ಟೆಸ್ಟ್-ಏಕದಿನ-ಟಿ20ನಲ್ಲಿ ಭುವಿ 5 ವಿಕೆಟ್‌ಗಳ ಸಾಧನೆ

ಜೋಹಾನ್ಸ್‌ಬರ್ಗ್: ಕ್ರಿಕೆಟ್‌ನ ಎಲ್ಲ ಮೂರು ಪ್ರಕಾರಗಳಾದ ಟೆಸ್ಟ್, ಏಕದಿನ ಹಾಗೂ ಟ್ವೆಂಟಿ-20 ಕ್ರಿಕೆಟ್‌ನಲ್ಲಿ ಐದು ವಿಕೆಟುಗಳನ್ನು ಪಡೆದ ಭಾರತದ ಮೊತ್ತ ಮೊದಲ ಬೌಲರ್ ಎಂಬ ಕೀರ್ತಿಗೆ ಬಲಗೈ ವೇಗಿ ಭುವನೇಶ್ವರ್ ಕುಮಾರ್ ಪಾತ್ರವಾಗಿದ್ದಾರೆ.

ದಕ್ಷಿಣ ಆಫ್ರಿಕಾ ವಿರುದ್ಧ ನಡೆದ ಮೊದಲ ಟ್ವೆಂಟಿ-20 ಪಂದ್ಯದಲ್ಲಿ ಭಾರತದ ಗೆಲುವಿನಲ್ಲಿ ನಿರ್ಣಾಯಕ ಪಾತ್ರ ವಹಿಸಿರುವ ಭುವಿ 24 ರನ್ ತೆತ್ತು ಐದು ವಿಕೆಟುಗಳನ್ನು ಕಬಳಿಸಿದ್ದರು.

ಭುವಿ ಇದುವರೆಗೆ ಟೆಸ್ಟ್ ಕ್ರಿಕೆಟ್‌ನಲ್ಲಿ ನಾಲ್ಕು ಮತ್ತು ಏಕದಿನ ಹಾಗೂ ಟ್ವೆಂಟಿ-20ನಲ್ಲಿ ತಲಾ ಒಂದು ಬಾರಿ ಐದು ವಿಕೆಟುಗಳ ಸಾಧನೆಯನ್ನು ಮಾಡಿದ್ದಾರೆ.

ಹಾಗೆಯೇ ಯಜುವೇಂದ್ರ ಚಹಲ್ (25/6) ಬಳಿಕ ಟ್ವೆಂಟಿ-20ನಲ್ಲಿ ಐದು ವಿಕೆಟುಗಳನ್ನು ಪಡೆದಿರುವ ಎರಡನೇ ಭಾರತೀಯ ಬೌಲರ್ ಎನಿಸಿಕೊಂಡಿದ್ದಾರೆ.

ಮ್ಯಾಜಿಕ್ ಸ್ಪೆಲ್...
ಮೊದಲ ಸ್ಪೆಲ್‌ನಲ್ಲಿ ಓಪನರ್ ಜಾನ್ ಸ್ಮಟ್ಸ್ ಹಾಗೂ ನಾಯಕ ಜೆಪಿ ಡ್ಯುಮಿನಿ ಹೊರದಬ್ಬಿದ ಭುವಿ ತಮ್ಮ ಕೊನೆಯ ಸ್ಪೆಲ್‌ನಲ್ಲಿ ಮತ್ತಷ್ಟು ಅಪಾಯಕಾರಿಯಾಗಿ ಮೂಡಿಬಂದರು.

ಬಳಿಕ 18ನೇ ಓವರ್‌ನಲ್ಲಿ ತಮ್ಮ ಕೊನೆಯ ಓವರ್ ಎಸೆದ ಭುವಿ ಒಂದೇ ಓವರ್‌ನಲ್ಲಿ ಅಪಾಯಕಾರಿ ರೀಜ ಹೆಂಡ್ರಿಕ್ಸ್, ಹೆನ್ರಿಕ್ ಕ್ಲಾಸೆನ್ ಹಾಗೂ ಕ್ರಿಸ್ ಮೊರಿಸ್ ಅವರನ್ನು ಹೊರದಬ್ಬಿದ್ದರು.

ಅದೇ ಓವರ್‌ನಲ್ಲಿ ಡೇನ್‌ ಪ್ಯಾಟರ್ಸನ್‌ ಸಹ ರನೌಟ್‌ಗೆ ಒಳಗಾಗಿದ್ದರು. ಈ ಮೂಲಕ ಟೀಮ್ ಇಂಡಿಯಾ ಹ್ಯಾಟ್ರಿಕ್ ಸಾಧನೆಯನ್ನು ಮಾಡಿತ್ತು.