

ಹೌದು, ಇಂಡಿಯನ್ ಪ್ರೀಮಿಯರ್ ಲೀಗ್ 12ನೇ ಆವೃತ್ತಿಯಲ್ಲಿ ಭಾನುವಾರ ಮುಂಬೈ ಇಂಡಿಯನ್ಸ್ ವಿರುದ್ಧ ನಡೆದ ಪಂದ್ಯದಲ್ಲಿ ರಾಜಸ್ಥಾನ್ ರಾಯಲ್ಸ್ ತಂಡದ ಆಲ್‌ರೌಂಡರ್ ಆಟಗಾರ ಜೋಫ್ರಾ ಆರ್ಚರ್ ಒಂದರ ಬಳಿಕ ಒಂದರಂತೆ ಮೂರು ಕ್ಯಾಚ್‌ಗಳನ್ನು ಮಿಸ್ ಮಾಡಿದರು.

ಪಂದ್ಯದ ಆರಂಭದಲ್ಲೇ ಶ್ರೇಯಸ್ ಗೋಪಾಲ್ ಎಸೆದ ಮುಂಬೈ ಇನ್ನಿಂಗ್ಸ್‌ನ ಮೂರನೇ ಓವರ್‌ನ ಅಂತಿಮ ಎಸೆತದಲ್ಲಿ ಕ್ವಿಂಟನ್ ಡಿ ಕಾಕ್ ನೀಡಿದ ಕ್ಯಾಚ್‌ನ್ನು ಆರ್ಚರ್ ಕೈಚೆಲ್ಲಿದರು. ಇದಕ್ಕೆ ರಾಜಸ್ಥಾನ್ ತಂಡವು ಭಾರಿ ಬೆಲೆಯನ್ನೇ ತೆರಬೇಕಾಯಿತು. 47 ಎಸೆತಗಳನ್ನು ಎದುರಿಸಿದ ಡಿ ಕಾಕ್ ಆರು ಬೌಂಡರಿ ಹಾಗೂ ಎರಡು ಸಿಕ್ಸರ್‌ಗಳಿಂದ 65 ರನ್ ಸಿಡಿಸಿದ್ದರು.

ಬಳಿಕ ಇನ್ನಿಂಗ್ಸ್‌ನ ಅಂತಿಮ ಹಂತದಲ್ಲಿ ಜೈವೇದ್ ಉನಾದ್ಕಟ್ ದಾಳಿಯಲ್ಲಿ ಹಾರ್ದಿಕ್ ಪಾಂಡ್ಯ ಅವರ ಕ್ಯಾಚ್‌ಗಳನ್ನು ಎರಡು ಬಾರಿ ಕೈಚೆಲ್ಲಿದರು. ಇನ್ನಿಂಗ್ಸ್‌ನ 16.2 ಹಾಗೂ 18.3ನೇ ಓವರ್‌ನಲ್ಲಿ ಹಾರ್ದಿಕ್ ಸುಲಭ ಕ್ಯಾಚ್‌ಗಳನ್ನು ಹಿಡಿಯುವಲ್ಲಿ ವಿಫಲವಾದರು.

ಬಳಿಕ ಪಾಂಡ್ಯರನ್ನು ಎಲ್‌ಬಿಡಬ್ಲ್ಯು ಬಲೆಗೆ ಸಿಲುಕಿಸಿದರೂ ಆಗಲೇ 15 ಎಸೆತಗಳಲ್ಲಿ ಎರಡು ಬೌಂಡರಿ ಹಾಗೂ ಸಿಕ್ಸರ್ ನೆರವಿನಿಂದ 23 ರನ್ ಗಳಿಸಿದ್ದರು.