ಕೊಹ್ಲಿಗೆ 'ಖೇಲ್ ರತ್ನ', ದ್ರಾವಿಡ್‌ಗೆ 'ದ್ರೋಣಾಚಾರ್ಯ' ಪ್ರಶಸ್ತಿ ಶಿಫಾರಸು

ಹೊಸದಿಲ್ಲಿ: ಭಾರತೀಯ ಕ್ರಿಕೆಟ್ ತಂಡದ ನಾಯಕ ವಿರಾಟ್ ಕೊಹ್ಲಿ ಅವರಿಗೆ 'ರಾಜೀವ್ ಗಾಂಧಿ ಖೇಲ್ ರತ್ನ' ಮತ್ತು ಭಾರತೀಯ ಅಂಡರ್-19 ಹಾಗೂ 'ಎ' ತಂಡದ ಕೋಚ್ ರಾಹುಲ್ ದ್ರಾವಿಡ್ ಅವರಿಗೆ 'ದ್ರೋಣಾಚಾರ್ಯ' ಪ್ರಶಸ್ತಿಗಳಿಗೆ ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ ಶಿಫಾರಸು ಮಾಡಿದೆ.

ಅದೇ ಹೊತ್ತಿಗೆ ಮಾಜಿ ಕ್ರಿಕೆಟ್ ದಿಗ್ಗಜ ಸುನಿಲ್ ಗವಾಸ್ಕರ್ ಅವರಿಗೆ 'ಧ್ಯಾನ್ ಚಂದ್ ಜೀವಮಾನ ಸಾಧನೆ ಪ್ರಶಸ್ತಿ'ಗೆ ಶಿಫಾರಸು ಮಾಡಲಾಗಿದೆ.

ನಿಮ್ಮ ಮಾಹಿತಿಗಾಗಿ, ರಾಜೀವ್ ಗಾಂಧಿ ಖೇಲ್ ರತ್ನ, ದೇಶದ ಅತ್ಯುನ್ನತ ಕ್ರೀಡಾ ಪ್ರಶಸ್ತಿಯಾಗಿದೆ. ಹಾಗೆಯೇ ಕ್ರೀಡೆಯಲ್ಲಿ ಅತ್ಯುತ್ತಮ ತರಬೇತುದಾರರಿಗೆ ದ್ರೋಣಾಚಾರ್ಯ ಪ್ರಶಸ್ತಿ ನೀಡಿ ಗೌರವಿಸಲಾಗುತ್ತದೆ.

ಕೇಂದ್ರ ಸರಕಾರಕ್ಕೆ ದ್ರೋಣಚಾರ್ಯ ಪ್ರಶಸ್ತಿಗಾಗಿ ದ್ರಾವಿಡ್ ಸೇರಿದಂತೆ ಇತರ ಆಟಗಾರರ ನಾಮ ನಿರ್ದೇಶನವನ್ನು ಕಳಹಿಸಲಾಗಿದೆ ಎಂದು ಕ್ರಿಕೆಟ್ ಆಡಳಿತ ಮಂಡಳಿಯ (CoA) ಮುಖ್ಯಸ್ಥ ವಿನೋದ್ ರಾಯ್, ಖಚಿತಪಡಿಸಿದ್ದಾರೆ.

ದ್ರಾವಿಡ್ ಮಾರ್ಗದರ್ಶನದಲ್ಲಿ ಭಾರತೀಯ ಅಂಡರ್-19 ತಂಡವು 2018 ವರ್ಷಾರಂಭದಲ್ಲಿ ನಡೆದ ಐಸಿಸಿ ಕಿರಿಯರ ವಿಶ್ವಕಪ್ ಎತ್ತಿ ಹಿಡಿದಿತ್ತು. ಇನ್ನು 2016ನೇ ಆವೃತ್ತಿಯಲ್ಲೂ ರನ್ನರ್ ಅಪ್ ಪ್ರಶಸ್ತಿ ಗೆದ್ದಿತ್ತು.