IPL Record: ವಾರ್ನರ್-ಬೈರ್‌ಸ್ಟೋವ್ ಓಪನಿಂಗ್ ಜತೆಯಾಟ

ಹೈದರಾಬಾದ್: ಇಂಡಿಯನ್ ಪ್ರೀಮಿಯರ್ ಲೀಗ್ ಟ್ವೆಂಟಿ-20 ಕ್ರಿಕೆಟ್ ಚಾಂಪಿಯನ್‌ಶಿಪ್‌ನಲ್ಲಿ ಒಂದೇ ಪಂದ್ಯದಲ್ಲಿ ಸನ್‌ರೈಸರ್ಸ್ ಹೈದರಾಬಾದ್ ಆರಂಭಿಕರಾದ ಜಾನಿ ಬೈರ್‌ಸ್ಟೋವ್ ಹಾಗೂ ಡೇವಿಡ್ ವಾರ್ನರ್ ಶತಕಗಳ ಸಾಧನೆ ಮಾಡಿದ್ದಾರೆ.

ರಾಯಲ್ ಚಾಲೆಂಜರ್ಸ್ ಬೆಂಗಳೂರು ವಿರುದ್ಧ ನಡೆದ ಪಂದ್ಯದಲ್ಲಿ ಬೈರ್‌ಸ್ಟೋವ್ ಹಾಗೂ ವಾರ್ನರ್ ಅಮೋಘ ಸೆಂಚುರಿ ಸಾಧನೆ ಮಾಡಿದರು.

ಇದು ಬೈರ್‌ಸ್ಟೋವ್ ಬ್ಯಾಟ್‌ನಿಂದ ಸಿಡಿದ ಮೊದಲ ಐಪಿಎಲ್ ಶತಕವಾಗಿದೆ. ಅತ್ತ ವಾರ್ನರ್ ನಾಲ್ಕನೇ ಸೆಂಚುರಿ ಬಾರಿಸಿದ್ದಾರೆ.

ಅಷ್ಟೇ ಅಲ್ಲದೆ ಮೊದಲ ವಿಕೆಟ್‌ಗೆ ದಾಖಲೆಯ 185 ರನ್‌ಗಳ ಜತೆಯಾಟ ನೀಡಿದ್ದಾರೆ. ಇದು ಐಪಿಎಲ್‌‌ನಲ್ಲಿ ಮೊದಲ ವಿಕೆಟ್‌ಗೆ ದಾಖಲೆಯ ಜತೆಯಾಟವಾಗಿದೆ.

ಎರಡು ವರ್ಷಗಳ ಹಿಂದೆ 2017ರಲ್ಲಿ ಕೋಲ್ಕತಾ ನೈಟ್ ರೈಡರ್ಸ್ ತಂಡದ ಗೌತಮ್ ಗಂಭೀರ್ ಹಾಗೂ ಕ್ರಿಸ್ ಲಿನ್, ಗುಜರಾತ್ ಲಯನ್ಸ್ ವಿರುದ್ಧ 184 ರನ್‌ಗಳ ಜತೆಯಾಟ ನೀಡಿರುವುದು ಇದುವರೆಗಿನ ದಾಖಲೆಯಾಗಿತ್ತು.

56 ಎಸೆತಗಳಲ್ಲಿ 114 ರನ್ ಸಿಡಿಸಿದ ಬೈರ್‌ಸ್ಟೋವ್ ಇನ್ನಿಂಗ್ಸ್‌ನಲ್ಲಿ 12 ಬೌಂಡರಿ ಹಾಗೂ ಏಳು ಅಮೋಘ ಸಿಕ್ಸರ್‌ಗಳು ಸೇರಿದ್ದವು. ಹಾಗೆಯೇ 55 ಎಸೆತಗಳಲ್ಲಿ ಅಜೇಯ 100 ರನ್ ಗಳಿಸಿದ ವಾರ್ನರ್ ತಲಾ ಐದು ಸಿಕ್ಸರ್ ಹಾಗೂ ಬೌಂಡರಿಗಳನ್ನು ಸಿಡಿದ್ದರು.