ವಿದಾಯ ಪಂದ್ಯಕ್ಕೆ ಕುಕ್ ಶತಕದ ಸಹಿ

ಲಂಡನ್‌: ಮಾಜಿ ನಾಯಕ ಅಲಸ್ಟೈರ್‌ ಕುಕ್‌ ಹಾಗೂ ಹಾಲಿ ನಾಯಕ ಜೋ ರೂಟ್‌ ದ್ವಯರ ತಲಾ ಶತಕ ಹಾಗೂ 3ನೇ ವಿಕೆಟ್‌ಗೆ ಈ ಜೋಡಿ ಕಲೆಹಾಕಿದ 259 ರನ್‌ಗಳ ನೆರವಿನಿಂದ ಆತಿಥೇಯ ಇಂಗ್ಲೆಂಡ್‌ ತಂಡ ಭಾರತ ತಂಡದ ವಿರುದ್ಧದ 5ನೇ ಹಾಗೂ ಕೊನೆಯ ಟೆಸ್ಟ್‌ನ 2ನೇ ಇನಿಂಗ್ಸ್‌ನಲ್ಲಿ ಭರ್ಜರಿ ಮೊತ್ತ (8ಕ್ಕೆ 423 ಡಿಕ್ಲೇರ್ಡ್‌) ಕೂಡಿಹಾಕಿದೆ.

ಇಲ್ಲಿನ ಕೆನಿಂಗ್ಟನ್‌ ಓವಲ್‌ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಪಂದ್ಯದ ನಾಲ್ಕನೇ ದಿನವಾದ ಸೋಮವಾರ 2ಕ್ಕೆ 114 ರನ್‌ಗಳಿಂದ ಆಟ ಮುಂದುವರಿಸಿದ ಇಂಗ್ಲೆಂಡ್‌ಗೆ ಕುಕ್‌ ಮತ್ತು ರೂಟ್‌ ಆನೆಬಲ ನೀಡಿದರು. ಪಂದ್ಯ ಮುಕ್ತಾಯಕ್ಕೆ ಮುನ್ನಾ ದಿನ ಹೆಚ್ಚೂಕಡಿಮೆ 50 ಓವರ್‌ಗಳ ಆಟದಲ್ಲಿ ಇವರಿಬ್ಬರ ಜುಗಲ್ಬಂದಿಯದ್ದೇ ಪಾರುಪತ್ಯ. ಭಾರತೀಯ ಬೌಲರ್‌ಗಳು ಏನೇ ಸರ್ಕಸ್‌ ಮಾಡಿದರೂ ಜೋಡಿ ಬೇರ್ಪಡಲಿಲ್ಲ. ಕೊನೆಗೂ ಜತೆಯಾಟ ಮುರಿಯಲು 'ಹನುಮ' ಬರಬೇಕಾಯಿತು. ಪದಾರ್ಪಣೆ ಪಂದ್ಯ ಆಡುತ್ತಿರುವ ಹನುಮ ವಿಹಾರಿಯ ಎಸೆತವನ್ನು ಸ್ಲಾಗ್‌ಸ್ವೀಪ್‌ ಮಾಡಲು ಯತ್ನಿಸಿದ ರೂಟ್‌ (125 ರನ್‌, 12 ಫೋರ್‌, 1 ಸಿಕ್ಸರ್‌) ಬದಲಿ ಫೀಲ್ಡರ್‌ ಪಾಂಡ್ಯಗೆ ಕ್ಯಾಚಿತ್ತು ನಿರ್ಗಮಿಸಿದರು. ಆಗ ತಂಡದ ಮೊತ್ತ 3ಕ್ಕೆ 321. ಹನುಮ ಮರು ಎಸೆತದಲ್ಲೇ ಕುಕ್‌ (147 ರನ್‌, 14 ಫೋರ್‌) ವಿಕೆಟ್‌ ಕೂಡ ಪಡೆದರು. ಪದಾರ್ಪಣೆ ಪಂದ್ಯದಲ್ಲೇ ಎದುರಾಳಿ ತಂಡದ ನಾಯಕ ಹಾಗೂ ಮಾಜಿ ನಾಯಕರಿಬ್ಬರನ್ನು ಬಲಿ ಪಡೆದ ಹೆಗ್ಗಳಿಕೆ ವಿಹಾರಿಯದಾಯಿತು.

ದಿಗ್ಗಜರಿಬ್ಬರ ನಿರ್ಗಮನದ ಬಳಿಕ ಆತಿಥೇಯರ ಆರ್ಭಟ ತಣ್ಣಗಾಯಿತು. 4 ವಿಕೆಟ್‌ ನಷ್ಟಕ್ಕೆ 321 ರನ್‌ ಗಳಿಸಿದ್ದ ಇಂಗ್ಲೆಂಡ್‌ ಆ ಮೊತ್ತಕ್ಕೆ 102 ರನ್‌ ಸೇರಿಸುವಷ್ಟರಲ್ಲಿ ಮತ್ತೆ 4 ವಿಕೆಟ್‌ ಕಳೆದುಕೊಂಡಿತು. ಆದರೂ, ಒಟ್ಟಾರೆ 463 ರನ್‌ಗಳ ಮುನ್ನಡೆ ದೊರಕಿತು. ಆ ಹಿನ್ನೆಲೆಯಲ್ಲಿ ರೂಟ್‌ ಪಡೆ ಇನಿಂಗ್ಸ್‌ ಡಿಕ್ಲೇರ್‌ ಮಾಡಿಕೊಂಡಿತು.

ಕುಕ್‌ ದಿ ಬೆಸ್ಟ್‌

ಇಂಗ್ಲೆಂಡ್‌ ಪರ ಅತಿ ಹೆಚ್ಚು ಟೆಸ್ಟ್‌ (161) ಆಡಿ, 33 ಶತಕ ಸೇರಿದಂತೆ ಅತಿ ಹೆಚ್ಚು ರನ್‌ (12472) ಗಳಿಸಿದ ಖ್ಯಾತಿಗೆ ಭಾಜನರಾಗಿರುವ ಕುಕ್‌ ಸೋಮವಾರ ತಮ್ಮ ದಾಖಲೆಗಳ ಕಿರೀಟಕ್ಕೆ ಮಗದೊಂದು ಗರಿ ಸಿಕ್ಕಿಸಿಕೊಂಡರು. ವಿದಾಯದ ಟೆಸ್ಟ್‌ನಲ್ಲಿ ಶತಕ ಸಿಡಿಸಿದ ಇಂಗ್ಲೆಂಡ್‌ನ ಮೊತ್ತಮೊದಲ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾದರು. ಜತೆಗೆ, ಪದಾರ್ಪಣೆ ಟೆಸ್ಟ್‌ ಹಾಗೂ ವಿದಾಯದ ಪಂದ್ಯಗಳೆರಡರಲ್ಲೂ ಶತಕ ಬಾರಿಸಿದ ಕ್ರಿಕೆಟ್‌ ಜಗತ್ತಿನ 5ನೇ ಆಟಗಾರನೆಂಬ ಹೆಚ್ಚುಗಾರಿಕೆಯೂ ಅವರದಾಯಿತು. ಟೆಸ್ಟ್‌ ಮಾದರಿಯಲ್ಲಿ ಅತೀ ಹೆಚ್ಚು ರನ್‌ ಗಳಿಸಿದವರ ಪಟ್ಟಿಯಲ್ಲೀಗ ಕುಕ್‌ಗೆ 5ನೇ ಸ್ಥಾನ. ಸಚಿನ್‌ ತೆಂಡೂಲ್ಕರ್‌ (15,921), ರಿಕಿ ಪಾಂಟಿಂಗ್‌ (13,378), ಜಾಕ್ಸ್‌ ಕಾಲಿಸ್‌ (13,289), ರಾಹುಲ್‌ ದ್ರಾವಿಡ್‌ (13,288)ಮೊದಲ ನಾಲ್ವರು.