ಬ್ಯುಸಿನೆಸ್ ಕ್ಲಾಸ್‌‌ನಲ್ಲಿ ಹಾರಲಿರುವ ಟೀಮ್ ಇಂಡಿಯಾ

ಹೊಸದಿಲ್ಲಿ: ಇನ್ನು ಮುಂದೆ ಭಾರತೀಯ ಕ್ರಿಕೆಟ್ ತಂಡದ ಆಟಗಾರರಿಗೆ ವಿಮಾನದಲ್ಲಿ ಅಭಿಮಾನಿಗಳ ಕಾಟ ಇರಲಾರದು. ಯಾಕೆಂದರೆ ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿಯು (ಬಿಸಿಸಿಐ) ಟೀಮ್ ಇಂಡಿಯಾದ ವಿಮಾನ ಯಾತ್ರೆಯನ್ನು ಅಪ್‌ಗ್ರೇಡ್ ಮಾಡಲಿದೆ.

ಎಕಾನಮಿ ಕ್ಲಾಸ್‌ನಿಂದ ಬ್ಯುಸಿನೆಸ್ ಕ್ಲಾಸ್ ಪ್ರಯಾಣಕ್ಕೆ ಅನುವು ಮಾಡಿಕೊಡಲಾಗುವುದು. ಈ ಮೂಲಕ ಆಟಗಾರರ ಖಾಸಗಿತನವನ್ನು ಕಾಪಾಡಿಕೊಳ್ಳಲಾಗುವುದು.

ಎಕಾನಮಿ ಕ್ಲಾಸ್‌ನಲ್ಲಿ ಸಂಚರಿಸುವಾಗ ಉಂಟಾಗುವ ತೊಂದರೆಗಳ ಬಗ್ಗೆ ನಾಯಕ ವಿರಾಟ್ ಕೋಹ್ಲಿ ಸೇರಿದಂತೆ ಟೀಮ್ ಇಂಡಿಯಾ ಆಟಗಾರರು ಮಂಡಳಿಯನ್ನು ಮನದಟ್ಟು ಮಾಡಿಕೊಂಡಿದ್ದರು.

ದೇಶೀಯ ವಿಮಾನದಲ್ಲಿ ಎಕಾನಮಿ ಕ್ಲಾಸ್‌ನಲ್ಲಿ ಪ್ರಯಾಣಿಸುವಾಗ ಅಭಿಮಾನಿಗಳೆಲ್ಲ ಸುತ್ತುವರೆದು ಸೆಲ್ಫಿ ತೆಗೆದುಕೊಳ್ಳಲು ಬಯಸುತ್ತಾರೆ. ಅಲ್ಲದೆ ಆಟಗಾರರ ಸುರಕ್ಷತೆಯನ್ನು ಸಹ ಪ್ರಯಾಣಿಕರು ಉಲ್ಲಂಘಿಸುತ್ತಾರೆ ಎಂಬುದರ ಬಗ್ಗೆ ಆಪಾದನೆಯುಂಟಾಗಿತ್ತು.

ಇನ್ನು ಎಕಾನಮಿ ಕ್ಲಾಸ್‌ನಲ್ಲಿ ಉದ್ದನೆಯ ಕ್ರಿಕೆಟಿಗರಾದ ಹಾರ್ದಿಕ್ ಪಾಂಡ್ಯ, ಕೆಎಲ್ ರಾಹುಲ್, ಮೊಹಮ್ಮದ್ ಶಮಿ ಮತ್ತು ಇಶಾಂತ್ ಶರ್ಮಾ ಅವರಂತಹ ಆಟಗಾರರು ಲೆಗ್ ರೂಂ ಸಮಸ್ಯೆಯನ್ನು ಎದುರಿಸುತ್ತಿದ್ದರು.