ಮೊದಲ ಸೆಮಿಫೈನಲ್‌ | ಭರತ್‌, ಸ್ಟಾಲಿನ್‌ ಅರ್ಧಶತಕ | ಟೈಗರ್ಸ್‌ಗೆ 153 ರನ್‌ಗಳ ಗುರಿ
ವಿಜೇತ್‌ ಕುಮಾರ್‌ ಡಿ.ಎನ್‌
ಹುಬ್ಬಳ್ಳಿ: ಸ್ಫೋಟಕ ಆರಂಭದ ಬಳಿಕ ಬ್ಯಾಟಿಂಗ್‌ ವೈಫಲ್ಯ ಅನುಭವಿಸಿದರೂ ಬೆಳಗಾವಿ ಪ್ಯಾಂಥರ್ಸ್‌ ತಂಡ, ಕರ್ನಾಟಕ ಪ್ರೀಮಿಯರ್‌ ಲೀಗ್‌ನ 6ನೇ ಆವೃತ್ತಿಯ ಮೊದಲ ಸೆಮಿಫೈನಲ್‌ ಪಂದ್ಯದಲ್ಲಿ ಹುಬ್ಬಳ್ಳಿ ಟೈಗರ್ಸ್‌ ಎದುರು 152 ರನ್‌ಗಳ ಸವಾಲಿನ ಮೊತ್ತ ದಾಖಲಿಸಿತು.
ಇಲ್ಲಿನ ರಾಜನಗರ ಕೆಎಸ್‌ಸಿಎ ಕ್ರೀಡಾಂಗಣದಲ್ಲಿ ಬುಧವಾರ ನಡೆದ ಟೂರ್ನಿಯ ಮೊದಲ ಸೆಮಿಫೈನಲ್‌ ಪಂದ್ಯದಲ್ಲಿ ಟಾಸ್‌ ಸೋತು ಮೊದಲು ಬ್ಯಾಟ್‌ ಮಾಡಿದ ಬೆಳಗಾವಿ ಪ್ಯಾಂಥರ್ಸ್‌, ತನ್ನ ಪಾಲಿನ 20 ಓವರ್‌ಗಳಲ್ಲಿ 6 ವಿಕೆಟ್‌ಗೆ 152 ರನ್‌ಗಳನ್ನು ದಾಖಲಿಸಿತು. ಇನಿಂಗ್ಸ್‌ ಅಂತ್ಯದಲ್ಲಿ ಉತ್ತಮ ಬೌಲಿಂಗ್‌ ದಾಳಿ ಸಂಘಟಿಸಿದ ಟೈಗರ್ಸ್‌, ಪ್ಯಾಂಥರ್ಸ್‌ನ ಬೃಹತ್‌ ಮೊತ್ತದ ಕನಸನ್ನು ಭಗ್ನಗೊಳಿಸಿತು.
ಬಳಿಕ ಗುರಿ ಬೆನ್ನತ್ತಿದ ಹುಬ್ಬಳ್ಳಿ ಟೈಗರ್ಸ್‌ ತಂಡ, ಪತ್ರಿಕೆ ಮುದ್ರಣಕ್ಕೆ ಹೋಗುವ ಹೊತ್ತಿಗೆ * ಓವರ್‌ಗಳಲ್ಲಿ * ವಿಕೆಟ್‌ಗೆ * ರನ್‌ಗಳನ್ನು ಗಳಿಸಿತ್ತು.
ಸ್ಟಾಲಿನ್‌ ಸ್ಫೋಟಕ ಬ್ಯಾಟಿಂಗ್‌
ಸೆಮಿಫೈನಲ್‌ ಪ್ರವೇಶಿಸುವ ದಿಟ್ಟ ನಿರ್ಧಾರದೊಂದಿಗೆ ಬ್ಯಾಟಿಂಗ್‌ ಆರಂಭಿಸಿದ ಬೆಳಗಾವಿ ಪ್ಯಾಂಥರ್ಸ್‌ ಭರ್ಜರಿ ಆರಂಭ ಪಡೆಯಿತು. ಆರಂಭಿಕರಾಗಿ ಕಣಕ್ಕಿಳಿದ ಆಲ್‌ರೌಂಡರ್‌ ಸ್ಟಾಲಿನ್‌ ಹೂವರ್‌, ಟೈಗರ್ಸ್‌ ಬೌಲರ್‌ಗಳ ಬೆವರಿಳಿಸಿದರು. ಹೂವರ್‌ ಮತ್ತೊಬ್ಬ ಆರಂಭಿಕ ಬ್ಯಾಟ್ಸ್‌ಮನ್‌ ಕೆ.ಎನ್‌ ಭರತ್‌ ಜತೆಗೂಡಿ ಮೊದಲ ವಿಕೆಟ್‌ಗೆ 70 ಎಸೆತಗಳಲ್ಲಿ 94 ರನ್‌ಗಳ ಭರ್ಜರಿ ಜತೆಯಾಟ ನಡೆಸಿದರು. 42 ಎಸೆತಗಳಲ್ಲಿ 11 ಬೌಂಡರಿ ಹಾಗೂ 1 ಭರ್ಜರಿಯ ಸಿಕ್ಸರ್‌ ಸಹಿತ 67 ರನ್‌ಗಳನ್ನು ಸಿಡಿಸಿದ ಸ್ಟಾಲಿನ್‌, ವಿನಯ್‌ ಕುಮಾರ್‌ ಬೌಲಿಂಗ್‌ನಲ್ಲಿ ದೊಡ್ಡ ಹೊಡೆತಕ್ಕೆ ಮುಂದಾಗಿ ಸಿದ್ಧಾರ್ಥ್‌ಗೆ ಕ್ಯಾಚ್‌ ನೀಡುವ ಮೂಲಕ ಹೊರ ನಡೆದರು.
ಭರತ್‌ ಭರ್ಜರಿ ಅರ್ಧಶತಕ
ಸ್ಟಾಲಿನ್‌ ಹೂವರ್‌ ವಿಕೆಟ್‌ ಪತನದ ಬಳಿಕ ಪ್ಯಾಂಥರ್ಸ್‌ಗೆ ಬೃಹತ್‌ ಮೊತ್ತ ತಂದುಕೊಡುವ ಜವಾಬ್ದಾರಿ ಹೊತ್ತ ಕ.ಎನ್‌ ಭರತ್‌, 43 ಎಸೆತಗಳಲ್ಲಿ ಅರ್ಧಶತಕ ದಾಖಲಿಸಿದರು. ಎರಡನೇ ವಿಕೆಟ್‌ಗೆ ಅನುಭವಿ ಆಟಗಾರ ಸ್ಟುವರ್ಟ್‌ ಬಿನ್ನಿ(13) ಜತೆಗೂಡಿ 36 ಎಸೆತಗಳಲ್ಲಿ 48 ರನ್‌ಗಳ ಜತೆಯಾಟ ನಡೆಸಿದರು. 54 ಎಸೆತಗಳಲ್ಲಿ 3 ಬೌಂಡರಿ ಮತ್ತು 2 ಸಿಕ್ಸರ್‌ಗಳ ಸಹಿತ 62 ನರ್‌ಗಳನ್ನು ಗಳಿಸಿದ ಭರತ್‌ ರನ್‌ಔಟ್‌ ಆಗುವ ಮೂಲಕ ಪೆವಿಲಿಯನ್‌ ಸೇರಿದರು. ಹುಬ್ಬಳ್ಳಿ ಟೈಗರ್ಸ್‌ ಪರ ಕ್ರಾಂತಿ ಕುಮಾರ್‌ 4 ಓವರ್‌ಗಳಲ್ಲಿ 24ಕ್ಕೆ 2 ವಿಕೆಟ್‌ ಪಡೆದು ಯಶಸ್ವಿ ಬೌಲರ್‌ ಎನಿಸಿದರು.