ಆಸ್ಪ್ರೇಲಿಯಾ ವಿರುದ್ಧದ ಸರಣಿಗೆ ಇಂದು ಭಾರತ ತಂಡದ ಆಯ್ಕೆ

ವಿಶ್ವಕಪ್‌ ಸಂಭವನೀಯರ ಪಟ್ಟಿಗೂ ಆದ್ಯತೆæ|ಖಲೀಲ್‌ ವರ್ಸಸ್‌ ಉನಾದ್ಕಟ್‌|ಕಾರ್ತಿಕ್‌ ವರ್ಸಸ್‌ ಪಂತ್‌
ಮುಂಬಯಿ: ಆಸ್ಪ್ರೇಲಿಯಾ ವಿರುದ್ಧದ ಸೀಮಿತ ಓವರ್‌ಗಳ ಎರಡು ಸರಣಿಗಳಿಗೆ ಭಾರತ ತಂಡಗಳ ಆಯ್ಕೆಗಾಗಿ ಇಂದು ರಾಷ್ಟ್ರೀಯ ಆಯ್ಕೆ ಸಮಿತಿ ಸಭೆ ಸೇರಲಿದೆ. ಈ ಸಂದರ್ಭದಲ್ಲಿ, ಮುಂಬರುವ ಏಕದಿನ ವಿಶ್ವಕಪ್‌ನಲ್ಲಿ ಪಾಲ್ಗೊಳ್ಳಲಿರುವ ಭಾರತೀಯ ಬಳಗಕ್ಕೆ ಅಗತ್ಯವಿರುವ ಕೆಲವು ಸ್ಥಾನಗಳ ಭರ್ತಿಗೂ ಆಯ್ಕೆಗಾರರು ಮಹತ್ವ ನೀಡಲಿದ್ದಾರೆ. ವಿಶ್ವಕಪ್‌ ತಂಡದಲ್ಲಿ ಸ್ಥಾನ ಗಿಟ್ಟಿಸುವ ಹಾದಿಯಲ್ಲಿ ಶುಕ್ರವಾರದ ಆಯ್ಕೆ ವೇಳೆ ಎಡಗೈ ವೇಗಿಗಳಾದ ಜಯದೇವ್‌ ಉನಾದ್ಕಟ್‌ ಮತ್ತು ಖಲೀಲ್‌ ಅಹ್ಮದ್‌ ನಡುವೆ ತೀವ್ರ ಸ್ಪರ್ಧೆ ಏರ್ಪಡುವ ಸಾಧ್ಯತೆಗಳಿವೆ.

ಭಾರತ ತಂಡ ಇದೇ ಫೆಬ್ರವರಿ 24ರಿಂದ ಪ್ರವಾಸಿ ಆಸ್ಪ್ರೇಲಿಯಾ ತಂಡದ ವಿರುದ್ಧ 2 ಪಂದ್ಯಗಳ ಟಿ20 ಸರಣಿ ಹಾಗೂ 5 ಪಂದ್ಯಗಳ ಏಕದಿನ ಸರಣಿಗಳನ್ನು ಆಡಲಿದೆ. ವಿಶ್ವಕಪ್‌ಗೆ ಮುನ್ನ ಭಾರತ ತಂಡ ಆಡುವ ಕೊನೆಯ ಅಂತಾರಾಷ್ಟ್ರೀಯ ಸರಣಿಗಳಿವು. ಮೇ 30ರಂದು ಇಂಗ್ಲೆಂಡ್‌ನಲ್ಲಿ ವಿಶ್ವಕಪ್‌ ಆರಂಭಗೊಳ್ಳಲಿದೆ.

ತಜ್ಞ ಬ್ಯಾಟ್ಸ್‌ಮನ್‌ ಮತ್ತು 2ನೇ ವಿಕೆಟ್‌ಕೀಪರ್‌ ಆಗಿ ರಿಷಭ್‌ ಪಂತ್‌ ಮತ್ತು ದಿನೇಶ್‌ ಕಾರ್ತಿಕ್‌ ನಡುವೆ ಯಾರು ಹೀಥ್ರೊ (ಲಂಡನ್‌) ವಿಮಾನವೇರಲಿದ್ದಾರೆ ಎಂಬುದಕ್ಕೂ ಆಸ್ಪ್ರೇಲಿಯಾ ಸರಣಿ ದಿಕ್ಸೂಚಿಯಾಗಲಿದೆ.

ರಾಹುಲ್‌ಗೆ ಅವಕಾಶ ಸಾಧ್ಯತೆ
ಇಂಗ್ಲೆಂಡ್‌ ಲಯನ್ಸ್‌ ವಿರುದ್ಧದ ಎರಡು ಅನಧಿಕೃತ ಟೆಸ್ಟ್‌ಗಳಲ್ಲಿ ಉತ್ತಮ ಪ್ರದರ್ಶನ ನೀಡಿರುವ ಕೆ.ಎಲ್‌.ರಾಹುಲ್‌ ವಿಶ್ವಕಪ್‌ ತಂಡದಲ್ಲಿ 3ನೇ ಆರಂಭಿಕ ಆಟಗಾರನಾಗಿ ಸ್ಥಾನ ಗಿಟ್ಟಿಸುವ ಸಾಧ್ಯತೆಗಳಿವೆ.

ಈಗಾಗಲೇ ವಿಶ್ವಕಪ್‌ ಸಂಭವನೀಯರ ಪಟ್ಟಿಯಲ್ಲಿರುವ ಆಟಗಾರರು : ವಿರಾಟ್‌ ಕೊಹ್ಲಿ, ಶಿಖರ್‌ ಧವನ್‌, ರೋಹಿತ್‌ ಶರ್ಮಾ, ಅಂಬಾಟಿ ರಾಯುಡು, ಮಹೇಂದ್ರ ಸಿಂಗ್‌ ಧೋನಿ, ಕೇದಾರ್‌ ಜಾಧವ್‌, ಹಾರ್ದಿಕ್‌ ಪಾಂಡ್ಯ, ವಿಜಯ್‌ ಶಂಕರ್‌, ಯುಜ್ವೇಂದ್ರ ಚಹಾಲ್‌, ಕುಲ್ದೀಪ್‌ ಯಾದವ್‌, ಭುವನೇಶ್ವರ್‌ ಕುಮಾರ್‌, ಜಸ್‌ಪ್ರೀತ್‌ ಬುಮ್ರಾ ಮತ್ತು ಮೊಹಮ್ಮದ್‌ ಶಮಿ. ಒಟ್ಟು 16 ಅಥವಾ 17 ಆಟಗಾರರು ವಿಶ್ವಕಪ್‌ ಬಳಗದಲ್ಲಿರಲಿದ್ದಾರೆ ಎನ್ನಲಾಗಿದೆ.