ಹಾರ್ದಿಕ್, ರಾಹುಲ್‌ಗೆ ತಲಾ 20 ಲಕ್ಷ ರೂ. ದಂಡ

ಹೊಸದಿಲ್ಲಿ: ಜನಪ್ರಿಯ ವಾಹಿನಿಯೊಂದರ ಕಾರ್ಯಕ್ರಮದಲ್ಲಿ ಮಹಿಳೆಯರ ಕುರಿತು ಅವಹೇಳನಕಾರಿ ಹೇಳಿಕೆ ನೀಡಿದ್ದ ಕ್ರಿಕೆಟಿಗರಾದ ಹಾರ್ದಿಕ್ ಪಾಂಡ್ಯ ಮತ್ತು ಕೆ ಎಲ್ ರಾಹುಲ್‌ಗೆ ಬಿಸಿಸಿಐ ಒಂಬುಡ್ಸ್‌ಮನ್ ಡಿ ಕೆ ಜೈನ್ ಶನಿವಾರ ತಲಾ 20 ಲಕ್ಷ ರೂ. ದಂಡ ವಿಧಿಸಿದ್ದಾರೆ.

ಬಿಸಿಸಿಐ ಈ ಕುರಿತು ಅಧಿಕೃತ ಹೇಳಿಕೆ ನೀಡಿದ್ದು, ದಂಡ ವಿಧಿಸಿರುವುದು ಬಿಟ್ಟರೆ ಇನ್ನು ಬೇರಾವುದೇ ಕ್ರಮ ಇರುವುದಿಲ್ಲ.

ಪಾಂಡ್ಯ ಮತ್ತು ರಾಹುಲ್‌ಗೆ ಈಗಾಗಲೇ ಒಮ್ಮೆ ಅಮಾನತು ಮತ್ತು ಇಬ್ಬರೂ ಬೇಷರತ್ ಕ್ಷಮೆ ಯಾಚಿಸಿದ್ದಾರೆ. ಹೀಗಾಗಿ ಮತ್ತೆ ಅವರಿಗೆ ಹೆಚ್ಚುವರಿ ಶಿಕ್ಷೆಯಿರುವುದಿಲ್ಲ.

ದಂಡದ ಮೊತ್ತದಲ್ಲಿ ಭಾರತ್ ಕೆ ವೀರ್ ಮೂಲಕ ಕರ್ತವ್ಯದಲ್ಲಿರುವಾಗಲೇ ಹುತಾತ್ಮರಾದ ಪ್ಯಾರಾ ಮಿಲಿಟಿರಿ ಪಡೆಯ 10 ಮಂದಿ ಯೋಧರ ಪತ್ನಿಗೆ ತಲಾ 1 ಲಕ್ಷ ರೂ. ನೆರವು ನೀಡಬೇಕು. ಮತ್ತು ಕ್ರಿಕೆಟ್ ಅಸೋಶಿಯೇಷನ್ ಫಾರ್ ದಿ ಬ್ಲೈಂಡ್‌ನಲ್ಲಿ 10 ಲಕ್ಷ ರೂ. ಠೇವಣಿ ಇರಿಸಬೇಕು ಎಂದು ಒಂಬುಡ್ಸ್‌ಮನ್ ಜೈನ್ ಸೂಚನೆ ನೀಡಿದ್ದಾರೆ.

ದಂಡ ಮೊತ್ತವನ್ನು ಏ. 19ರ ನಂತರ ನಾಲ್ಕು ವಾರದೊಳಗಾಗಿ ಪಾವತಿಸಬೇಕು ಎಂದು ಸೂಚನೆ ನೀಡಲಾಗಿದೆ.