ಚೆಂಡು ವಿರೂಪ ಸೂತ್ರಧಾರರಾದ ಸ್ಮಿತ್‌, ವಾರ್ನರ್‌, ಬೆನ್‌ ಕ್ರಾಫ್ಟ್‌ ಅಮಾನತು

ಕೇಪ್ ಟೌನ್: ದಕ್ಷಿಣ ಆಫ್ರಿಕಾ ವಿರುದ್ಧದ ಮೂರನೇ ಟೆಸ್ಟ್ ಪಂದ್ಯದಲ್ಲಿ ಆಸ್ಟ್ರೇಲಿಯಾ ಆಟಗಾರರು ಚೆಂಡು ವಿರೂಪಗೊಳಿಸಿದ್ದು ಜಗಜ್ಜಾಹೀರಾಗಿದ್ದು, ನಾಯಕ ಸ್ಟೀವ್ ಸ್ಮಿತ್‌, ಡೇವಿಡ್‌ ವಾರ್ನರ್‌, ಬೆನ್‌ ಕ್ರಾಫ್ಟ್‌ ಇದರಲ್ಲಿ ಭಾಗಿಯಾಗಿದ್ದಾರೆ. ಅವರನ್ನು ಅಮಾನತುಗೊಳಿಸಲಾಗಿದೆ ಎಂದು ಕ್ರಿಕೆಟ್‌ ಆಸ್ಟ್ರೇಲಿಯಾ ಸ್ಪಷ್ಟಪಡಿಸಿದೆ.

ಕೇಪ್‌ಟೌನ್‌ನಲ್ಲಿ ನಡೆದ ಸುದ್ದಿಗೋಷ್ಠಿಯಲ್ಲಿ ಕ್ರಿಕೆಟ್‌ ಆಸ್ಟ್ರೇಲಿಯಾ ಮುಖ್ಯ ಕಾರ್ಯ ನಿರ್ವಹಣಾಧಿಕಾರಿ ಜೇಮ್ಸ್‌ ಸುಥರ್‌ಲ್ಯಾಂಡ್‌ ಮಾಹಿತಿ ನೀಡಿದರು.

ಈ ಮೂವರನ್ನು ತಕ್ಷಣದಿಂದ ಜಾರಿಗೆ ಬರುವಂತೆ ಅಮಾನತುಗೊಳಿಸಲಾಗಿದೆ. ಹೀಗಾಗಿ ಈ ಮೂವರು ನಾಲ್ಕನೇ ಟೆಸ್ಟ್‌ ಪಂದ್ಯಕ್ಕೆ ಲಭ್ಯರಿರುವುದಿಲ್ಲ ಎಂದು ಅವರು ಸ್ಪಷ್ಟಪಡಿಸಿದರು.

ತಂಡದ ಕೋಚ್‌ ಲೆಹ್‌ಮನ್‌ಗೆ ಕ್ಲೀನ್‌ ಚಿಟ್‌ ನೀಡಲಾಗಿದೆ. ಅವರು ಕೋಚ್‌ ಆಗಿ ಮುಂದುವರಿಯಲಿದ್ದಾರೆ ಎಂದು ಜೇಮ್ಸ್‌ ತಿಳಿಸಿದ್ದಾರೆ.

ಮ್ಯಾಥ್ಯೂ ರೇನ್‌ಶಾ, ಜೋ ಬರ್ನ್ಸ್‌, ಗ್ಲೆನ್‌ ಮ್ಯಾಕ್ಸ್‌ವೆಲ್‌ ಈ ಮೂವರ ಸ್ಥಾನವನ್ನು ತುಂಬಲಿದ್ದಾರೆ.

ಈ ಮೂವರಿಗೆ ಬಿಟ್ಟರೆ ಉಳಿದವರಿಗೆ ಚೆಂಡು ವಿರೂಪಗೊಳಿಸಿರುವುದು ಗೊತ್ತಿಲ್ಲ. ಈ ಕುರಿತು ತನಿಖೆ ನಡೆಸಲು ಸಮಿತ ರಚಿಸಲಾಗುವುದು ಎಂದು ಜೇಮ್ಸ್‌ ಸುಥರ್‌ಲ್ಯಾಂಡ್‌ ತಿಳಿಸಿದ್ದಾರೆ.

ಡೇವಿಡ್ ವಾರ್ನರ್, ತಂಡದ ವಾಟ್ಸಪ್ ಗುಂಪಿನಿಂದಲೂ ಹೊರ ಬಂದಿದ್ದಾರೆ. ಅಲ್ಲದೆ ಪ್ರಕರಣದ ತನಿಖೆ ನಡೆಸುತ್ತಿರುವ ಕ್ರಿಕೆಟ್ ಆಸ್ಟ್ರೇಲಿಯಾ, ವಾರ್ನರ್ ಹಾಗೂ ಸ್ಮಿತ್ ಮೇಲೆ ಒಂದು ವರ್ಷದ ನಿಷೇಧವನ್ನು ಹೇರುವ ಸಾಧ್ಯತೆಯಿದೆ.