ರಾಶೀದ್ ದಾಳಿಗೆ ಅಂದು ಎಬಿಡಿ, ಇಂದು ಕೊಹ್ಲಿ ಕ್ಲೀನ್ ಬೌಲ್ಡ್!

ಬೆಂಗಳೂರು: ಇಂಡಿಯನ್ ಪ್ರೀಮಿಯರ್ ಲೀಗ್ 2018ನೇ ಆವೃತ್ತಿಯ ಟ್ವೆಂಟಿ-20 ಕ್ರಿಕೆಟ್ ಚಾಂಪಿಯನ್‌ಶಿಪ್‌ನಲ್ಲಿ ಗುರುವಾರ ಸನ್‌ರೈಸರ್ಸ್ ಹೈದರಾಬಾದ್ ವಿರುದ್ಧ ನಡೆಯುತ್ತಿರುವ ನಿರ್ಣಾಯಕ ಪಂದ್ಯದಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ನಾಯಕ ವಿರಾಟ್ ಕೊಹ್ಲಿ ಬ್ಯಾಟಿಂಗ್ ವೈಫಲ್ಯವನ್ನು ಅನುಭವಿಸಿದ್ದಾರೆ.

ವಿಶ್ವದ ನಂ.1 ಟ್ವೆಂಟಿ-20 ಬೌಲರ್ ಅಪಘಾನಿಸ್ತಾನದ ರಾಶೀದ್ ಖಾನ್ ದಾಳಿಯಲ್ಲಿ ವಿರಾಟ್ ಕೊಹ್ಲಿ ಕ್ಲೀನ್ ಬೌಲ್ಡ್ ಆಗಿ ಪೆವಿಲಿಯನ್‌ಗೆ ನಿರ್ಗಮಿಸಿದ್ದರು.

ಇತ್ತಂಡಗಳು ಕೊನೆಯ ಬಾರಿಗೆ ಎದುರಾದಾಗ 360 ಶಾಟ್ ಡಿಗ್ರಿ ಖ್ಯಾತಿಯ ಎಬಿಡಿ ವಿಲಿಯರ್ಸ್ ಅವರನ್ನು ರಾಶೀದ್ ಕ್ಲೀನ್ ಬೌಲ್ಡ್ ಮಾಡಿರುವುದನ್ನು ನೀವಿಲ್ಲಿ ನೆನಪಿಸಿಕೊಳ್ಳಬಹುದು.


ಈ ಮೂಲಕ ಕೊಹ್ಲಿ ಮತ್ತೊಮ್ಮೆ ಸ್ಪಿನ್ ದಾಳಿಗೆ ಬಲಿಯಾಗಿದ್ದಾರೆ. ಪ್ರಸಕ್ತ ಸಾಲಿನ ಐಪಿಎಲ್‌ನಲ್ಲಿ ಏಳನೇ ಬಾರಿಗೆ ಸ್ಪಿನ್ ದಾಳಿಗೆ ವಿಕೆಟ್ ಒಪ್ಪಿಸುತ್ತಿದ್ದಾರೆ.

ಉತ್ತಮವಾಗಿ ಆಡುತ್ತಿರುವ ಹೊರತಾಗಿಯೂ ಲೆಗ್ ಸ್ಪಿನ್ನರ್ ರಾಶೀದ್ ಅವರ ಗೂಗ್ಲಿಯನ್ನು ಅರಿತುಕೊಳ್ಳುವಲ್ಲಿ ಕೊಹ್ಲಿ ಎಡವಿದ್ದರು.

ಇದರೊಂದಿಗೆ ಗೆಲ್ಲಲೇ ಬೇಕಾದ ಪಂದ್ಯದಲ್ಲಿ ಕೇವಲ 12 ರನ್ ಗಳಿಸಿ ಮಾತ್ರ ನಿರಾಸೆ ಮೂಡಿಸಿದ್ದರು.