'ಫಿಂಚ್ 172' ಟಿ-20 ಕ್ರಿಕೆಟ್‌ನ ಗರಿಷ್ಠ ವೈಯಕ್ತಿಕ ಮೊತ್ತ

ಹರಾರೆ: ಟ್ವೆಂಟಿ-20 ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ವೈಯಕ್ತಿಕ ಗರಿಷ್ಠ ರನ್ ಗಳಿಸಿದ ತಮ್ಮದೇ ದಾಖಲೆಯನ್ನು ಆಸ್ಟ್ರೇಲಿಯಾದ ನಾಯಕ ಆ್ಯರೋನ್ ಫಿಂಚ್ ಉತ್ತಮಪಡಿಸಿಕೊಂಡಿದ್ದಾರೆ.

ತ್ರಿಕೋನ ಟಿ-20 ಸರಣಿಯಲ್ಲಿ ಜಿಂಬಾಬ್ವೆ ವಿರುದ್ಧ ನಡೆಯುತ್ತಿರುವ ಪಂದ್ಯದಲ್ಲಿ ಫಿಂಚ್ ಅಮೋಘ ಶತಕ ಸಾಧನೆ ಮಾಡಿದ್ದಾರೆ.

ಟ್ವೆಂಟಿ-20 ಅಂತರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ 156 ರನ್ ಗಳಿಸಿರುವುದು ಇದುವರೆಗಿನ ವೈಯಕ್ತಿಕ ಶ್ರೇಷ್ಠ ಸಾಧನೆಯಾಗಿತ್ತು. ಇದೀಗ ತಮ್ಮ ಹೆಸರಲ್ಲಿರುವ ದಾಖಲೆಯನ್ನು ಫಿಂಚ್ ಉತ್ತಮಪಡಿಸಿದ್ದಾರೆ.

ಜಿಂಬಾಬ್ವೆ ವಿರುದ್ಧದ ಪಂದ್ಯದಲ್ಲಿ 76 ಎಸೆತಗಳನ್ನು ಎದುರಿಸಿದ ಫಿಂಚ್ 172 ರನ್ ಗಳಿಸಿದ್ದರು. ಕೊನೆಗೂ ಹಿಟ್ ವಿಕೆಟ್‌ಗೆ ಬಲಿಯಾದ ಆಸೀಸ್ ನಾಯಕನ ಇನ್ನಿಂಗ್ಸ್‌ನಲ್ಲಿ 16 ಬೌಂಡರಿ ಹಾಗೂ 10 ಮನಮೋಹಕ ಸಿಕ್ಸರ್‌ಗಳು ಸೇರಿದ್ದರು.


ಮಗದೊಬ್ಬ ಆರಂಭಿಕ ಡಾರ್ಸಿ ಶಾರ್ಟ್ (46) ಜತೆ ಸೇರಿದ ಫಿಂಚ್ ಮೊದಲ ವಿಕೆಟ್‌ಗೆ 19.2 ಓವರ್‌ಗಳಲ್ಲೇ ದಾಖಲೆಯ 223 ರನ್‌ಗಳ ಜತೆಯಾಟವನ್ನು ನೀಡಿದ್ದರು. ಇದು ಟಿ-20 ಅಂತರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಮೊದಲ ಹಾಗೂ ಯಾವುದೇ ವಿಕೆಟ್‌ಗೆ ದಾಖಲಾದ ದಾಖಲೆಯ ಜತೆಯಾಟವಾಗಿದೆ. ಹಾಗೆಯೇ ಇದೇ ಮೊದಲ ಬಾರಿಗೆ ಟ್ವೆಂಟಿ-20 ಕ್ರಿಕೆಟ್‌ನಲ್ಲಿ 200ಕ್ಕೂ ಹೆಚ್ಚು ರನ್‌ಗಳ ಜತೆಯಾಟ ದಾಖಲಾಗಿದೆ.

ಪಾಕಿಸ್ತಾನ ವಿರುದ್ಧದ ಪಂದ್ಯದಲ್ಲೂ ಅಜೇಯ ಅರ್ಧಶತಕ ಬಾರಿಸಿದ ಫಿಂಚ್, ಆಸೀಸ್ ಗೆಲುವಿನಲ್ಲಿ ನಿರ್ಣಾಯಕ ಪಾತ್ರ ವಹಿಸಿದ್ದರು.

ಟಿ-20 ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಗರಿಷ್ಠ ವೈಯಕ್ತಿಕ ಮೊತ್ತ:

1. ಆ್ಯರೋನ್ ಫಿಂಚ್, ರನ್: 172, ವಿರುದ್ಧ: ಜಿಂಬ್ವಾಬೆ, ಸ್ಥಳ: ಹರಾರೆ, ವರ್ಷ: 2018
2. ಆ್ಯರೋನ್ ಫಿಂಚ್, ರನ್: 156, ವಿರುದ್ಧ: ಇಂಗ್ಲೆಂಡ್, ಸ್ಥಳ: ಸೌಂಥಪ್ಟನ್, ವರ್ಷ: 2013
3. ಗ್ಲೆನ್ ಮ್ಯಾಕ್ಸ್‌ವೆಲ್, ರನ್: 145*, ವಿರುದ್ಧ: ಶ್ರೀಲಂಕಾ, ಸ್ಥಳ: ಪಲ್ಲೀಕೆಲೆ, ವರ್ಷ: 2016
4. ಎವಿನ್ ಲೆವಿಸ್, ರನ್: 125*, ವಿರುದ್ಧ: ಭಾರತ, ಸ್ಥಳ: ಕಿಂಗ್‌ಸ್ಟನ್, ವರ್ಷ: 2017
5. ಶೇನ್ ವಾಟ್ಸನ್, ರನ್: 124*, ವಿರುದ್ಧ: ಭಾರತ, ಸ್ಥಳ: ಸಿಡ್ನಿ, ವರ್ಷ: 2016