ಕೊಡುಗೆ ಸೊನ್ನೆ, ಸಂಭಾವನೆ ರೂ. 11 ಲಕ್ಷ!

ಲಂಡನ್‌: ಲಾರ್ಡ್ಸ್ ಟೆಸ್ಟ್‌ನಲ್ಲಿ ಭಾರತದ ವಿರುದ್ಧ ಇಂಗ್ಲೆಂಡ್‌ ತಂಡ ಇನಿಂಗ್ಸ್‌ ಮತ್ತು 159 ರನ್‌ಗಳ ಭರ್ಜರಿ ಜಯ ದಾಖಲಿತು. ಆದರೆ, ಆತಿಥೇಯರ ಗೆಲುವಿಗಿಂತಲೂ ತಂಡದಲ್ಲಿದ್ದ ಲೆಗ್‌ ಸ್ಪಿನ್ನರ್‌ ಆದಿಲ್‌ ರಶೀದ್‌ ಹೆಚ್ಚು ಸುದ್ದಿಯಾಗಿದ್ದಾರೆ.

ಪಂದ್ಯದಲ್ಲಿ ಇಂಗ್ಲೆಂಡ್‌ ತಂಡದ ಆಡುವ 11ರ ಬಳಗದಲ್ಲಿ ಏಕೈಕ ಸ್ಪೆಷಲಿಸ್ಟ್‌ ಸ್ಪಿನ್ನರ್‌ ಆಗಿ ಕಣಕ್ಕಿಳಿದಿದ್ದ ಆದಿಲ್‌ ರಶೀದ್‌, ಒಂದು ಎಸೆತವನ್ನೂ ಬೌಲ್‌ ಮಾಡದೆ, ಬ್ಯಾಟಿಂಗ್‌ ಕೂಡ ಆಡದೆ, ಕ್ಯಾಚನ್ನೂ ಹಿಡಿಯದೆ, ರನ್‌ಔಟ್‌ ಮಾಡುವಲ್ಲಿಯೂ ನೆರವಾಗದೆ ತಂಡದ ಗೆಲುವಿನಲ್ಲಿ ಕಿಂಚಿತ್ತೂ ಕೊಡುಗೆ ಸಲ್ಲಿಸದ ಕುಖ್ಯಾತಿಗೆ ಗುರಿಯಾಗಿದ್ದಾರೆ.

ಜತೆಗೆ ಇಂಗ್ಲೆಂಡ್‌ ಮತ್ತು ವೇಲ್ಸ್‌ ಕ್ರಿಕೆಟ್‌ ಮಂಡಳಿ ನೀಡುವ ಪಂದ್ಯದ ಸಂಭಾವನೆ ಮೊತ್ತ ಒಟ್ಟಾರೆ 11 ಲಕ್ಷ ರೂ. ರಶೀದ್‌ ಖಾತೆ ಸೇರಿದೆ. ಈ ರೀತಿ ಕಿಂಚಿತ್ತೂ ಕೊಡುಗೆ ಸಲ್ಲಿಸದಿದ್ದರೂ, ರಶೀದ್‌ 11 ಲಕ್ಷ ರೂ. ಸಂಭಾವನೆ ಪಡೆದಿರುವ ಸುದ್ದಿ ಸಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗಿದೆ.

ಆಡುವ 11ರಲ್ಲಿದ್ದು ತಂಡದ ಗೆಲುವಿನಲ್ಲಿ ಕಿಂಚಿತ್ತೂ ಕೊಡುಗೆ ಸಲ್ಲಿಸದವರ ಸಾರ್ವಕಾಲಿಕ ಪಟ್ಟಿಯಲ್ಲಿ ರಶೀದ್‌ 14ನೇ ಆಟಗಾರ ಎನಿಸಿದ್ದು, 13 ವರ್ಷಗಳ ಬಳಿಕ ಇಂಗ್ಲೆಂಡ್‌ನ ಮೊದಲ ಆಟಗಾರನಾಗಿದ್ದಾರೆ. ಈ ಹಿಂದೆ 2005ರಲ್ಲಿ ಲಾರ್ಡ್ಸ್ನಲ್ಲೇ ನಡೆದ ಬಾಂಗ್ಲಾದೇಶ ವಿರುದ್ಧದ ಟೆಸ್ಟ್‌ ಪಂದ್ಯದಲ್ಲಿ ಇಂಗ್ಲೆಂಡ್‌ ತಂಡದ ಆಫ್‌ ಸ್ಪಿನ್ನರ್‌ ಗ್ಯಾರತ್‌ ಬ್ಯಾಟಿ ಇಂಥದ್ದೇ ಕುಖ್ಯಾತಿಗೆ ಒಳಗಾಗಿದ್ದರು. ಈ ಪಂದ್ಯದಲ್ಲಿ ಇಂಗ್ಲೆಂಡ್‌ ಇನಿಂಗ್ಸ್‌ ಮತ್ತು 261 ರನ್‌ಗಳ ಜಯ ದಾಖಲಿಸಿತ್ತು.

ರಶೀದ್‌, ಎಜ್‌ಬಾಸ್ಟನ್‌ ಟೆಸ್ಟ್‌ನಲ್ಲಿ ಕ್ರಮವಾಗಿ 13 ಮತ್ತು 16 ರನ್‌ಗಳ ಕಾಣಿಕೆ ನೀಡಿ, ಬೌಲಿಂಗ್‌ನಲ್ಲಿ 40ಕ್ಕೆ 3 ವಿಕೆಟ್‌ ಪಡೆದಿದ್ದರು. ಇಂಗ್ಲೆಂಡ್‌, ಭಾರತದ ವಿರುದ್ಧ 31 ರನ್‌ಗಳಿಂದ ಗೆದ್ದಿತ್ತು.