ಭಾರತದ ಕೋಚ್‌ ಆಗುವರೇ ದ್ರಾವಿಡ್‌ ?

ಮುಂಬಯಿ: ಬ್ಯಾಟಿಂಗ್ ಲೆಜೆಂಡ್‌ ರಾಹುಲ್‌ ದ್ರಾವಿಡ್‌ ಭಾರತ ಕ್ರಿಕೆಟ್‌ ತಂಡದ ಮುಖ್ಯ ಕೋಚ್‌ ಆಗಬೇಕು ಎಂಬುದು ಬಿಸಿಸಿಐ ಇಂಗಿತವಾಗಿದ್ದು, ಈ ವಿಚಾರವಾಗಿ ಮಾಜಿ ಕ್ರಿಕೆಟಿಗಿನ ಪ್ರತಿಕ್ರಿಯೆ ಎದುರುನೋಡುತ್ತಿದೆ.

ಅಂಡರ್‌ 19 ಹಾಗೂ ಹಿರಿಯರ ತಂಡದ ಮುಖ್ಯ ಕೋಚ್‌ ಆಗುವಂತೆ ದ್ರಾವಿಡ್ ಅವರನ್ನು ಕೋರಲಾಗಿದೆ. ಈ ವಿಚಾರದಲ್ಲಿ ಅವರಿಗೆ ಆಸಕ್ತಿ ಇದೆಯೇ ಎಂದು ತಿಳಿದುಕೊಳ್ಳಲು ಸಚಿನ್‌ ತೆಂಡಲ್ಕೂರ್‌, ಸೌರವ್‌ ಗಂಗೂಲಿ, ವಿವಿಎಸ್‌ ಲಕ್ಷ್ಮಣ್‌ ಅವರನ್ನೊಳಗೊಂಡ ಭಾರತೀಯ ಕ್ರಿಕೆಟ್‌ ಮಂಡಳಿಯ ಸಲಹಾ ಸಮಿತಿ ವಿಚಾರಣೆ ನಡೆಸಿದೆ.

ಮುಂಬರುವ ದಿನಗಳಲ್ಲಿ ಈ ಪ್ರಸ್ತಾವನೆ ಮುಂದಿಟ್ಟರೆ ದ್ರಾವಿಡ್‌ ಒಪ್ಪಿಕೊಳ್ಳುವರಾ ಎಂದು ಕಾದು ನೋಡಬೇಕಿದೆ. ಸದ್ಯ ಡೆಲ್ಲಿ ಡೇರ್‌ ಡೆವಿಲ್ಸ್‌ ಐಪಿಎಲ್‌ ತಂಡದ ಮೆಂಟರ್‌ ಆಗಿರುವ ರಾಹುಲ್, 'ಈ ಬಗ್ಗೆ ಆಲೋಚಿಸುವೆ,' ಎಂದಿದ್ದಾರೆ ಎಂದು ಮೂಲಗಳು ತಿಳಿಸಿವೆ.

ಭಾರತದ ತಂಡದ ನಿರ್ದೇಶಕರಾಗಿ ಮಾಜಿ ಕ್ರಿಕೆಟಿಗ ರವಿ ಶಾಸ್ತ್ರಿ ಅವರ ಅವಧಿ ವರ್ಲ್ಡ್‌ಟಿ20ಯೊಂದಿಗೆ ಮುಕ್ತಾಯಗೊಂಡಿದೆ. ಹುದ್ದೆಯಲ್ಲಿ ಮುಂದುವರಿಯಲು ರವಿ ಶಾಸ್ತ್ರಿಗೆ ಆಸಕ್ತಿ ಇದ್ದರೂ, ಅವರನ್ನು ಮುಖ್ಯ ಕೋಚ್‌ ಸ್ಥಾನಕ್ಕೆ ಪರಿಗಣಿಸುವ ಸಾಧ್ಯತೆ ಇಲ್ಲ ಎಂದು ಉನ್ನತ ಮೂಲಗಳು ತಿಳಿಸಿವೆ.

ಮುಖ್ಯ ಕೋಚ್‌ ಆಯ್ಕೆ ವಿಚಾರವಾಗಿ ಸಲಹಾ ಸಮಿತಿ ಮಂಗಳವಾರ ಸಭೆ ಸೇರಿ ಮಾತುಕತೆ ನಡೆಸಲಿದೆ. ಈ ಮೊದಲು ಮಂಡಳಿ, ಆಸ್ಟ್ರೇಲಿಯಾದ ಮಾಜಿ ಬ್ಯಾಟ್ಸ್‌ಮನ್‌ ಮೈಕೆಲ್‌ ಹಸ್ಸಿ ಅವರನ್ನು ಮುಖ್ಯ ಕೋಚ್‌ ಸ್ಥಾನಕ್ಕೆ ಪರಿಗಣಿಸಿತ್ತು. ಆದರೆ, ಯೋಜನೆ ಕೈಗೂಡಲಿಲ್ಲ.