ವಿರಾಟ್‌ ಕೊಹ್ಲಿ ಯಶಸ್ಸಿನ ಗುಟ್ಟು, ಕಡಿಮೆ ಸ್ನೇಹಿತರು

ಹೊಸದಿಲ್ಲಿ: ಭಾರತೀಯ ಕ್ರಿಕೆಟ್‌ ತಂಡದ ನಾಯಕನ ಪಟ್ಟಕ್ಕೇರಿರುವ ವಿರಾಟ್‌ ಕೊಹ್ಲಿ, ಮೈದಾನದಲ್ಲಷ್ಟೇ ಶಿಸ್ತಿನ ಸಿಪಾಯಿಯಲ್ಲ ಹೊರಗೂ ಶಿಸ್ತುಗಾರ.

'ಅದೃಷ್ಟಕ್ಕೆ ನನ್ನ ಆಪ್ತ ಬಳಗ ದೊಡ್ಡದಿಲ್ಲ. ಇದೇ ನನಗೆ ಪ್ಲಸ್‌ ಪಾಯಿಂಟ್‌. ಗೆಳೆಯರ ಬಳಗ ಹೆಚ್ಚಿದ್ದರೆ, ಏಕಾಗ್ರತೆಗೆ ಭಂಗ ಉಂಟಾಗುವುದು. ಸಮಯ ಪಾಲನೆ ಅಸಾಧ್ಯ,' ಎಂದು ಮಾಜಿ ಕ್ಯಾಪ್ಟನ್‌ ನಾಸೀರ್‌ ಹುಸೇನ್‌ಗೆ ನೀಡಿದ ಸಂದರ್ಶನದಲ್ಲಿ ವಿರಾಟ್‌ ಕೊಹ್ಲಿ ಹೇಳಿದ್ದಾರೆ.

2014ರ ಇಂಗ್ಲೆಂಡ್‌ ಪ್ರವಾಸದಲ್ಲಿ ನೀಡಿದ ಕಳಪೆ ಪ್ರದರ್ಶನ, ನಂತರದ ಆಸ್ಟ್ರೇಲಿಯಾ ಪ್ರವಾಸದ ನಾಲ್ಕು ಟೆಸ್ಟ್‌ ಪಂದ್ಯಗಳಲ್ಲಿ ಬಾರಿಸಿದ ಶತಕಗಳು, ಕಠಿಣ ಅಭ್ಯಾಸ, ಬದಲಾವಣೆ ಬಗ್ಗೆ ಕೊಹ್ಲಿ ಮನ ಬಿಚ್ಚಿ ಮಾತನಾಡಿದ್ದಾರೆ.

'ಇಂಗ್ಲೆಂಡ್‌ ಪ್ರವಾಸದಲ್ಲಿ ಹೆಚ್ಚು ರನ್‌ ಗಳಿಸಬೇಕೆಂಬ ಒತ್ತಡ ಹೇರಿಕೊಂಡಿದ್ದೆ. ಹೆಚ್ಚು ಸ್ಕೋರ್ ಮಾಡುವ ತವಕದಲ್ಲಿ ಬ್ಯಾಟಿಂಗ್‌ನಲ್ಲಿ ಎಡವಿದೆ,' ಎಂದಿದ್ದಾರೆ.

'ತಂತ್ರಗಾರಿಕೆ ಬಹಳ ಮುಖ್ಯ. ಅಷ್ಟೇನೂ ತಂತ್ರಗಾರಿಕೆ ಗೊತ್ತಿರದವರೂ ಸಹ ಏಕಾಗ್ರತೆಯಿಂದ ಯಶಸ್ಸು ಗಳಿಸಬಹುದು. ಇನ್‌ಸ್ವಿಂಗರ್‌ ನಿರೀಕ್ಷೆಯಲ್ಲಿರುತ್ತಿದ್ದ ನನಗೆ ಔಟ್‌ಸ್ವಿಂಗ್‌ಗೆ ತಿರುಗೇಟು ನೀಡಲು ಆಗದೆ ತಬ್ಬಿಬ್ಬಾಗುತ್ತಿದೆ. ಬದಲಾವಣೆಗಳ ಅನುಷ್ಠಾನ ಕಷ್ಟವಾಗುತ್ತಿತ್ತು,'ಎಂದಿದ್ದಾರೆ.

'ಈಗ ಬದಲಾವಣೆ ಸುಲಭವಾಗಿದೆ. ಮೊದಲಿನಂತೆ ಕಷ್ಟ ಆಗುತ್ತಿಲ್ಲ. ಪ್ರತಿ ದಿನ 3 ತಾಸು ಬ್ಯಾಟಿಂಗ್ ಮಾಡುತ್ತಿದ್ದೆ. ವಾರದ ಕೊನೆಗೆ ತೋಳು ನೋವು ಜೋರಾಗುತ್ತಿತ್ತು. 10 ದಿನ ಅಭ್ಯಾಸ ಮಾಡಿದೆ. ಗಾಲ್ಫ್‌ನಲ್ಲಿ ಯಾವುದೇ ಶೂಟ್‌ ಮಾಡುವ ಮೊದಲು 400-500 ಬಾರಿ ಅಭ್ಯಾಸ ಮಾಡಬೇಕು ಎನ್ನುತ್ತಾರೆ. ಅದೇ ರೀತಿ ಅಭ್ಯಾಸ ಮಾಡಿ, ಸರಿ ಮಾಡಿಕೊಂಡೆ,' ಎಂದಿದ್ದಾರೆ.