ಮಿಶ್ರಾ ಜಾದೂ; ಡೆಲ್ಲಿಗೆ ಅರ್ಹ ಗೆಲುವು

ಹೊಸದಿಲ್ಲಿ: ಇಂಡಿಯನ್ ಪ್ರೀಮಿಯರ್ ಲೀಗ್ ಟ್ವೆಂಟಿ-20 ಕ್ರಿಕೆಟ್ ಚಾಂಪಿಯನ್‌ಶಿಪ್‌ನಲ್ಲಿ ರಾಜಸ್ಥಾನ್ ರಾಯಲ್ಸ್ ವಿರುದ್ಧ ಡೆಲ್ಲಿ ಕ್ಯಾಪಿಟಲ್ಸ್ ಐದು ವಿಕೆಟ್ ಅಂತರದ ಭರ್ಜರಿ ಗೆಲುವು ದಾಖಲಿಸಿದೆ.

ಈ ಮೂಲಕ ಅಂಕಪಟ್ಟಿಯಲ್ಲಿ ಎರಡನೇ ಸ್ಥಾನಕ್ಕೇರಿದೆ. ಬೌಲಿಂಗ್‌ನಲ್ಲಿ ಜಾದೂ ಮೆರೆದ ಅಮಿತ್ ಮಿಶ್ರಾ ಅರ್ಹವಾಗಿಯೇ ಪಂದ್ಯಶ್ರೇಷ್ಠ ಪ್ರಶಸ್ತಿಗೆ ಭಾಜವಾದರು.

ಮೊದಲು ಬ್ಯಾಟಿಂಗ್ ನಡೆಸಿದ ರಾಜಸ್ಥಾನ್ ರಾಯಲ್ಸ್, ರಿಯಾಗ್ ಪರಾಗ್ (50) ಫೈಟಿಂಗ್ ಫಿಫ್ಟಿ ಹೊರತಾಗಿಯೂ ನಿಗದಿತ 20 ಓವರ್‌ಗಳಲ್ಲಿ ಒಂಬತ್ತು ವಿಕೆಟ್ ನಷ್ಟಕ್ಕೆ 115 ರನ್ ಗಳಿಸಲಷ್ಟೇ ಶಕ್ತವಾಗಿತ್ತು.

ನಿಖರ ದಾಳಿ ಸಂಘಟಿಸಿದ ಮಿಶ್ರಾ 17 ರನ್ ತೆತ್ತು ಪ್ರಮುಖ ಮೂರು ವಿಕೆಟುಗಳನ್ನು ಕಿತ್ತು ಮಿಂಚಿದರು. ಇವರಿಗೆ ತಕ್ಕ ಸಾಥ್ ನೀಡಿದ ಇಶಾಂತ್ ಶರ್ಮಾ (38/3) ಕೂಡಾ ಮೂರು ವಿಕೆಟುಗಳನ್ನು ಪಡೆದಿದ್ದರು.

ಈ ನಡುವೆ ಮಿಶ್ರಾ ಅವರಿಗೆ ನಾಲ್ಕನೇ ಐಪಿಎಲ್ ವಿಕೆಟ್ ಪಡೆಯುವ ಅವಕಾಶ ಮಿಸ್ ಆಗಿತ್ತು. ಪಂದ್ಯದ 12ನೇ ಓವರ್‌ನ ಎರಡನೇ ಎಸೆತದಲ್ಲಿ ಶ್ರೇಯಸ್ ಗೋಪಾಲ್ ಹೊರದಬ್ಬಿದ ಮಿಶ್ರಾ ಬಳಿಕದ ಎಸೆತದಲ್ಲಿ ಸ್ಟುವರ್ಟ್ ಬಿನ್ನಿಗೂ ಪೆವಿಲಿಯನ್ ಹಾದಿ ತೋರಿಸಿದರು.

ಇದಾದ ಬೆನ್ನಲ್ಲೇ ಕೃಷ್ಣಪ್ಪ ಗೌತಮ್‌ರನ್ನು ಔಟ್ ಮಾಡಿ ಇನ್ನೇನು ಹ್ಯಾಟ್ರಿಕ್ ಮಾಡಲಿದ್ದಾರೆ ಎನ್ನುವಷ್ಟರಲ್ಲಿ ಟ್ರೆಂಟ್ ಬೌಲ್ಟ್ ಕ್ಯಾಚ್ ಮಿಸ್ ಮಾಡುವುದರೊಂದಿಗೆ ಮಿಶ್ರಾಗೆ ಹ್ಯಾಟ್ರಿಕ್ ಮಿಸ್ ಆಯಿತು. ಕೊನೆಗೂ ಗೌತಮ್‌ರನ್ನು ಹೊರಗಟ್ಟುವಲ್ಲಿ ಯಶಸ್ವಿಯಾಗಿದ್ದರು.