ಕೊಲಂಬೊ: ಆತಿಥೇಯ ಶ್ರೀಲಂಕಾ ತಂಡವನ್ನು 4 ವಿಕೆಟ್‌ಗಳಿಂದ ಮಣಿಸುವ ಮೂಲಕ ತನ್ನ 100ನೇ ಟೆಸ್ಟ್‌ ಪಂದ್ಯದಲ್ಲಿ ಬಾಂಗ್ಲಾದೇಶ ತಂಡ ಐತಿಹಾಸಿಕ ಸಾಧನೆ ಮಾಡಿದೆ.
ಇಲ್ಲಿನ ಪಿ ಸಾರಾ ಓವಲ್‌ ಮೈದಾನದಲ್ಲಿ ಭಾನುವಾರ ಅಂತ್ಯಗೊಂಡ ಪಂದ್ಯ ಬಾಂಗ್ಲಾದೇಶ ಪಾಲಿಗೆ ಸ್ಮರಣೀಯವಾಗಿತ್ತು. ಮೊದಲ ಟೆಸ್ಟ್‌ನಲ್ಲಿ ಸೋಲುಂಡಿದ್ದ ಪ್ರವಾಸಿ ಪಡೆ, ಸರಣಿಯ 2ನೇ ಹಾಗೂ ತನ್ನ 100ನೇ ಟೆಸ್ಟ್‌ ಪಂದ್ಯದಲ್ಲಿ ಅಮೋಘ ಜಯ ದಾಖಲಿಸಿತು.
8 ವಿಕೆಟ್‌ಗೆ 268 ರನ್‌ಗಳಿಂದ 5ನೇ ಹಾಗೂ ಅಂತಿಮ ದಿನದಾಟ ಮುಂದುವರಿಸಿದ ಶ್ರೀಲಂಕಾ ತನ್ನ 2ನೇ ಇನಿಂಗ್ಸ್‌ನಲ್ಲಿ 319 ರನ್‌ಗಳಿಗೆ ಆಲ್‌ಔಟಾಯಿತು. ದಿಲ್ರುವಾನ್‌ ಪೆರೆರಾ(50) ಅರ್ಧಶತಕ ದಾಖಲಿಸಿದರೆ, ಸುರಂಗ ಲಕ್ಮಲ್‌ 42 ರನ್‌ ಗಳಿಸಿದರು.
ಮೊದಲ ಇನಿಂಗ್ಸ್‌ನಲ್ಲಿ 129 ರನ್‌ಗಳ ಮುನ್ನಡೆ ಪಡೆದಿದ್ದ ಬಾಂಗ್ಲಾದೇಶ 191 ರನ್‌ಗಳ ಗೆಲುವನಿ ಗುರಿ ಪಡೆಯಿತು. ಈ ಸವಾಲನ್ನು ಬೆನ್ನಟ್ಟಿದ ಪ್ರವಾಸಿ ತಂಡ 57.5 ಓವರ್‌ಗಳಲ್ಲಿ 6 ವಿಕೆಟ್‌ ಕಳೆದುಕೊಂಡು ಜಯಭೇರಿ ಬಾರಿಸಿತು. ಆರಂಭಿಕ ಬ್ಯಾಟ್ಸ್‌ಮನ್‌ ತಮೀಮ್‌ ಇಕ್ಬಾಲ್‌ 125 ಎಸೆತಗಳಲ್ಲಿ 82 ರನ್‌ ಗಳಿಸಿ ಜಯದ ರೂವಾರಿಯಾಗಿ ಕಂಗೊಳಿಸಿದರು. ಒಂದು ಹಂತದಲ್ಲಿ 22 ರನ್‌ಗಳಿಗೆ 2 ವಿಕೆಟ್‌ ಕಳೆದುಕೊಂಡು ತಂಡ ಸೋಲಿನತ್ತ ಮುಖ ಮಾಡಿದ್ದಾಗ ಶಬ್ಬೀರ್‌ ರಹ್ಮಾನ್‌(41) ಜತೆ 3ನೇ ವಿಕೆಟ್‌ಗೆ 109 ರನ್‌ ಸೇರಿಸಿ ತಂಡ ಗೆಲುವಿನ ದಡ ಮುಟ್ಟುವಲ್ಲಿ ನಿರ್ಣಾಯಕ ಪಾತ್ರ ವಹಿಸಿದರು.
ಸಂಕ್ಷಿಪ್ತ ಸ್ಕೋರ್‌
ಶ್ರೀಲಂಕಾ: 338 ಮತ್ತು 2ನೇ ಇನಿಂಗ್ಸ್‌ 113.2 ಓವರ್‌ಗಳಲ್ಲಿ 319 ((ದಿಮುತ್‌ ಕರುಣಾರತ್ನೆ 126, ದಿಲ್ರುವಾನ್‌ ಪೆರೆರಾ 50, ಸುರಂಗ ಲಕ್ಮಲ್‌ 42; ಶಾಕಿಬ್‌ ಅಲ್‌ ಹಸನ್‌ 74ಕ್ಕೆ4, ಮುಸ್ತಾಫಿಜುರ್‌ ರಹ್ಮಾನ್‌ 78ಕ್ಕೆ3)
ಬಾಂಗ್ಲಾದೇಶ: 467 ಮತ್ತು 2ನೇ ಇನಿಂಗ್ಸ್‌ 57.5 ಓವರ್‌ಗಳಲ್ಲಿ 191/6 (ತಮೀಮ್‌ ಇಕ್ಬಾಲ್‌ 82, ಶಬ್ಬೀರ್‌ ರಹ್ಮಾನ್‌ 41, ಮುಷ್ಫಿಕರ್‌ ರಹೀಂ 22*; ದಿಲ್ರುವಾನ್‌ ಪೆರೆರಾ 59ಕ್ಕೆ3, ರಂಗನ ಹೆರತ್‌ 75ಕ್ಕೆ3)