ತೃತೀಯ ಟೆಸ್ಟ್; ಬೆನ್ ಸ್ಟೋಕ್ಸ್ ಕಮ್‌ಬ್ಯಾಕ್

ಲಂಡನ್: ಭಾರತ ವಿರುದ್ಧ ಬರ್ಮಿಂಗ್‌ನಲ್ಲಿ ನಡೆದ ಮೊದಲ ಟೆಸ್ಟ್ ಪಂದ್ಯದಲ್ಲಿ ನಾಯಕ ವಿರಾಟ್ ಕೊಹ್ಲಿ ನಿರ್ಣಾಯಕ ವಿಕೆಟ್ ಪಡೆಯುವ ಮೂಲಕ ಆತಿಥೇಯ ಇಂಗ್ಲೆಂಡ್ ಗೆಲುವಿನಲ್ಲಿ ನಿರ್ಣಾಯಕ ಪಾತ್ರ ವಹಿಸಿರುವ ಆಲ್‌ರೌಂಡರ್ ಬೆನ್ ಸ್ಟೋಕ್ಸ್ ಇದೀಗ ಮೂರನೇ ಟೆಸ್ಟ್ ಪಂದ್ಯಕ್ಕಾಗಿ ಕಮ್‌ಬ್ಯಾಕ್ ಮಾಡಿಕೊಂಡಿದ್ದಾರೆ.

ಕಳೆದ ವರ್ಷ ಬ್ರಿಸ್ಟಾಲ್ ಪಬ್‌ನಲ್ಲಿ ಪಾನಮತ್ತರಾಗಿ ಬಳಿಕ ಬೀದಿ ಜಗಳ ಮಾಡಿರುವುದಕ್ಕೆ ಸಂಬಂಧ ಕೋರ್ಟ್ ವಿಚಾರಣೆಯಲ್ಲಿ ಎದುರಿಸುತ್ತಿರುವ ಸ್ಟೋಕ್ಸ್ ಲಾರ್ಡ್ಸ್ ಮೈದಾನದಲ್ಲಿ ನಡೆದ ಎರಡನೇ ಟೆಸ್ಟ್ ಪಂದ್ಯ ಮಿಸ್ ಮಾಡಿಕೊಂಡಿದ್ದರು.

ಸ್ಟೋಕ್ಸ್ ಬದಲಿಗೆ ತಂಡದಲ್ಲಿ ಕಾಣಿಸಿಕೊಂಡಿದ್ದ ಕ್ರಿಸ್ ವೋಕ್ಸ್ ಚೊಚ್ಚಲ ಟೆಸ್ಟ್ ಶತಕ ಬಾರಿಸಿದ್ದರಲ್ಲದೆ ಇನ್ನಿಂಗ್ಸ್ ಹಾಗೂ 159 ರನ್ ಗೆಲುವಿನಲ್ಲಿ ಮಹತ್ವದ ಪಾತ್ರ ವಹಿಸಿದ್ದರು.

ಬರ್ಮಿಂಗ್‌ಹ್ಯಾಮ್‌ನಲ್ಲಿ ನಡೆದ ಮೊದಲ ಟೆಸ್ಟ್ ಪಂದ್ಯದಲ್ಲೂ ಇಂಗ್ಲೆಂಡ್ 31 ರನ್ ಅಂತರದ ರೋಚಕ ಗೆಲುವು ದಾಖಲಿಸಿತ್ತು. ಈ ಮೂಲಕ 2-0 ಅಂತರದ ಮುನ್ನಡೆ ದಾಖಲಿಸಿದೆ.

ನ್ಯಾಟಿಂಗ್‌ಹ್ಯಾಮ್‌ನಲ್ಲಿ ನಡೆಯಲಿರುವ ಮೂರನೇ ಟೆಸ್ಟ್ ಪಂದ್ಯ ಆಗಸ್ಟ್ 18 ಶನಿವಾರದಂದು ನಡೆಯಲಿದೆ. ಸ್ಟೋಕ್ಸ್ ಹೊರತಾಗಿ ತಂಡದಲ್ಲಿ ಇತರೆ ಯಾವ ಬದಲಾವಣೆಗಳನ್ನು ತರಲಾಗಿಲ್ಲ.

ಇಂಗ್ಲೆಂಡ್ ತಂಡ ಇಂತಿದೆ: ಜೋ ರೂಟ್ (ನಾಯಕ), ಆಲಿಸ್ಟಾರ್ ಕುಕ್, ಕೇಟನ್ ಜೆನಿಂಗ್ಸ್, ಒಲಿವರ್ ಪಾಪ್, ಜಾನಿ ಬೈರ್‌ಸ್ಟೋವ್, ಜೋಸ್ ಬಟ್ಲರ್, ಸ್ಯಾಮ್ ಕರ್ರನ್, ಕ್ರಿಸ್ ವೋಕ್ಸ್, ಆದಿಲ್ ರಶೀದ್, ಜೇಮ್ಸ್ ಆಂಡ್ರೆಸನ್, ಸ್ಟುವರ್ಟ್ ಬ್ರಾಡ್, ಮೊಯಿನ್ ಅಲಿ, ಜೆಮಿ ಪೋರ್ಟರ್ ಮತ್ತು ಬೆನ್ ಸ್ಟೋಕ್ಸ್.