ಚೊಚ್ಚಲ ಕಿರೀಟದ ಹುಡುಕಾಟದಲ್ಲಿರುವ ಡೆಲ್ಲಿಗೆ ಭಾರಿ ಹೊಡೆತ!

ಹೊಸದಿಲ್ಲಿ: ಇಂಡಿಯನ್ ಪ್ರೀಮಿಯರ್ ಲೀಗ್ ಟ್ವೆಂಟಿ-20 ಕ್ರಿಕೆಟ್ ಚಾಂಪಿಯನ್‌ಶಿಪ್‌ನಲ್ಲಿ ಚೊಚ್ಚಲ ಕಿರೀಟದ ಹುಡುಕಾಟದಲ್ಲಿರುವ ಡೆಲ್ಲಿ ಕ್ಯಾಪಿಟಲ್ಸ್ ತಂಡಕ್ಕೆ ಭಾರಿ ಹೊಡೆತವುಂಟಾಗಿದೆ.

ಅದೇನೆಂದರೆ ದಕ್ಷಿಣ ಆಫ್ರಿಕಾದ ಸ್ಪೀಡ್ ಸ್ಟಾರ್ ಕಗಿಸೋ ರಬಾಡ ಸೇವೆಯನ್ನು ಡೆಲ್ಲಿ ಕಳೆದುಕೊಳ್ಳುವಂತಾಗಿದೆ. ಇದರೊಂದಿಗೆ ಪ್ಲೇ-ಆಫ್‌ಗೂ ಮುಂಚಿತವಾಗಿ ಭಾರಿ ಹಿನ್ನಡೆ ಅನುಭವಿಸಿದೆ.

ಮುಂಬರುವ ಏಕದಿನ ವಿಶ್ವಕಪ್ ಹಿನ್ನಲೆಯಲ್ಲಿ ದಕ್ಷಿಣ ಆಫ್ರಿಕಾ ತಂಡವು ಕಗಿಸೋ ರಬಾಡರನ್ನು ತವರಿಗೆ ಬುವಾವ್ ನೀಡಿದೆ. ಮುಂಜಾಗ್ರತಾ ಕ್ರಮವಾಗಿ ದಕ್ಷಿಣ ಆಫ್ರಿಕಾ ಇಂತಹದೊಂದು ಹೆಜ್ಜೆಯನ್ನಿರಿಸಿದೆ.

ಗಾಯದ ಆತಂಕದ ಹಿನ್ನಲೆಯಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧ ನಡೆದ ಕೊನೆಯ ಪಂದ್ಯದಲ್ಲಿ ರಬಾಡ ಆಡಿರಲಿಲ್ಲ. ಅಷ್ಟೇ ಯಾಕೆ ವಿಕೆಟ್ ಬೇಟೆಯಲ್ಲಿ ಮುಂಚೂಣಿಯಲ್ಲಿರುವ ರಬಾಡ ಇದುವರೆಗೆ ಆಡಿರುವ 12 ಪಂದ್ಯಗಳಲ್ಲಿ 25 ವಿಕೆಟುಗಳನ್ನು ಕಬಳಿಸಿ ಪರ್ಪಲ್ ಕ್ಯಾಪ್ ಆಲಂಕರಿಸಿದ್ದಾರೆ.

ಪ್ರಸ್ತುತ ಬೆಳವಣಿಗೆಯನ್ನು ಡೆಲ್ಲಿ ಕೋಚ್ ರಿಕಿ ಪಾಂಟಿಂಗ್ ದುರದೃಷ್ಟಕರ ಎಂದಿದ್ದಾರೆ. ಅತ್ತ ಈ ನಿರ್ಣಾಯಕ ಹಂತದಲ್ಲಿ ತಂಡವನ್ನು ಬಿಟ್ಟು ತೆರಳುವುದಕ್ಕೆ ಬೇಸರವಿದೆ ಎಂದು ರಬಾಡ ಹೇಳಿದರು.