ಏಷ್ಯಾ ಕಪ್; ಪಾಕ್ ಚಚ್ಚಿದ ಭಾರತ ಫೈನಲ್‌ಗೆ

ಕೌಲಾಲಂಪುರ: ಮಹಿಳಾ ಏಷ್ಯಾ ಕಪ್ 2018 ಟ್ವೆಂಟಿ-20 ಕ್ರಿಕೆಟ್ ಚಾಂಪಿಯನ್‌ಶಿಪ್‌ನಲ್ಲಿ ಕೊನೆಯ ಲೀಗ್ ಪಂದ್ಯದಲ್ಲಿ ಸಂಪ್ರದಾಯಿಕ ಬದ್ಧ ವೈರಿ ಪಾಕಿಸ್ತಾನ ತಂಡವನ್ನು ಏಳು ವಿಕೆಟುಗಳ ಅಂತರದಿಂದ ಚಚ್ಚಿರುವ ಭಾರತ ಮಹಿಳಾ ತಂಡವು ಫೈನಲ್‌ಗೆ ಲಗ್ಗೆಯಿಟ್ಟಿದೆ.

ಗೆಲ್ಲಲೇಬೇಕಾದ ಕೊನೆಯ ಲೀಗ್ ಪಂದ್ಯದಲ್ಲಿ ಅಮೋಘ ನಿರ್ವಹಣೆ ಭಾರತೀಯ ಬೌಲರ್‌ಗಳು ಪಾಕ್ ತಂಡವನ್ನು ಅಲ್ಪ ಮೊತ್ತಕ್ಕೆ ಕಟ್ಟಿ ಹಾಕಿತ್ತು. ಪರಿಣಾಮ ಏಳು ವಿಕೆಟ್ ನಷ್ಟಕ್ಕೆ 72 ರನ್‌ ಗಳಿಸಲಷ್ಟೇ ಶಕ್ತವಾಗಿತ್ತು. ಭಾರತದ ಪರ 13 ರನ್ ತೆತ್ತು ಮೂರು ವಿಕೆಟುಗಳನ್ನು ಕಬಲಿಸಿದ ಏಕ್ತಾ ಬಿಶ್ತ್ ಮಿಂಚಿದರು.

ಬಳಿಕ ರನ್ ಬೆನ್ನತ್ತಿದ ಭಾರತಕ್ಕೆ ಆರಂಭದಲ್ಲೇ ಮಿಥಾಲಿ ರಾಜ್ (0) ಹಾಗೂ ದೀಪ್ತಿ ಶರ್ಮಾ (0) ವಿಕೆಟುಗಳು ನಷ್ಟವಾದರೂ ಸ್ಮೃತಿ ಮಂಧಾನಾ (38) ಹಾಗೂ ನಾಯಕಿ ಹರ್ಮನನ್ ಪ್ರೀತ್ ಕೌರ್ (34*) ಸಮಯೋಚಿತ ಆಟಗಳ ನೆರವಿನಿಂದ 16.1 ಓವರ್‌ಗಳಲ್ಲೇ ಮೂರು ವಿಕೆಟ್ ನಷ್ಟಕ್ಕೆ ಗೆಲುವಿನ ಗುರಿ ತಲುಪಿತು.

ಈ ಗೆಲುವಿನೊಂದಿಗೆ ಆಡಿರುವ ಐದು ಪಂದ್ಯಗಳಲ್ಲಿ ನಾಲ್ಕು ಜಯ ಹಾಗೂ ಸೋಲಿನೊಂದಿಗೆ ಒಟ್ಟು ಎಂಟು ಅಂಕಗಳನ್ನು ಸಂಪಾದಿಸಿರುವ ಭಾರತ ಫೈನಲ್‌ಗೆ ಲಗ್ಗೆಯಿಟ್ಟಿದೆ.