ಧೋನಿ ತರಹನೇ ಸಂಜು ಮಿಂಚಿನ ವೇಗದ ಸ್ಟಂಪಿಂಗ್!

ಜೈಪುರ: ಇಂಡಿಯನ್ ಪ್ರೀಮಿಯರ್ ಲೀಗ್ 2019ನೇ ಸಾಲಿನ ಟ್ವೆಂಟಿ-20 ಕ್ರಿಕೆಟ್ ಚಾಂಪಿಯನ್‌ಶಿಪ್‌ನಲ್ಲಿ ಮಹೇಂದ್ರ ಸಿಂಗ್ ಧೋನಿ ರೀತಿಯಲ್ಲೇ ಸಂಜು ಸ್ಯಾಮ್ಸನ್ ಅದ್ಭುತ ಸ್ಟಂಪಿಂಗ್ ಮಾಡುವ ಮೂಲಕ ಗಮನ ಸೆಳೆದಿದ್ದಾರೆ.

ಶನಿವಾರ ಸನ್‌ರೈಸರ್ಸ್ ಹೈದರಾಬಾದ್ ವಿರುದ್ಧ ನಡೆಯುತ್ತಿರುವ ಪಂದ್ಯದಲ್ಲಿ ರಾಜಸ್ಥಾನ್ ರಾಯಲ್ಸ್ ತಂಡದ ವಿಕೆಟ್ ಕೀಪರ್ ಆಗಿರುವ ಸಂಜು, ಜಾಣ್ಮೆಯ ಸ್ಟಂಪಿಂಗ್ ಮಾಡಿದರು.

ಈ ಮೂಲಕ ಅರ್ಧಶತಕ ಬಾರಿಸಿ ಅಪಾಯಕಾರಿಯಾಗಿ ಮುನ್ನುಗ್ಗುತ್ತಿದ್ದ ಮನೀಷ್ ಪಾಂಡೆ (61) ಓಟಕ್ಕೆ ಬ್ರೇಕ್ ಹಾಕಿದರು.

ಲೆಗ್ ಸ್ಪಿನ್ನರ್ ಶ್ರೇಯಸ್ ಗೋಪಾಲ್ ಎಸೆದ ಪಂದ್ಯದ 15ನೇ ಓವರ್‌ನ ಅಂತಿಮ ಎಸೆತದಲ್ಲಿ ಮನೀಶ್ ಪಾಂಡೆರನ್ನು ಕ್ಷಣಾರ್ಧದಲ್ಲಿ ಸಂಜು ಸ್ಟಂಪಿಂಗ್ ಬಲೆಗೆ ಸಿಲುಕಿಸಿದರು. ಬಳಿಕ ರಿಪ್ಲೇ ಪರಿಶೀಲಿಸಿದಾಗ ಔಟ್ ಎಂಬುದು ಖಚಿತವಾಗಿತ್ತು.

ಅದೇ ದಾಳಿಯು ಪಾಂಡೆ ಬ್ಯಾಟ್ ಸವರಿಕೊಂಡು ಸಂಜು ಗ್ಲೌ ಸೇರಿತ್ತು. ಆದರೆ ಇದರ ಮನವರಿಕೆ ಸಂಜುಗೆ ಇರಲಿಲ್ಲ. ಪರಿಣಾಮ ಡಿಆರ್‌ಎಸ್ ಮನವಿ ಮಾಡಿರಲಿಲ್ಲ. ಒಂದು ವೇಳೆ ಸ್ಟಂಪ್ ಔಟ್ ಆಗಿಲ್ಲದಿದ್ದರೆ ರಾಜಸ್ಥಾನ್ ತಮ್ಮ ತಪ್ಪಿಗಾಗಿ ದೊಡ್ಡ ಬೆಲೆಯನ್ನೇ ತೆರಬೇಕಾಗಿ ಬರುತ್ತಿತ್ತು.

ಒಟ್ಟಿನಲ್ಲಿ ಧೋನಿ ರೀತಿಯಲ್ಲಿ ಸ್ಟಂಪಿಂಗ್ ಮಾಡುವ ಮೂಲಕ ಸಂಜು ಗಮನ ಸೆಳೆದಿದ್ದಾರೆ. ಈ ಮೂಲಕ ಧೋನಿ ಬಳಿಕ ಯಾರು ವಿಕೆಟ್ ಕೀಪರ್ ಸ್ಪರ್ಧೆಯಲ್ಲಿ ತಾನು ಕೂಡಾ ಇದ್ದೇನೆ ಎಂಬುದನ್ನು ಸಾಬೀತು ಮಾಡಿದ್ದಾರೆ.