ಚೊಚ್ಚಲ ಐಪಿಎಲ್ ವಿಕೆಟ್ ಪಡೆದ ನೇಪಾಳ ಬೌಲರ್ ಸಂದೀಪ್

ಹೊಸದಿಲ್ಲಿ: ವಿರಾಟ್‌ ಕೊಹ್ಲಿ(70) ಮತ್ತು ಎಬಿ ಡಿ'ವಿಲಿಯರ್ಸ್‌(72*) ಅವರ ಬ್ಯಾಟಿಂಗ್‌ ವೈಭವದ ನೆರವಿನಿಂದ ಡೆಲ್ಲಿ ಡೇರ್‌ಡೆವಿಲ್ಸ್‌ ತಂಡವನ್ನು 5 ವಿಕೆಟ್‌ಗಳಿಂದ ಮಣಿಸಿದ ರಾಯಲ್‌ ಚಾಲೆಂಜರ್ಸ್‌ ಬೆಂಗಳೂರು, ಐಪಿಎಲ್‌-11ರಲ್ಲಿ 4ನೇ ಜಯ ದಾಖಲಿಸಿತು.

ನಾಯಕ ವಿರಾಟ್‌ ಮತ್ತು ಡಿ'ವಿಲಿಯರ್ಸ್‌ 3ನೇ ವಿಕೆಟ್‌ಗೆ 118 ರನ್‌ಗಳ ಜತೆಯಾಟವಾಡಿ ತಂಡದ ಸುಲಭ ಜಯಕ್ಕೆ ಕಾರಣರಾದರು.

ಈ ನಡುವೆ ಡೆಲ್ಲಿ ಪರ ಐಪಿಎಲ್‌ಗೆ ಪದಾರ್ಪಣೆ ಮಾಡಿದ ನೇಪಾಳದ ಲೆಗ್‌ಸ್ಪಿನ್ನರ್‌ ಸಂದೀಪ್‌ ಲಮಿಚಾನೆ, 4 ಓವರ್‌ಗಳಲ್ಲಿ ಕೇವಲ 25 ರನ್ನಿತ್ತು 1 ವಿಕೆಟ್‌ ಪಡೆದು ಗಮನ ಸೆಳೆದರು.

ಐಪಿಎಲ್‌ನಲ್ಲಿ ಎರಡು ಪ್ರಮುಖ ದಾಖಲೆಗಳನ್ನು ಸಂದೀಪ್ ಬರೆದಿದ್ದಾರೆ. ಐಪಿಎಲ್ ಆಡಿದ ಮೊದಲ ನೇಪಾಳ ಕ್ರಿಕೆಟಿಗ ಮತ್ತು ಐಪಿಎಲ್‌ನಲ್ಲಿ ವಿಕೆಟ್ ಪಡೆದ ಮೊದಲ ನೇಪಾಳ ಬೌಲರ್ ಎಂಬ ದಾಖಲೆಗೆ ಅರ್ಹವಾಗಿದ್ದಾರೆ.

ಐಪಿಎಲ್‌ಗೆ ಸಂದೀಪ್ ಪ್ರವೇಶಿಸಿದ ಐತಿಹಾಸಿಕ ಕ್ಷಣದಿಂದ ಆಸ್ಟ್ರೇಲಿಯಾದ ಮಾಜಿ ನಾಯಕ ಮೈಕಲ್ ಕ್ಲಾರ್ಕ್ ಸಹ ಅತೀವ ಸಂತಸವನ್ನು ವ್ಯಕ್ತಪಡಿಸಿದ್ದಾರೆ. ಅತ್ತ 17ರ ಹರೆಯದ ಸಂದೀಪ್ ಸಾಧನೆಗೆ ಎಬಿಡಿ ವಿಲಿಯರ್ಸ್ ಸಹ ಹೊಗಳಿಕೆಯ ಮಾತುಗಳನ್ನಾಡಿದ್ದು, ವಿಶ್ವ ಕ್ರಿಕೆಟ್‌ ದೃಷ್ಟಿಕೋನದಿಂದ ಉತ್ತಮ ಬೆಳವಣಿಗೆ ಎಂದಿದ್ದಾರೆ.