ಅಂತಾರಾಷ್ಟ್ರೀಯ ಟಿ20 ಕ್ರಿಕೆಟ್‌ ಇತಿಹಾಸದಲ್ಲಿ ಅತ್ಯಂತ ದುಬಾರಿ ಬೌಲರ್‌ ಎನಿಸಿದ ಲಂಕಾದ ವೇಗಿ!

ಅಡಿಲೇಡ್‌: ಆತಿಥೇಯ ಆಸ್ಟ್ರೇಲಿಯಾ ವಿರುದ್ಧ ಇಲ್ಲಿನ ಓವಲ್‌ ಕ್ರೀಡಾಂಗಣದಲ್ಲಿ ಭಾನುವಾರ ನಡೆದ ಅಂತಾರಾಷ್ಟ್ರೀಯ ಟಿ20 ಕ್ರಿಕೆಟ್‌ ಸರಣಿಯ ಮೊದಲ ಹಣಾಹಣಿಯಲ್ಲಿ ಪ್ರವಾಸಿ ಶ್ರೀಲಂಕಾ ತಂಡದ ವೇಗದ ಬೌಲರ್‌ ಕಸುನ್‌ ರಜಿತ ಅನಗತ್ಯ ದಾಖಲೆಯೊಂದನ್ನು ತಮ್ಮದಾಗಿಸಿಕೊಂಡಿದ್ದಾರೆ.

ಪಂದ್ಯದಲ್ಲಿ ಟಾಸ್‌ ಸೋತು ಮೊದಲು ಬ್ಯಾಟ್‌ ಮಾಡಿದ ಆಸ್ಟ್ರೇಲಿಯಾ ತಂಡ ತನ್ನ ಪಾಲಿನ 20 ಓವರ್‌ಗಳಲ್ಲಿ 2 ವಿಕೆಟ್‌ಗೆ 233 ರನ್‌ಗಳ ಬೃಹತ್‌ ಮೊತ್ತ ದಾಖಲಿಸಿತು. ಬಳಿಕ ಗುರಿ ಬೆನ್ನತ್ತಿದ ಶ್ರೀಲಂಕಾ ಕಿಂಚಿತ್ತೂ ಕೂಡ ಹೋರಾಟ ನೀಡದೆ 20 ಓವರ್‌ಗಳಲ್ಲಿ ಆಲ್‌ಔಟ್‌ ಆಗದೇ ಉಳಿದಿದ್ದೇ ಹೆಚ್ಚು ಎನ್ನುವ ರೀತಿಯಲ್ಲಿ 9 ವಿಕೆಟ್‌ಗೆ 99 ರನ್‌ಗಳನ್ನು ಮಾತ್ರವೇ ಗಳಿಸಲು ಶಕ್ತವಾಯಿತು. 134 ರನ್‌ಗಳ ಜಯ ಆಸೀಸ್‌ಗೆ ಟಿ20 ಕ್ರಿಕೆಟ್‌ನಲ್ಲಿ ಲಭ್ಯವಾದ ಬಹುದೊಡ್ಡ ಗೆಲುವಾಗಿದೆ.

ಬರ್ತ್‌ಡೇ ಬಾಯ್‌ ವಾರ್ನರ್‌ ಸಿಡಿಲಬ್ಬರದ ಶತಕ, ಲಂಕಾ ಪಡೆಯನ್ನು ಹೊಸಕಿ ಹಾಕಿದ ಆಸೀಸ್‌!

ಆಸೀಸ್‌ ಬ್ಯಾಟ್ಸ್‌ಮನ್‌ಗಳ ಅಬ್ಬರದ ಎದುರು ಕೊಚ್ಚಿ ಹೋದ ಲಂಕಾ ಬೌಲರ್‌ಗಳ ಪೈಕಿ ಯುವಿ ಕಸುನ್‌ ರಜಿತ ಅತ್ಯಂತ ದುಬಾರಿ ಬೌಲರ್‌ ಎನಿಸಿಕೊಂಡರು. ಬಲಗೈ ಮಧ್ಯಮ ವೇಗಿ ನಾಲ್ಕು ಓವರ್‌ಗಳನ್ನು ಎಸೆದು ಯಾವುದೇ ವಿಕೆಟ್‌ ಪಡೆಯಲು ಸಾಧ್ಯವಾಗದೆ ಬರೋಬ್ಬರಿ 75 ರನ್‌ಗಳನ್ನು ಬಿಟ್ಟುಕೊಟ್ಟ ತಮಗೆ ಬೇಕಿಲ್ಲದ ದಾಖಲೆ ಮುಡಿಗೇರಿಸಿಕೊಂಡಿದ್ದಾರೆ.

ಇದಕ್ಕೂ ಮುನ್ನ ಈ ದಾಖಲೆ ಟರ್ಕಿ ತಂಡದ ತುನಾಹಾನ್‌ ತುರಾನ್‌ ಅವರ ಹೆಸರಲ್ಲಿತ್ತು. ಇದೇ ವರ್ಷ ಆಗಸ್ಟ್‌ನಲ್ಲಿ ನಡೆದ ಜೆಕ್‌ ಗಣರಾಜ್ಯ ವಿರುದ್ಧದ ಪಂದ್ಯದಲ್ಲಿ ತುರಾನ್‌ ಒಟ್ಟು 70 ರನ್‌ಗಳನ್ನು ಬಿಟ್ಟುಕೊಟ್ಟಿದ್ದರು.

ಬೆಳಕಿನ ಹಬ್ಬ ದೀಪಾವಳಿಗೆ ಸೋಷಿಯಲ್‌ ಮೀಡಿಯಾದಲ್ಲಿ ಶುಭಕೋರಿದ ವಿದೇಶಿ ಕ್ರಿಕೆಟಿಗರು

ಆಸೀಸ್‌ ವಿರುದ್ಧದ 3 ಪಂದ್ಯಗಳ ಸರಣಿಯ ಮೊದಲ ಹಣಾಹಣಿಯಲ್ಲಿ ತಮ್ಮ ಮೊದಲ ಓವರ್‌ನಲ್ಲೇ 11 ರನ್‌ಗಳನ್ನು ಬಿಟ್ಟುಕೊಟ್ಟ ಕಸುನ್‌ ರಜಿತ, ಬಳಿಕ ಎರಡನೇ ಓವರ್ನಲ್ಲಿ 21 ರನ್‌ಗಳನ್ನು ಚಚ್ಚಿಸಿಕೊಂಡರು. 26 ವರ್ಷದ ವೇಗಿ ತಮ್ಮ ಮೂರನೇ ಓವರ್‌ನಲ್ಲಿ 25 ರನ್‌ಗಳನ್ನು ಬಿಟ್ಟುಕೊಟ್ಟರೆ, ನಾಲ್ಕನೇ ಹಾಗೂ ಅಂತಿಮ ಓವರ್‌ನಲ್ಲಿ 18 ರನ್‌ಗಳನ್ನು ನೀಡಿದರು.

ತಮ್ಮ 33ನೇ ಜನ್ಮದಿನದಂದು ಭರ್ಜರಿ ಬ್ಯಾಟಿಂಗ್‌ ನಡೆಸಿದ ಆಸ್ಟ್ರೇಲಿಯಾ ತಂಡದ ಎಡಗೈ ಆರಂಭಿಕ ಬ್ಯಾಟ್ಸ್‌ಮನ್‌ ಡೇವಿಡ್‌ ವಾರ್ನರ್‌, 56 ಎಸೆತಗಳಲ್ಲಿ 100 ರನ್‌ ಬಾರಿಸಿ ತಂಡಕ್ಕೆ 20 ಓವರ್‌ಗಳಲ್ಲಿ 233/2 ರನ್‌ಗಳ ಬೃಹತ್‌ ಮೊತ್ತ ತಂದುಕೊಟ್ಟರು. ಇದು ವಾರ್ನರ್‌ಗಳಿಸಿದ ಚೊಚ್ಚಲ ಟಿ20-ಐ ಶತಕವಾಗಿದೆ. ಅಂತಾರಾಷ್ಟ್ರೀಯ ಟಿ20 ಕ್ರಿಕೆಟ್‌ ವೃತ್ತಿ ಬದುಕಿನಲ್ಲಿ 71ನೇ ಇನಿಂಗ್ಸ್‌ ಬಳಿಕ ಮೂರಂಕಿಯ ರನ್‌ ಗಳಿಸಿದ್ದಾರೆ.

ಟೀಮ್‌ ಇಂಡಿಯಾ ವೇಗಿಗಳ ಸಾಮರ್ಥ್ಯದ ಬಗ್ಗೆ ಕಾಮೆಂಟ್‌ ಮಾಡಿದ ಆಸೀಸ್‌ನ ಮಾಜಿ ನಾಯಕ!

ಸಂಕ್ಷಿಪ್ತ ಸ್ಕೋರ್‌
ಆಸ್ಟ್ರೇಲಿಯಾ: 20 ಓವರ್‌ಗಳಲ್ಲಿ 2 ವಿಕೆಟ್‌ಗೆ 233 (ಡೇವಿಡ್‌ ವಾರ್ನರ್‌ 100*, ಆರೊನ್‌ ಫಿಂಚ್‌ 64, ಗ್ಲೆನ್‌ ಮ್ಯಾಕ್ಸ್‌ವೆಲ್‌ 62; ಲಕ್ಷಣ್‌ ಸಂದಕನ್‌ 41ಕ್ಕೆ 1, ದಸುನ್‌ ಶನಕ 10ಕ್ಕೆ 1).
ಶ್ರೀಲಂಕಾ: 20 ಓವರ್‌ಗಳಲ್ಲಿ 9 ವಿಕೆಟ್‌ಗೆ 99 (ಕುಶಲ್‌ ಪೆರೆರಾ 16, ದಸುನ್‌ ಶನಕ 17, ಲಸಿತ್‌ ಮಾಲಿಂಗ ಔಟಾಗದೆ 13; ಆಡಮ್‌ ಝಾಂಪ 14ಕ್ಕೆ 3, ಮಿಚೆಲ್‌ ಸ್ಟಾರ್ಕ್‌ 18ಕ್ಕೆ 2, ಪ್ಯಾಟ್‌ ಕಮಿನ್ಸ್‌ 27ಕ್ಕೆ 2, ಆಷ್ಟನ್‌ ಅಗರ್‌ 13ಕ್ಕೆ 1).