ಹೃದಯಾಘಾತದಿಂದ ಕ್ರಿಕೆಟಿಗನ ದುರ್ಮರಣ

ಮುಂಬಯಿ : ವೈಭವ್‌ ಕೇಸರ್ಕಾರ್‌ ಎಂಬ 24ರ ತರುಣ ಇದೇ ಭಾನುವಾರ ಟೆನಿಸ್‌ ಬಾಲ್‌ ಕ್ರಿಕೆಟ್‌ ಪಂದ್ಯದ ವೇಳೆ ಹೃದಯಾಘಾತಕ್ಕೀಡಾಗಿ ಕೊನೆಯುಸಿರೆಳೆದ ದಾರುಣ ಘಟನೆಯೊಂದು ಇಲ್ಲಿಗೆ ಸಮೀಪದ ಬಾಂಡುಪ್‌ನಲ್ಲಿ ನಡೆದಿದೆ.

ವೈಭವ್‌ಗೆ ಬ್ಯಾಟಿಂಗ್‌ ಮಾಡುವಾಗಲೇ ಎದೆನೋವು ಕಾಣಿಸಿಕೊಂಡಿತ್ತು. ಆದರೆ, ಅದನ್ನು ಲೆಕ್ಕಸದೇ ಆತ ಆಟ ಮುಂದುವರಿಸಿದ್ದಾರೆ. ಅದಾದ ಬಳಿಕ ಕ್ಷೇತ್ರ ರಕ್ಷಣೆಗೂ ತೆರಳಿದ್ದಾರೆ. ಆಗ ನೋವು ತೀವ್ರಗೊಂಡ ಪರಿಣಾಮ ಅಂಪೈರ್‌ಗೆ ತಿಳಿಸಿ ಪೆವಿಲಿಯನ್‌ಗೆ ವಾಪಸಾಗಿದ್ದಾರೆ.

ವೈಭವ್‌ ಡ್ರೆಸ್ಸಿಂಗ್‌ ರೂಮ್‌ನಲ್ಲಿ ನೋವಿನಿಂದ ನರಳುತ್ತಿದ್ದರು. ಅದನ್ನು ಕಂಡು ಗೆಳೆಯ ರಾಕೇಶ್‌ ಪವಾರ್‌ ವೈಭವ್‌ರನ್ನು ಸಮೀಪದ ಭಾವ್‌ಸಾರ್‌ ಮಲ್ಟಿಸ್ಪೆಷಾಲಿಟಿ ಆಸ್ಪತ್ರೆಗೆ ಕರೆದೊಯ್ದಿದ್ದಾರೆ. ಆದರೆ, ಅಲ್ಲಿ ಚಿಕಿತ್ಸೆಗೆ ಸ್ಪಂದಿಸದೆ ವೈಭವ್‌ ಕೊನೆಯುಸಿರೆಳೆದಿದ್ದಾರೆ ಎನ್ನಲಾಗಿದೆ.