ರಾಯುಡು vs ಶಂಕರ್; 3ಡಿ vs 2ಡಿ

ಹೈದರಾಬಾದ್: ಮುಂಬರುವ 2019 ಐಸಿಸಿ ಏಕದಿನ ವಿಶ್ವಕಪ್‌ಗಾಗಿನ ಭಾರತ ತಂಡದಲ್ಲಿ ಅನುಭವಿ ಅಂಬಡಿ ರಾಯುಡು ಅವರನ್ನು ಕಡೆಗಣಿಸಿ ಉದಯೋನ್ಮುಖ ಆಲ್‌ರೌಂಡರ್ ವಿಜಯ್ ಶಂಕರ್‌ ಆಯ್ಕೆ ಮಾಡಲಾಗಿತ್ತು.

ಇದಾದ ಬೆನ್ನಲ್ಲೇ ವ್ಯಾಪಕ ಪರ-ವಿರೋಧ ಚರ್ಚೆಗಳು ಮನೆ ಮಾಡಿದ್ದವು. ತಂಡ ಘೋಷಣೆ ವೇಳೆಯಲ್ಲಿ ಎಲ್ಲ ಮೂರು ವಿಭಾಗದಲ್ಲಿ ಕೊಡುಗೆಯನ್ನು ಪರಿಗಣಿಸಿ ವಿಜಯ್ ಶಂಕರ್ ಆಯ್ಕೆ ಮಾಡಲಾಗಿತ್ತು ಎಂಬ ಸ್ಪಷ್ಟನೆಯನ್ನು ನೀಡಿದ್ದರು.

ಅತ್ತ ತೀವ್ರ ಆಕ್ರೋಶಭರಿತರಾಗಿದ್ದ ರಾಯುಡು ತಮ್ಮ ಟ್ವೀಟ್‌ನಲ್ಲಿ ತಾನು ವಿಶ್ವಕಪ್ ನೋಡಲು ತ್ರಿಡಿ ಗ್ಲಾಸ್ ಖರೀದಿಸಲಿದ್ದೇನೆ ಎಂದು ವ್ಯಂಗ್ಯವಾಡಿದ್ದರು. ಇದು ನೇರವಾಗಿ ಬಿಸಿಸಿಐ ಹಾಗೂ ವಿಜಯ್ ಶಂಕರ್ ಆಯ್ಕೆಯನ್ನು ಟೀಕಿಸುವಂತಿತ್ತು.

ಇದೀಗ ಐಪಿಎಲ್‌ನಲ್ಲಿ ಚೆನ್ನೈ ತಂಡವನ್ನು ಪ್ರತಿನಿಧಿಸುತ್ತಿರುವ ಅಂಬಡಿ ರಾಯುಡು ಹಾಗೂ ಸನ್‌ರೈಸರ್ಸ್ ಹೈದರಾಬಾದ್ ತಂಡದ ವಿಜಯ್ ಶಂಕರ್ ನಡುವೆ ನೇರ ಹಣಾಹಣಿ ಏರ್ಪಟ್ಟಿತ್ತು. ಇದು ಹೆಚ್ಚಿನ ರೋಚಕತೆಯನ್ನು ಸೃಷ್ಟಿ ಮಾಡಿತ್ತು.

ಇಲ್ಲಿ ಗಮನಾರ್ಹ ಅಂಶವೆಂದರೆ ಆಂಧ್ರ ಪ್ರದೇಶ ಮೂಲದವರಾದ ರಾಯುಡು ಚೆನ್ನೈ ಹಾಗೂ ತಮಿಳುನಾಡು ಮೂಲದವರಾಗಿರುವ ಶಂಕರ್ ಹೈದರಾಬಾದ್ ತಂಡವನ್ನು ಪ್ರತಿನಿಧಿಸುತ್ತಿದ್ದಾರೆ. ಇದರೊಂದಿಗೆ ತ್ರಿಡಿ vs 2ಡಿ ಎಲ್ಲ ಟ್ರೋಲ್‌ಗಳು ಹರಿದಾಡಲು ಪ್ರಾರಂಭವಾಗಿದೆ.