ಬೆಂಗಳೂರಿನಲ್ಲಿ ಉಚಿತವಾಗಿ ಮ್ಯಾಚ್‌ ನೋಡಲಿದ್ದಾರೆ 15ಸಾವಿರ ಬಡ ಮಕ್ಕಳು

ಬೆಂಗಳೂರು: ಆರ್ಥಿಕವಾಗಿ ಹಿಂದುಳಿದ 15,000 ಶಾಲಾ ಮಕ್ಕಳು ಬೆಂಗಳೂರಿನ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಮಾರ್ಚ್‌ ಮೊದಲ ವಾರದಲ್ಲಿ ನಡೆಯಲಿರುವ ಆಸ್ಟ್ರೇಲಿಯಾ -ಭಾರತ ಟೆಸ್ಟ್‌ ಪಂದ್ಯವನ್ನು ಉಚಿತವಾಗಿ ವೀಕ್ಷಿಸಲಿದ್ದಾರೆ.

ಐದು ದಿನಗಳ ಪಂದ್ಯದ ಕೊನೆಯ ಮೂರು ದಿನ (ನಿತ್ಯ) 5000 ಮಕ್ಕಳನ್ನು ಆಹ್ವಾನಿಸಲಾಗಿದೆ. ಟೆಸ್ಟ್‌ ಪಂದ್ಯದ ಮೊದಲೆರೆಡು ದಿನ (ಶನಿವಾರ ಹಾಗೂ ಭಾನುವಾರ)ಗಳ ಪಂದ್ಯದ ಟಿಕೆಟ್‌ಗಳಿಗೆ ಭಾರಿ ಬೇಡಿಕೆ ಇರುವುದರಿಂದ ಕೊನೆಯ ಮೂರು ದಿನಗಳ ಪಂದ್ಯ ಉಚಿತವಾಗಿ ವೀಕ್ಷಿಸಲು ಅವಕಾಶ ಮಾಡಿಕೊಡಲಾಗಿದೆ.

'ಇವೆಂಟ್‌ ಮ್ಯಾನೇಜ್ಮೆಂಟ್‌ ಕಂಪನಿ ಹಾಗೂ ಶಾಲೆಗಳ ಜತೆ ಸಮನ್ವಯ ನಡೆಸುವ ಎನ್‌ಜಿಓ ಜತೆ ಸಂಪರ್ಕದಲ್ಲಿದ್ದೇವೆ. ಎ ಅಪ್ಪರ್‌, ಬಿ ಅಂಡ್‌ ಸಿ ಲೋವರ್ ಸ್ಟ್ಯಾಂಡ್‌ಗಳು ಮಕ್ಕಳಿಗೆ ಮೀಸಲು,' ಎಂದು ಕೆಎಸ್‌ಸಿಎ ವಕ್ತಾರ ವಿನಯ್‌ ಮೃತ್ಯಂಜಯ ತಿಳಿಸಿದ್ದಾರೆ. ಉಚಿತವಾಗಿ ಕರೆದೊಯ್ಯುವ ಸೌಲಭ್ಯ ಜತೆಗೆ ಕೆಎಸ್‌ಸಿಎ ಉಚಿತ ಊಟ, ತಿಂಡಿ ಒದಗಿಸಲಿದೆ.

2015 ನವೆಂಬರ್‌ನಲ್ಲೂ ಬೆಂಗಳೂರಿನಲ್ಲಿ ನಡೆದ ಭಾರತ-ದಕ್ಷಿಣ ಆಫ್ರಿಕಾ ನಡುವಿನ ಪಂದ್ಯಕ್ಕೆ 25,000 ಬಡ ಮಕ್ಕಳಿಗೆ ಉಚಿತ ಪ್ರವೇಶ ಕಲ್ಪಿಸಲಾಗಿತ್ತು.