ವಾಟ್ಸನ್-ಇಶಾಂತ್, ವಾಟ್ಸನ್-ರಬಡ ಮಾತಿನ ಚಕಮಕಿ

ಹೊಸದಿಲ್ಲಿ: ಇಂಡಿಯನ್ ಪ್ರೀಮಿಯರ್ ಲೀಗ್ ಟ್ವೆಂಟಿ-20 ಕ್ರಿಕೆಟ್ ಚಾಂಪಿಯನ್‌ಶಿಪ್‌ನಲ್ಲಿ ವಿವಾದವು ಸದಾ ಅಂಟಿಕೊಂಡಿರುತ್ತದೆ. ಐಪಿಎಲ್ 2019ನೇ ಆವೃತ್ತಿಯು ಇದರಿಂದ ಹೊರತಾಗಿಲ್ಲ.

ಸೋಮವಾರ ಡೆಲ್ಲಿ ಕ್ಯಾಪಿಟಲ್ಸ್ ಹಾಗೂ ಚೆನ್ನೈ ಸೂಪರ್ ಕಿಂಗ್ಸ್ ನಡುವಣ ಪಂದ್ಯದಲ್ಲೂ ಇತ್ತಂಡಗಳ ಆಟಗಾರರ ನಡುವೆ ಬಿಗುವಾದ ವಾತಾವರಣ ನಿರ್ಮಾಣವಾಗಿದೆ.

ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಅನುಭವಿ ಓಪನರ್ ಶೇನ್ ವಾಟ್ಸನ್, ಡೆಲ್ಲಿ ಡೇರ್‌ಡೆವಿಲ್ಸ್‌ನ ಇಬ್ಬರು ಪ್ರಮುಖ ವೇಗಿಗಳಾದ ಇಶಾಂತ್ ಶರ್ಮಾ ಹಾಗೂ ಕಗಿಸೋ ರಬಡ ಜತೆ ಮಾತಿನ ಚಕಮಕಿಯಲ್ಲಿ ಭಾಗಿಯಾದರು.

ಮೊದಲು ಇಶಾಂತ್ ಜತೆ ವಾಗ್ವಾದ ನಡೆಸಿದ ವಾಟ್ಸನ್ ಕೆಲವೇ ಹೊತ್ತಿನಲ್ಲಿ ರಬಡ ಜತೆಗೂ ಜಟಾಪಟಿಯಲ್ಲಿ ಗುರುತಿಸಿಕೊಂಡರು. ಇವೆಲ್ಲವೂ ಪಂದ್ಯಕ್ಕೆ ರೋಚಕತೆಯನ್ನು ನೀಡುವುದರೊಂದಿಗೆ ಬಿಗುವಾದ ವಾತಾವರಣ ಸೃಷ್ಟಿಸಿತ್ತು.

ಈ ವೇಳೆ ಮಧ್ಯೆ ಪ್ರವೇಶಿಸಿದ ಡೆಲ್ಲಿ ನಾಯಕ ಶ್ರೇಯಸ್ ಅಯ್ಯರ್ ತಮ್ಮ ಆಟಗಾರರು ಹಿಂದೆ ಸರಿಸಿದರು. ಅತ್ತ ಅಂಪೈರ್ ಇದನ್ನು ಹೆಚ್ಚು ಗಂಭೀರತೆಯಿಂದ ನೋಡದೆ ನಗುವನ್ನು ಚೆಲ್ಲಿದರು.