ನಂ.12 ಆರ್‌ಸಿಬಿ ಫ್ಯಾನ್‌ ಜರ್ಸಿ

ಬೆಂಗಳೂರು: ಅಭಿಮಾನಿಗಳ ಮನ ಗೆಲ್ಲುವ ನಿಟ್ಟಿನಲ್ಲಿ ರಾಯಲ್‌ ಚಾಲೆಂಜರ್ಸ್‌ ಬೆಂಗಳೂರು ತಂಡ ಹೊಸ ತಂತ್ರಕ್ಕೆ ಮೊರೆ ಹೋಗಿದ್ದು, 12ನೇ ಸಂಖ್ಯೆ ಜರ್ಸಿಯನ್ನು ಯಾವ ಆಟಗಾರನಿಗೂ ನೀಡದೆ ಅದನ್ನು ತನ್ನ ಅಭಿಮಾನಿಗಳಿಗಾಗಿ ಮೀಸಲಿಟ್ಟಿದೆ. ಹೀಗಾಗಿ ಅಭಿಮಾನಿಗಳು ಈ ಬಾರಿ 12ನೇ ಸಂಖ್ಯೆಯ ಜರ್ಸಿಯನ್ನು ತೊಟ್ಟು ಆರ್‌ಸಿಬಿ ತಂಡವನ್ನು ಬೆಂಬಲಿಸಬಹುದಾಗಿದೆ.

ಈ ಮಧ್ಯೆ ತಂಡದ ನಾಯಕ ವಿರಾಟ್‌ ಕೊಹ್ಲಿ 12ನೇ ಸಂಖ್ಯೆಯ ಜರ್ಸಿಯನ್ನು ತಮ್ಮ ಟ್ವಿಟರ್‌ ಖಾತೆಯಲ್ಲಿ ಪ್ರಕಟಿಸಿದ್ದಾರೆ. ಜರ್ಸಿ ನಂ.12ನ್ನು ಅಭಿಮಾನಿಗಳಿಗೋಸ್ಕರ ನಿವೃತ್ತಿಗೊಳಿಸುತ್ತಿರುವುದಾಗಿ ರಾಯಲ್‌ ಚಾಲೆಂಜರ್ಸ್‌ ಬೆಂಗಳೂರು ತಂಡದ ನಾಯಕ ವಿರಾಟ್‌ ಕೊಹ್ಲಿ ಬುಧವಾರ ಅಧಿಕೃತವಾಗಿ ಪ್ರಕಟಿಸಿದರು.

''ಇತ್ತೀಚಿನ ಬೆಳವಣಿಗೆಯಲ್ಲಿ ಆರ್‌ಸಿಬಿ, ಜರ್ಸಿ ನಂ.12ಗೆ ನಿವೃತ್ತಿ ಘೋಷಿಸುತ್ತಿದೆ. ತಂಡದ 12ನೇ ಆಟಗಾರನಾಗಿ ಅಭಿಮಾನಿಗಳನ್ನು ಪರಿಗಣಿಸಲು ತಂಡ ಈ ನಿರ್ಧಾರ ಕೈಗೊಂಡಿದೆ. ಕಳೆದ ಹತ್ತು ವರ್ಷಗಳಿಂದ ಆರ್‌ಸಿಬಿ ಅಭಿಮಾನಿಗಳ ತಂಡವಾಗಿ ಬೆಳೆದು ಬಂದಿದೆ. ಹಾಗೆಯೇ ತಂಡ ಕಳಪೆ ಹಾಗೂ ಉತ್ತಮ ಪ್ರದರ್ಶನದ ತೋರಿದಾಗ ಜತೆಗಿದ್ದು ತಂಡವನ್ನು ಬೆಂಬಲಿಸಿಕೊಂಡು ಬಂದಿದ್ದಾರೆ. ತಂಡದ ಹನ್ನೊಂದು ಆಟಗಾರರು ಎಷ್ಟು ಮುಖ್ಯವೋ ಅಷ್ಟೇ 12ನೇ ಆಟಗಾರನೂ ಮುಖ್ಯ. ಅಭಿಮಾನಿಗಳಿಗೋಸ್ಕರ ಜೆರ್ಸಿ ನೀಡುತ್ತಿರುವುದಕ್ಕೆ ನಿಜವಾಗಿಯೂ ಸಂತಸವಾಗುತ್ತಿದೆ,'' ಎಂದು ತಿಳಿಸಿದರು.

ಇದೇ ವೇಳೆ ಐಪಿಎಲ್‌ನ ಮುಂದಿನ ಸವಾಲಿಗೆ ಹೇಗೆ ಸಿದ್ದರಾಗಿದ್ದೀರಿ ಎಂಬ ಪ್ರಶ್ನೆಯೊಂದಕ್ಕೆ ಉತ್ತರಿಸಿದ ಕೊಹ್ಲಿ, ''ಕಳೆದ ಹಲವು ದಿನಗಳಿಂದ ಕಠಿಣ ಅಭ್ಯಾಸ ನಡೆಸಿದ್ದು, ದೈಹಿಕ ಹಾಗೂ ಮಾನಸಿಕವಾಗಿ ಶೇಕಡ 100ರಷ್ಟು ಫಿಟ್‌ ಆಗಿದ್ದೇನೆ. ಹಾಗೆಯೇ ತಂಡ ಸಹ ಸಜ್ಜುಗೊಂಡಿದೆ. ನಮ್ಮಂತೆಯೇ ಉಳಿದ ತಂಡಗಳು ಸಜ್ಜುಗೊಂಡಿದ್ದು, ಉತ್ತಮ ಪೈಪೋಟಿ ಎದುರಾಗುವ ನಿರೀಕ್ಷೆ ಇದೆ,'' ಎಂದು ಸಿದ್ಧತೆ ಕುರಿತು ವಿವರಿಸಿದರು.