ಹುಟ್ಟೂರು ರಾಂಚಿಯಲ್ಲಿ ಧೋನಿ ಕೊನೆಯ ಪಂದ್ಯ

ರಾಂಚಿ: ಪ್ರವಾಸಿ ಆಸ್ಟ್ರೇಲಿಯಾ ವಿರುದ್ಧ ಶುಕ್ರವಾರ ನಡೆಯಲಿರುವ ಮೂರನೇ ಏಕದಿನ ಪಂದ್ಯ ಅತಿ ಹೆಚ್ಚು ಮಹತ್ವವನ್ನು ಗಿಟ್ಟಿಸಿಕೊಂಡಿದೆ. ಯಾಕೆಂದರೆ ಇದು ತವರು ಮೈದಾನದಲ್ಲಿ ಧೋನಿ ಆಡಲಿರುವ ಕೊನೆಯ ಅಂತಾರಾಷ್ಟ್ರೀಯ ಪಂದ್ಯವಾಗಿದೆ.

ಜಾರ್ಖಂಡ್ ರಾಜ್ಯ ಕ್ರಿಕೆಟ್ ಸಂಸ್ಥೆಯು ಈಗಾಗಲೇ 'ಧೋನಿ ಪೆವಿಲಿಯನ್' ನಿರ್ಮಿಸಿದೆ. ಈ ಮೂಲಕ ಧೋನಿ ಕೊನೆಯ ಪಂದ್ಯಕ್ಕೆ ಭರ್ಜರಿ ಸಿದ್ಧತೆಯನ್ನೇ ನಡೆಸಿದೆ.

ರಾಂಚಿಯಲ್ಲಿ ನಡೆಯುವ ಪಂದ್ಯವನ್ನು ಗೆದ್ದರೆ ಸರಣಿ ಭಾರತದ ಕೈವಶವಾಗಲಿದೆ. ಈ ಮೂಲಕ ಮುಂಬರುವ ಏಕದಿನ ವಿಶ್ವಕಪ್‌ಗೂ ಮುನ್ನ ಶ್ರೇಷ್ಠ ಪೂರ್ವ ಸಿದ್ಧತೆಯನ್ನೇ ನಡೆಸಲಿದೆ. ಅಲ್ಲದೆ ಕೊನೆಯ ಎರಡು ಪಂದ್ಯಗಳಲ್ಲಿ ಪ್ರಯೋಗ ಮಾಡಲು ಅವಕಾಶ ದೊರಕಲಿದೆ.

ಅಂದ ಹಾಗೆ ಇದು ಸ್ವದೇಶದಲ್ಲಿ ಧೋನಿ ಅವರ ಕೊನೆಯ ಅಂತಾರಾಷ್ಟ್ರೀಯ ಸರಣಿಯನ್ನಾಗಿ ಬಿಂಬಿಸಲಾಗಿದೆ. ಇದಾದ ಬಳಿಕ ಐಪಿಎಲ್ ನಡೆಯಲಿದ್ದು, ಆಮೇಲೆ ಮೇ 30ರಂದು ಏಕದಿನ ವಿಶ್ವಕಪ್ ಇಂಗ್ಲೆಂಡ್‌ನಲ್ಲಿ ಆಯೋಜನೆಯಾಗಲಿದೆ.

37ರ ಹರೆಯದ ಧೋನಿ ಈಗಾಗಲೇ 10000ಕ್ಕೂ ಹೆಚ್ಚು ರನ್ ಗಳಿಸಿದ್ದಾರೆ. ಈಗ ವಿದಾಯದ ಅಂಚಿನಲ್ಲಿರುವ ಧೋನಿ ಮುಂಬರುವ ಏಕದಿನ ವಿಶ್ವಕಪ್‌ನಲ್ಲೂ ಮುಖ್ಯ ಪಾತ್ರ ವಹಿಸುವ ನಿರೀಕ್ಷೆಯಲ್ಲಿದ್ದಾರೆ.