ಕೆಕೆಆರ್‌ನಲ್ಲಿ ಎಲ್ಲವೂ ಸರಿಯಿಲ್ಲವೇ? ಕಾರ್ತಿಕ್ ಸಿಟ್ಟಾಗಿದ್ದೇಕೆ?

ಮೊಹಾಲಿ: ಇಂಡಿಯನ್ ಪ್ರೀಮಿಯರ್ ಲೀಗ್‌ನಲ್ಲಿ ಕೋಲ್ಕೊತಾ ನೈಟ್ ರೈಡರ್ಸ್ ಫ್ರಾಂಚೈಸಿಯಲ್ಲಿ ಎಲ್ಲವೂ ಸರಿಯಿಲ್ಲ ಎಂಬುದು ಮಗದೊಮ್ಮೆಸಾಬೀತಾಗಿದೆ. ಶುಕ್ರವಾರ ಕಿಂಗ್ಸ್ ಇಲೆವೆನ್ ಪಂಜಾಬ್ ವಿರುದ್ಧದ ಪಂದ್ಯ ನಡೆಯುತ್ತಿರುವಾಗಲೇ ಕೆಕೆಆರ್ ನಾಯಕ ದಿನೇಶ್ ಕಾರ್ತಿಕ್ ಸಹ ಆಟಗಾರರ ಮೇಲೆ ಸಿಟ್ಟಾಗಿರುವುದು ಕಂಡುಬಂದಿದೆ.

ಸ್ಟ್ರಾಟೆಜಿಕ್ ಬ್ರೇಕ್ ಪಡೆದ ವೇಳೆಯಲ್ಲಿ ಸಹ ಆಟಗಾರರ ಮೇಲೆ ಗರಂ ಆದ ಕಾರ್ತಿಕ್ ಬುದ್ಧಿ ಮಾತನ್ನು ಹೇಳಿದರು. ಅಲ್ಲಿಂದ ಬಳಿಕ ಎಚ್ಚೆತ್ತುಕೊಂಡು ಕೆಕೆಆರ್ ಪಂದ್ಯ ಗೆಲ್ಲುವ ಮೂಲಕ ಪ್ಲೇ-ಆಫ್ ಪ್ರವೇಶವನ್ನು ಜೀವಂತವಾಗಿರಿಸಿದೆ.

ಈ ಬಗ್ಗೆ ಪ್ರತಿಕ್ರಿಯಿಸಿದ ಕಾರ್ತಿಕ್, ಆಟಗಾರರಿಂದ ಉತ್ತಮ ಪ್ರದರ್ಶನ ಹೊರತರಲು ಕೆಲವೊಂದು ಬಾರಿ ಸಿಟ್ಟುಗೊಳ್ಳುವುದು ಸಹ ಉತ್ತಮ ಎಂದಿದ್ದಾರೆ.

ಕಳೆದ ಕೆಲವು ದಿನಗಳು ತುಂಬಾನೇ ಕಠಿಣವೆನಿಸಿದೆ. ಬೌಲರ್‌ಗಳು ಹಾಗೂ ಫೀಲ್ಡರ್‌ಗಳ ನಿರ್ವಹಣೆಯಿಂದ ನಾನು ಸಂತುಷ್ಟಿಗೊಂಡಿರಲಿಲ್ಲ. ಆ ಸಂದರ್ಭದಲ್ಲಿ ನನಗೇನು ಅನಿಸಿದೆಯೋ ಅದನ್ನು ಸಹ ಆಟಗಾರರು ಮನದಟ್ಟು ಆಗಲಿ ಎಂದು ಅಂದುಕೊಂಡೆ. ಇದು ತುಂಬಾನೇ ವಿರಳ. ನಾನು ಕೋಪಗೊಳ್ಳುವುದನ್ನು ಹಲವರು ನೋಡಿಲ್ಲ ಎಂದರು.

ಬಳಿಕ ಕಾರ್ತಿಕ್ ಏನನ್ನು ಹೇಳಿದ್ದರು ಎಂಬುದರ ಬಗ್ಗೆ ಹೇಳಿಕೆ ನೀಡಿದ ಸಂದೀಪ್ ವಾರಿಯರ್, ನಮಗಿದು ಗೆಲ್ಲಲೇಬೇಕಾದ ಪಂದ್ಯವಾಗಿದ್ದು, ಪ್ರತಿ ಎಸತೆದ ಮೇಲೂ ಗಮನ ಕೇಂದ್ರಿಕರಿಸುವಂತೆ ತಿಳಿಸಿದ್ದರು ಎಂದರು.

ಏತನ್ಮಧ್ಯೆ ಮ್ಯಾಚ್ ವಿನ್ನಿಂಗ್ಸ್ ಅರ್ಧಶತಕ ಬಾರಿಸಿರುವ ಶುಭಮನ್ ಗಿಲ್ ತಮ್ಮ ಅವಕಾಶವನ್ನು ಎರಡು ಕೈಗಳಿಂದ ಬಾಚಿಕೊಂಡಿದ್ದಾರೆ ಎಂದು ಕಾರ್ತಿಕ್ ಹೇಳಿದರು.