​ಕ್ರೀಡಾಸ್ಫೂರ್ತಿ ಮೆರೆದ ಗೇಲ್; ಕೊಹ್ಲಿ ಜತೆ ಗೆಲುವಿನ ಸಂಭ್ರಮ

ಇಂದೋರ್: ಇಂಡಿಯನ್ ಪ್ರೀಮಿಯರ್ ಲೀಗ್ ಟ್ವೆಂಟಿ-20 ಕ್ರಿಕೆಟ್ ಚಾಂಪಿಯನ್‌ಶಿಪ್‌ನಲ್ಲಿ ಸೋಮವಾರ ಕಿಂಗ್ಸ್ ಇಲೆವೆನ್ ವಿರುದ್ಧ ನಡೆದ ಮಹತ್ವದ ಪಂದ್ಯದಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡವು 10 ವಿಕೆಟ್‌ಗಳ ಅಂತರದ ಭರ್ಜರಿ ಗೆಲುವು ದಾಖಲಿಸಿತ್ತು.

ಉಮೇಶ್ ಯಾದವ್ ಪ್ರಭಾವಿ ದಾಳಿ ನೆರವಿನಿಂದ (23ಕ್ಕೆ 3 ವಿಕೆಟ್) ಮೊದಲು ಕಿಂಗ್ಸ್ ತಂಡವನ್ನು 88 ರನ್‌ಗಳಿಗೆ ಕಟ್ಟಿ ಹಾಕಿದ ಆರ್‌ಸಿಬಿ ಬಳಿಕ ನಾಯಕ ವಿರಾಟ್ ಕೊಹ್ಲಿ (48*) ಹಾಗೂ ಪಾರ್ಥಿವ್ ಪಟೇಲ್ (40*) ಅಮೋಘ ಇನ್ನಿಂಗ್ಸ್‌ಗಳ ನೆರವಿನಿಂದ 8.1 ಓವರ್‌ಗಳಲ್ಲೇ ಗೆಲುವು ದಾಖಲಿಸಿತ್ತು.

ಈ ಗೆಲುವಿನೊಂದಿಗೆ ಬೆಂಗಳೂರು ಪ್ಲೇ-ಆಫ್ ಕನಸು ಜೀವಂತವಾಗಿರಿಸಿದೆ. ಈ ನಡುವೆ ಆರ್‌ಸಿಬಿ ಬಿಟ್ಟು ಪಂಜಾಬ್ ತಂಡವನ್ನು ಸೇರಿಕೊಂಡಿರುವ ಕ್ರಿಸ್ ಗೇಲ್ ಕ್ರೀಡಾಸ್ಫೂರ್ತಿ ಮೆರೆದಿರುವುದು ಗಮನ ಸೆಳೆದಿತ್ತು.

ಪಂದ್ಯದ ಬಳಿಕ ಆಟಗಾರರು ಕೈ ಕೈ ಮಿಲಾಯಿಸುತ್ತಿದ್ದ ವೇಳೆ ಕೊಹ್ಲಿ ಹಾಗೂ ಗೇಲ್ ತಮ್ಮದೇ ಆದ ವಿಶೇಷ ಶೈಲಿಯಲ್ಲಿ ಹಸ್ತಲಾಘವ ಮಾಡಿಕೊಂಡರು. ಇದು ಅಭಿಮಾನಿಗಳಲ್ಲೂ ಖುಷಿ ತಂದಿತ್ತು.

ಈ ಹಿಂದೆ ಆರ್‌ಸಿಬಿ ಪಂದ್ಯ ಗೆದ್ದಾಗ ಗೇಲ್ ಹಾಗೂ ಕೊಹ್ಲಿ ಇದೇ ರೀತಿಯ ಹ್ಯಾಂಡ್ ಶೇಕ್ ಮಾಡುವ ಮಾಡುವ ಮೂಲಕ ಸಂಭ್ರಮ ಆಚರಿಸಿಕೊಳ್ಳುತ್ತಿದ್ದರು. ಆದರೆ ಈ ಬಾರಿಯ ಹರಾಜಿನಲ್ಲಿ ಗೇಲ್ ಖರೀದಿಸಲು ಆರ್‌ಸಿಬಿ ಫ್ರಾಂಚೈಸಿ ಹಿಂಜರಿದಿತ್ತು.

ಇವೆಲ್ಲದರ ನಡುವೆ ಗೇಲ್ ಜತೆ ಉತ್ತಮ ಬಾಂಧವ್ಯವವನ್ನು ಕೊಹ್ಲಿ ಕಾಪಾಡಿಕೊಂಡು ಬಂದಿದ್ದಾರೆ. ಅಲ್ಲದೆ ಆರ್‌ಸಿಬಿ ಮಾಜಿ ಆಟಗಾರರನ್ನು ಹೊಂದಿರುವ ಪಂಜಾಬ್ ತಂಡದ ಮೇಲೆ ಭರ್ಜರಿ ಗೆಲುವು ದಾಖಲಿಸುವಲ್ಲಿ ಯಶಸ್ವಿಯಾಗಿದ್ದಾರೆ.