ಬಾವ್ನೆ ಶತಕ, ಮಯಾಂಕ್ 90: ಮಂಡಳಿ ಅಧ್ಯಕ್ಷರ ಇಲೆವೆನ್‌ಗೆ ಮೊದಲ ದಿನದ ಗೌರವ

ವಡೋದರಾ: ಭಾರತ ವಿರುದ್ಧ ನಡೆಯಲಿರುವ ಎರಡು ಪಂದ್ಯಗಳ ಟೆಸ್ಟ್ ಸರಣಿಗೂ ಮುನ್ನ ಪ್ರವಾಸಿ ವೆಸ್ಟ್ಇಂಡೀಸ್ ತಂಡವು ಮಂಡಳಿ ಅಧ್ಯಕ್ಷರ ಇಲೆವೆನ್ ವಿರುದ್ಧ ಎರಡು ದಿನಗಳ ಅಭ್ಯಾಸ ಪಂದ್ಯದಲ್ಲಿ ಭಾಗವಹಿಸುತ್ತಿದೆ.

ಇದರಂತೆ ಮೊದಲು ಬ್ಯಾಟಿಂಗ್ ನಡೆಸಿರುವ ಮಂಡಳಿ ಅಧ್ಯಕ್ಷರ ಬಳಗ ಅಂಕಿತ್ ಬಾವ್ನೆ ಅಜೇಯ ಶತಕ (116*) ಮತ್ತು ಮಯಾಂಕ್ ಅಗರ್ವಾಲ್ (90) ಹಾಗೂ ಶ್ರೇಯಸ್ ಅಯ್ಯರ್ (61) ಅವರ ಅರ್ಧಶಕದ ನೆರವಿನೊಂದಿಗೆ ಮೊದಲ ದಿನದಂತ್ಯಕ್ಕೆ ನಿಗದಿತ 90 ಓವರ್‌ಗಳಲ್ಲಿ ಆರು ವಿಕೆಟ್ ನಷ್ಟಕ್ಕೆ 360 ರನ್ ಗಳಿಸಿದೆ.

ಭಾರತ ತಂಡದ ಕರೆ ನಿರೀಕ್ಷೆಯಲ್ಲಿರುವ ಪೃಥ್ವಿ ಶಾ (8) ಹಾಗೂ ಹನುಮ ವಿಹಾರಿ (3) ನಿರಾಸೆ ಮೂಡಿಸಿದರು. ನಾಯಕ ಕರುಣ್ ನಾಯರ್ (29) ಬ್ಯಾಟ್ ಕೂಡಾ ಸದ್ದು ಮಾಡಲಿಲ್ಲ.

ಇನ್ನೊಂದೆಡೆ ಆಕರ್ಷಕ ಇನ್ನಿಂಗ್ಸ್ ಕಟ್ಟಿದ ಮಯಾಂಕ್ ಕೇವಲ 10 ರನ್ ಅಂತರದಿಂದ ಶತಕ ಮಿಸ್ ಮಾಡಿಕೊಂಡರು. 111 ಎಸೆತಗಳನ್ನು ಎದುರಿಸಿದ ಮಯಾಂಕ್ 14 ಬೌಂಡರಿ ಹಾಗೂ ಎರಡು ಸಿಕ್ಸರ್ ನೆರವಿನಿಂದ 90 ರನ್ ಗಳಿಸಿದರು.

ಅತ್ತ ಶ್ರೇಯಸ್ ಅಯ್ಯರ್ ಕೂಡಾ ಆಕರ್ಷಕ ಅರ್ಧಶತಕ (61) ಬಾರಿಸುವ ಮೂಲಕ ಗಮನ ಸೆಳೆದರು. ಇವೆಲ್ಲದರ ನಡುವೆ ಕೆಳ ಮಧ್ಯಮ ಕ್ರಮಾಂಕದಲ್ಲಿ ಭರ್ಜರಿ ಬ್ಯಾಟಿಂಗ್ ಪ್ರದರ್ಶನ ನೀಡಿದ ಅಂಕಿತ್ ಬಾವ್ನೆ (116*) ಆಕರ್ಷಕ ಶತಕದ ಮೂಲಕ ಆಯ್ಕೆ ಸಮಿತಿಯ ಗಮನ ಸೆಳೆದರು.

191 ಎಸೆತಗಳನ್ನು ಎದುರಿಸಿದ ಬಾವ್ನೆ 15 ಬೌಂಡರಿಗಳ ನೆರವಿನಿಂದ 116 ರನ್ ಗಳಿಸಿ ಅಜೇಯರಾಗುಳಿದರು. ಇನ್ನುಳಿದಂತೆ ಸಮಿತ್ ಪಟೇಲ್ (15) ಹಾಗೂ ಜಲಜ್ ಸಕ್ಸೆನಾ (18*) ರನ್ ಗಳಿಸಿದರು. ವಿಂಡೀಸ್ ಪರ ದೇವೇಂದ್ರ ಬಿಶೂ ಮೂರು ಶಾನನ್ ಗ್ಯಾಬ್ರಿಯಲ್ ಎರಡು ಮತ್ತು ಶೆರ್ಮನ್ ಲೆವಿಸ್ ಒಂದು ವಿಕೆಟನ್ನು ಪಡೆದರು.