'ಅಳು ಮಗು'; ಸ್ಮಿತ್‌ಗೆ ಜರೆದ ಬ್ರಿಟಿಷ್ ಮಾಧ್ಯಮ

ಹೊಸದಿಲ್ಲಿ: ಬಾಲ್ ಟ್ಯಾಂಪರಿಂಗ್ ಮೋಸದಾಟದಲ್ಲಿ ಸಿಕ್ಕಿ ಹಾಕಿಕೊಂಡು ಒಂದು ವರ್ಷದ ನಿಷೇಧ ಶಿಕ್ಷೆಗೆ ಗುರಿಯಾಗಿರುವ ಆಸ್ಟ್ರೇಲಿಯಾ ಮಾಜಿ ನಾಯಕ ಸ್ಟೀವ್ ಸ್ಮಿತ್ ತವರೂರಿಗೆ ಮರಳಿದ ಬಳಿಕ ನಡೆಸಿದ ಸುದ್ದಿಗೋಷ್ಠಿಯಲ್ಲಿ ಬಿಕ್ಕಿ ಬಿಕ್ಕಿ ಅತ್ತಿದ್ದರು.

ಈ ಸಂಬಂಧ ಸ್ಮಿತ್ ಅವರನ್ನು 'ಕ್ಯಾಪ್ಟನ್ ಕ್ರೈ ಬೇಬಿ' (ಅಳುವ ಮಗು) ಎಂದು ಬ್ರಿಟಿಷ್ ಮಾಧ್ಯಮಗಳು ಜರೆದಿದೆ.


ದಕ್ಷಿಣ ಆಫ್ರಿಕಾ ವಿರುದ್ಧ ಕೇಪ್ ಟೌನ್‌ನಲ್ಲಿ ನಡೆದ ಮೂರನೇ ಟೆಸ್ಟ್ ಪಂದ್ಯದಲ್ಲಿ ಬಾಲ್ ಟ್ಯಾಂಪರಿಂಗ್ ಷಡ್ಯಂತ್ರ ರೂಪಿಸಲಾಗಿತ್ತು. ಇದರಂತೆ ಆಟಗಾರ ಕ್ಯಾಮರಾನ್ ಬೆನ್‌ಕ್ರಾಫ್ಟ್ ರೆಡ್ ಹ್ಯಾಂಡ್ ಆಗಿ ಕ್ಯಾಮೆರಾ ಕಣ್ಣುಗಳಿಗೆ ಸಿಕ್ಕಿ ಬಿದ್ದಿದ್ದರು.

ಬಳಿಕ ನಾಯಕ ಸ್ಮಿತ್ ತಪ್ಪೊಪ್ಪಿಕೊಂಡಿದ್ದರು. ಇದರಂತೆ ಕಠಿಣ ಕ್ರಮ ಕೈಗೊಂಡಿರುವ ಕ್ರಿಕೆಟ್ ಆಸ್ಟ್ರೇಲಿಯಾ, ನಾಯಕ ಸ್ಮಿತ್ ಹಾಗೂ ಉಪನಾಯಕ ಮೇಲೆ ಒಂದು ವರ್ಷ ಹಾಗೂ ಬೆನ್‌ಕ್ರಾಫ್ಟ್‌ಗೆ ಒಂಬತ್ತು ತಿಂಗಳುಗಳ ನಿಷೇಧವನ್ನು ಹೇರಿತ್ತು.

ಬ್ರಿಟಿಷ್ ಪ್ರಮುಖ ಪತ್ರಿಕೆ ಆಗಿರುವ ಡೈಲಿ ಮೈಲ್ 'ಅಳು ಮಗು' ಎಂದು ಉಲ್ಲೇಖಿಸಿದರೆ ಡೈಲಿ ಸ್ಟಾರ್ ಪತ್ರಿಕೆಯು 'ಆಸೀಸ್ ಮೋಸಗಾರರು ಅಳುವ ಅವಮಾನ' ಎಂದಿದೆ. ಹಾಗೆಯೇ ಡೈಲಿ ಎಕ್ಸ್‌ಪ್ರೆಸ್ 'ಒಡೆದು ಹೋದ' ಮತ್ತು ಇಂಡಿಪೆಂಡೆಂನ್ಸ್ 'ಕಣ್ಣೀರು, ಸುಳ್ಳುವ ಮತ್ತು ವಿದಾಯ' ಎಂದಿದೆ.