ನ್ಯೂಜಿಲೆಂಡ್ ಚರ್ಚ್ ದಾಳಿಯಿಂದ ಬಾಂಗ್ಲಾ ಆಟಗಾರರು ಪಾರು; ಪಂದ್ಯ ರದ್ದು

ಕ್ರೈಸ್ಟ್ ಚರ್ಚ್: ನ್ಯೂಜಿಲೆಂಡ್ ಮಸೀದಿಯೊಂದಕ್ಕೆ ಬಂದೂಕುದಾರಿಗಳು ನಡೆಸಿದ ದಾಳಿಯ ವೇಳೆ ಬಾಂಗ್ಲಾದೇಶ ಕ್ರಿಕೆಟಿಗರು ಕೂದಲೆಳೆಯ ಅಂತರದಲ್ಲಿ ಪಾರಾಗಿರುವ ಘಟನೆ ನಡೆದಿದೆ.

ಇದರಿಂದ ಸಂಭವಿಸಬಹುದಾದ ಮಹಾ ದುರಂತವೊಂದು ತಪ್ಪಿದೆ. ಶುಕ್ರವಾರ ನಡೆದ ದಾಳಿಯ ವೇಳೆ ಬಾಂಗ್ಲಾದೇಶ ಬಹುತೇಕ ಕ್ರಿಕೆಟಿಗರು ಮಸೀದಿಗೆ ಪ್ರಾರ್ಥನೆ ಸಲ್ಲಿಸಲು ತೆರಳಿದ್ದರು ಎಂದು ಬಾಂಗ್ಲಾ ಕ್ರಿಕೆಟ್ ವಕ್ತಾರ ಜಲಾಲ್ ಯೂನಸ್ ತಿಳಿಸಿದ್ದಾರೆ.

ನಾವೆಲ್ಲರೂ ಸುರಕ್ಷಿತರಾಗಿದ್ದೇವೆ. ಆದರೆ ಮಾನಸಿಕ ಆಘಾತವುಂಟಾಗಿದೆ. ನಾವೆಲ್ಲರೂ ಹೋಟೆಲ್ ಕೊಠಡಿಯಲ್ಲೇ ಉಳಿದುಕೊಳ್ಳಲು ಸೂಚಿಸಲಾಗಿದೆ ಎಂದು ಯೂನಸ್ ತಿಳಿಸಿದ್ದಾರೆ.

ಶೂಟರ್‌ಗಳಿಂದ ತಂಡದೆಲ್ಲ ಆಟಗಾರರು ಸುರಕ್ಷಿತವಾಗಿದ್ದಾರೆ. ಬೆಚ್ಚಿ ಬೀಳಿಸುವ ಅನುಭವ. ನಮಗಾಗಿ ಪ್ರಾರ್ಥಿಸಿ ಎಂದು ಕಿವೀಸ್ ಪ್ರವಾಸದಲ್ಲಿರುವ ಹಿರಿಯ ಕ್ರಿಕೆಟಿಗ ತಮೀಮ್ ಇಕ್ಬಾಲ್ ಖಾನ್ ಟ್ವೀಟ್ ಮಾಡಿದ್ದಾರೆ.

ಘಟನೆಯ ಹಿನ್ನಲೆಯಲ್ಲಿ ಬಾಂಗ್ಲಾದೇಶ ಹಾಗೂ ನ್ಯೂಜಿಲೆಂಡ್ ನಡುವಣ ಮೂರನೇ ಟೆಸ್ಟ್ ಪಂದ್ಯವನ್ನು ರದ್ದುಪಡಿಸಲಾಗಿದೆ. ಈಗ ನಗರದ್ಯಾಂತ ಕಟ್ಟೆಚ್ಚರ ವಹಿಸಲಾಗಿದ್ದು, ಪೊಲೀಸರು ಬಿಗು ಭದ್ರತೆಯನ್ನು ಒದಗಿಸುತ್ತಿದ್ದಾರೆ.
ಇತ್ತಂಡಗಳ ಆಟಗಾರರು ಸುರಕ್ಷಿತವಾಗಿದ್ದಾರೆ.
ದಾಳಿ ನಡೆಯುವ ವೇಳೆ ಆಟಗಾರರು ಮಸೀದಿಯ ಒಳಗಿರಲಿಲ್ಲ. ಇದರಿಂದಾಗಿ ಅಪಾಯದಿಂದ ಪಾರುವಂತಾಗಿದೆ ಎಂದು ಮಾಧ್ಯಮಗಳು ವರದಿ ಮಾಡಿದೆ.