ದ್ವಿತೀಯ ಟೆಸ್ಟ್‌: ದಕ್ಷಿಣ ಆಫ್ರಿಕಾ 269/ | ಟೀಮ್‌ ಇಂಡಿಯಾ ವೇಗಿಗಳ ನೀರಸ ಬೌಲಿಂಗ್‌
ಸೆಂಚೂರಿಯನ್‌: ಆಡುವ ಬಳಗದ ಆಯ್ಕೆಯಲ್ಲಿ ಗೊಂದಲ ಮಾಡಿಕೊಂಡ ಭಾರತ ದ್ವಿತೀಯ ಟೆಸ್ಟ್‌ನ ಮೊದಲ ದಿನವೇ ಇದಕ್ಕೆ ಭಾರಿ ಬೆಲೆ ತೆರುವಂತಾಯಿತು.
ಸೂಪರ್‌ ಸ್ಪೋರ್ಟ್‌ ಪಾರ್ಕ್‌ನಲ್ಲಿ ಶನಿವಾರ ಆರಂಭಗೊಂಡ ಪಂದ್ಯದ ಮೊದಲ ದಿನ ಭಾರತದ ವೇಗಿಗಳ ಸತ್ವರಹಿತ ದಾಳಿಯ ಲಾಭವೆತ್ತಿದ ದಕ್ಷಿಣ ಆಫ್ರಿಕಾ, ತನ್ನ ಪ್ರಥಮ ಇನಿಂಗ್ಸ್‌ನಲ್ಲಿ 90 ಓವರ್‌ಗಳಲ್ಲಿ 6 ವಿಕೆಟ್‌ಗೆ 269 ರನ್‌ ಕಲೆ ಹಾಕಿತು.
ಟಾಸ್‌ ಗೆದ್ದು ಬ್ಯಾಟಿಂಗ್‌ ಆಯ್ದುಕೊಂಡ ದಕ್ಷಿಣ ಆಫ್ರಿಕಾ ಆರಂಭಿಕರಾದ ಡೀನ್‌ ಎಲ್ಗರ್‌ ಮತ್ತು ಏಡನ್‌ ಮರ್ಕ್ರಮ್‌ ಮೊದಲ ವಿಕೆಟ್‌ಗೆ 85 ರನ್‌ ಸೇರಿಸಿ ಉತ್ತಮ ಅಡಿಪಾಯ ಹಾಕಿಕೊಟ್ಟರು. ಪ್ರಥಮ ಟೆಸ್ಟ್‌ನಲ್ಲಿ ಮೊದಲ ಇನಿಂಗ್ಸ್‌ನಲ್ಲಿ ಹರಿಣಗಳ ಅಗ್ರ ಕ್ರಮಾಂಕವನ್ನು ಧ್ವಂಸಗೊಳಿಸಿದ್ದ ಭುವನೇಶ್ವರ್‌ ಕುಮಾರ್‌ ಅವರ ಅನುಪಸ್ಥಿತಿಯನ್ನು ಆಫ್ರಿಕಾ ಓಪನರ್‌ಗಳು ಸಮರ್ಥವಾಗಿ ಬಳಸಿಕೊಂಡರು. ಮರ್ಕ್ರಮ್‌ 94ಕ್ಕೆ ಔಟಾಗಿ ಶತಕ ವಂಚಿತರಾದರೆ, 3ನೇ ಕ್ರಮಾಂಕದಲ್ಲಿ ಕ್ರೀಸ್‌ಗಿಳಿದ ಹಶೀಮ್‌ ಆಮ್ಲಾ(82)ಗೂ ಶತಕ ಕೈತಪ್ಪಿತು.
ವೇಗದ ಬೌಲರ್‌ಗಳ ಸ್ವರ್ಗ ಎಂದೇ ಬಿಂಬಿತವಾಗಿರುವ ಪಿಚ್‌ನಲ್ಲಿ ಮೊದಲ ದಿನ ಮಿಂಚಿದ್ದು ಆಫ್‌ಸ್ಪಿನ್ನರ್‌ ಆರ್‌.ಅಶ್ವಿನ್‌. ವೇಗಿಗಳ ವೈಫಲ್ಯದ ಮಧ್ಯೆ ಕರಾರುವಾಕ್‌ ದಾಳಿ ನಡೆಸಿದ ಅಶ್ವಿನ್‌(90ಕ್ಕೆ3), ಎಲ್ಗರ್‌, ಮರ್ಕ್ರಮ್‌ ಮತ್ತು ಡಿ'ಕಾಕ್‌ ವಿಕೆಟ್‌ ಕಬಳಿಸಿದರು.
ದಿನದ ಕೊನೆಯಲ್ಲಿ ಭಾರತ ತಿರುಗೇಟು
80 ಓವರ್‌ಗಳ ಅಂತ್ಯಕ್ಕೆ 245 ರನ್‌ಗಳಿಗೆ ಕೇವಲ 3 ವಿಕೆಟ್‌ ಒಪ್ಪಿಸಿ ಸುಸ್ಥಿತಿಯಲ್ಲಿದ್ದ ಹರಿಣ ಪಡೆ, ದಿನದಾಟದ ಮುಕ್ತಾಯಕ್ಕೆ 6 ವಿಕೆಟ್‌ ಕಳೆದುಕೊಂಡಿತು. ದಿನದ ಕೊನೆಯಲ್ಲಿ ಭಾರತದ ತಿರುಗೇಟಿಗೆ ಕಾರಣವಾಗಿದ್ದು ಆಲ್‌ರೌಂಡರ್‌ ಹಾರ್ದಿಕ್‌ ಪಾಂಡ್ಯ ಅವರ ಮಿಂಚಿನ ಕ್ಷೇತ್ರರಕ್ಷ ಣೆ. ಶತಕದ ಹೊಸ್ತಿಲಲ್ಲಿದ್ದ ಆಮ್ಲಾರನ್ನು ತಮ್ಮದೇ ಬೌಲಿಂಗ್‌ನಲ್ಲಿ ಡೈರೆಕ್ಟ್ ಹಿಟ್‌ ಮೂಲಕ ರನ್‌ಔಟ್‌ ಮಾಡಿದ ಪಾಂಡ್ಯ, ನಂತರ ವಿಕೆಟ್‌ ಕೀಪರ್‌ ಪಾರ್ಥಿವ್‌ ಪಟೇಲ್‌ ನೆರವಿನೊಂದಿಗೆ ಫಿಲ್ಯಾಂಡರ್‌ ಅವರನ್ನು ರನ್‌ಔಟ್‌ ಮಾಡಿದರು.
ಭುವಿಗೆ ಕೊಕ್‌, ಕ್ರಿಕೆಟ್‌ ಪ್ರಿಯರಿಗೆ ಶಾಕ್‌!
ಭಾರತ ತಂಡ ಈ ಪಂದ್ಯಕ್ಕೆ ಮೂರು ಬದಲಾವಣೆಗಳೊಂದಿಗೆ ಕಣಕ್ಕಿಳಿಯಿತು. ಶಿಖರ್‌ ಧವನ್‌ ಬದಲು ರಾಹುಲ್‌ ಹಾಗೂ ಗಾಯಾಳು ವಿಕೆಟ್‌ ಕೀಪರ್‌ ವೃದ್ಧಿಮಾನ್‌ ಸಹಾ ಬದಲು ಪಾರ್ಥಿವ್‌ ಪಟೇಲ್‌ಗೆ ಅವಕಾಶ ನೀಡಿದ್ದು ಸಮಯೋಚಿತ ನಿರ್ಧಾರ.
ಆದರೆ ಪ್ರಥಮ ಟೆಸ್ಟ್‌ನಲ್ಲಿ 8 ವಿಕೆಟ್‌ ಹಾಗೂ ಪ್ರಮುಖ ಬ್ಯಾಟ್ಸ್‌ಮನ್‌ಗಳಿಗಿಂತ ಹೆಚ್ಚು ಎಸೆತ(127)ಗಳನ್ನು ಎದುರಿಸಿ ಮಿಂಚಿದ್ದ ಸ್ವಿಂಗ್‌ ಸುಲ್ತಾನ್‌ ಭುವನೇಶ್ವರ್‌ ಕುಮಾರ್‌ಗೆ ಕೊಕ್‌ ನೀಡಿ ವೇಗಿ ಇಶಾಂತ್‌ ಶರ್ಮಾರನ್ನು ಆಡಿಸಿದ್ದು ಅಚ್ಚರಿ ಮೂಡಿಸಿತು. ಇದರ ವಿರುದ್ಧ ವೀಕ್ಷ ಕ ವಿವರಣೆ ವೇಳೆಯೇ ಕಿಡಿ ಕಾರಿದ ಮಾಜಿ ಕ್ರಿಕೆಟಿಗ ಸುನಿಲ್‌ ಗವಾಸ್ಕರ್‌, ''ಪ್ರಥಮ ಟೆಸ್ಟ್‌ನ ಮೊದಲ ದಿನವೇ 3 ವಿಕೆಟ್‌ ಪಡೆದಿದ್ದ ಭುವನೇಶ್ವರ್‌ ಸ್ಥಾನದಲ್ಲಿ ಇಶಾಂತ್‌ ಏಕೆ ಬಂದರೋ ಅರ್ಥವಾಗುತ್ತಿಲ್ಲ. ಶಮಿ ಅಥವಾ ಬುಮ್ರಾ ಸ್ಥಾನದಲ್ಲಿ ಇಶಾಂತ್‌ ಕಾಣಿಸಿಕೊಳ್ಳಬೇಕಿತ್ತು. ಭುವಿಯನ್ನು ಹೊರಗಿಟ್ಟದ್ದು ಯಾವ ಕಾರಣಕ್ಕೆ ಎಂಬುದೇ ಅರ್ಥವಾಗುತ್ತಿಲ್ಲ,'' ಎಂದು ಆಕ್ರೋಶ ವ್ಯಕ್ತಪಡಿಸಿದರು. ಮಾಜಿ ಕ್ರಿಕೆಟಿಗರಾದ ವಿವಿಎಸ್‌ ಲಕ್ಷ ್ಮಣ್‌, ಆರ್‌.ಪಿ ಸಿಂಗ್‌, ದಕ್ಷಿಣ ಆಫ್ರಿಕಾದ ಮಾಜಿ ವೇಗಿ ಅಲನ್‌ ಡೊನಾಲ್ಡ್‌ ಕೂಡ ಟ್ವೀಟ್‌ ಮೂಲಕ ಅಸಮಾಧಾನ ಹೊರ ಹಾಕಿದ್ದಾರೆ.
ಸ್ಕೋರ್‌ ವಿವರ
ದಕ್ಷಿಣ ಆಫ್ರಿಕಾ: ಪ್ರಥಮ ಇನಿಂಗ್ಸ್‌ 269/6 (90)
ಡೀನ್‌ ಎಲ್ಗರ್‌ ಸಿ ವಿಜಯ್‌ ಬಿ ಅಶ್ವಿನ್‌ 31
ಏಡನ್‌ ಮರ್ಕ್ರಮ್‌ ಸಿ ಪಟೇಲ್‌ ಬಿ ಅಶ್ವಿನ್‌ 94
ಹಶೀಮ್‌ ಆಮ್ಲಾ ರನ್‌ಔಟ್‌ 82
ಎಬಿ ಡಿ'ವಿಲಿಯರ್ಸ್‌ ಬಿ ಇಶಾಂತ್‌ 20
ಫಾಫ್‌ ಡು'ಪ್ಲೆಸಿಸ್‌ ಔಟಾಗದೆ 25
ಕ್ವಿಂಟನ್‌ ಡಿ'ಕಾಕ್‌ ಸಿ ಕೊಹ್ಲಿ ಬಿ ಅಶ್ವಿನ್‌ 00
ವೆರ್ನನ್‌ ಫಿಲ್ಯಾಂಡರ್‌ ರನ್‌ಔಟ್‌ 00
ಕೇಶವ್‌ ಮಹಾರಾಜ್‌ ಔಟಾಗದೆ 10
ಇತರೆ: (ಲೆಗ್‌ಬೈ-7, ನೋಬಾಲ್‌-1) 07
ವಿಕೆಟ್‌ ಪತನ: 1-85, 2-148, 3-199, 4-246, 5-250, 6-251.
ಬೌಲಿಂಗ್‌ ವಿವರ
ಜಸ್‌ಪ್ರೀತ್‌ ಬುಮ್ರಾ 18 4 57 0
ಮೊಹಮ್ಮದ್‌ ಶಮಿ 11 2 46 0
ಇಶಾಂತ್‌ ಶರ್ಮಾ 16 3 32 1
ಹಾರ್ದಿಕ್‌ ಪಾಂಡ್ಯ 14 4 37 0
ಆರ್‌.ಅಶ್ವಿನ್‌ 31 8 90 3
ಕೊಹ್ಲಿ ತಪ್ಪಿಗೆ ವಿಶಿಷ್ಠ ಟ್ವೀಟ್‌!
ಪ್ರಥಮ ಟೆಸ್ಟ್‌ನ ಪ್ರಥಮ ದಿನ ಟೀಮ್‌ ಇಂಡಿಯಾ ನಾಯಕ ವಿರಾಟ್‌ ಕೊಹ್ಲಿ ಮೂರು ತಪ್ಪು ನಿರ್ಧಾರಗಳನ್ನು ತೆಗೆದುಕೊಂಡರು ಎಂದು ಟ್ವಿಟರ್‌ನಲ್ಲಿ ಬಿಸಿಬಿಸಿ ಚರ್ಚೆಯಾಯಿತು. ರೋಹಿತ್‌ ಮತ್ತು ರಹಾನೆ ಅವರ ನಡುವಿನ ಸ್ಪರ್ಧೆಯಲ್ಲಿ ಮತ್ತೆ ರೋಹಿತ್‌ಗೆ ಮಣೆ ಹಾಕಿದ್ದು, ಭುವವೇಶ್ವರ್‌ ಕುಮಾರ್‌ ಅವರನ್ನು ಕೈಬಿಟ್ಟು ಇಶಾಂತ್‌ ಶರ್ಮಾರನ್ನು ಆಡಿಸಿದ್ದು ಹಾಗೂ ಟಾಸ್‌ ವೇಳೆ ಹೆಡ್ಸ್‌ ಆಯ್ಕೆ ಮಾಡಿ ಟಾಸ್‌ ಸೋತದ್ದನ್ನು ಕ್ರಿಕೆಟ್‌ ಪ್ರಿಯರೊಬ್ಬರು ವಿಶಿಷ್ಠವಾಗಿ ಟ್ವೀಟ್‌ ಮಾಡಿ ಗಮನ ಸೆಳೆದರು.