ಇನ್ನು ಮುಂದೆ ಸ್ಲೋ ಓವರ್ ರೇಟ್‌ಗಾಗಿ ಕ್ಯಾಪ್ಟನ್‌ಗೆ ಅಮಾನತು ಶಿಕ್ಷೆಯಿಲ್ಲ!

ಹೊಸದಿಲ್ಲಿ: ಅಂತಾರಾಷ್ಟ್ರೀಯ ಕ್ರಿಕೆಟ್ ಮಂಡಳಿ (ಐಸಿಸಿ) ತನ್ನ ನಿಯಮಗಳಲ್ಲಿ ಗಮನಾರ್ಹ ಬದಲಾವಣೆಗಳನ್ನು ತರಲಾಗಿದ್ದು, ಇನ್ನು ಮುಂದೆ ನಿಧಾನಗತಿಯ ಓವರ್ ರೇಟ್‌ಗಾಗಿ ನಿರ್ದಿಷ್ಟ ತಂಡದ ನಾಯಕನ ಮೇಲೆ ಅಮಾನತು ಶಿಕ್ಷೆಯನ್ನು ಹೇರಲಾಗುವುದಿಲ್ಲ.

ಐಸಿಸಿ ಕ್ರಿಕೆಟ್ ಸಮಿತಿ ಶಿಫಾರಸಿನ ಮೆರೆಗೆ ಹಳೆಯ ನಿಮಯಗಳಲ್ಲಿ ಬದಲಾವಣೆ ತರಲಾಗಿದೆ. ನೂತನ ನಿಯಮವು ಮುಂಬರುವ ಆ್ಯಶಸ್ ಹಾಗೂ ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್ ವೇಳೆಗೆ ಜಾರಿಗೆ ಬರಲಿದೆ.

ಇನ್ನು ಮುಂದೆ ಸ್ಲೋ ಓವರ್ ರೇಟ್ ಉಲ್ಲಂಘನೆಗಾಗಿ ನಾಯಕರುಗಳನ್ನು ಅಮಾನತುಗೊಳಿಸಲಾಗುವುದಿಲ್ಲ ಎಂದು ಐಸಿಸಿ ಪ್ರಕಟಣೆಯಲ್ಲಿ ತಿಳಿಸಿದೆ.

ನಿಧಾನಗತಿಯ ಓವರ್ ರೇಟ್‌ಗಾಗಿ ಎಲ್ಲಾ ಆಟಗಾರರು ಸಹ ಸಮಾನ ಹೊಣೆಗಾರರಾಗಿದ್ದು, ನಾಯಕನಂತೆಯೇ ಸಮಾನ ದಂಡವನ್ನು ವಿಧಿಸಲಾಗುವುದು.

ವಿಶ್ವ ಟೆಸ್ಟ್ ಚಾಂಪಿಯನ‌್‌ಶಿಪ್ ಪಂದ್ಯಗಳ ಕೊನೆಯಲ್ಲಿ ನಿಗದಿತ ಓವರ್ ರೇಟ್‌ಗಿಂತಲೂ ಹಿಂದಿರುವ ತಂಡಗಳಿಗೆ ಪ್ರತಿ ಓವರ್‌ಗೆ ಎರಡು ಕಾಂಪಿಟೇಷನ್ ಅಂಕಗಳನ್ನು ಕಡಿತಗೊಳಿಸಲಾಗುವುದು ಎಂಬುದನ್ನು ಐಸಿಸಿ ಸ್ಪಷ್ಟಪಡಿಸಿದೆ.