ದ್ವಿತೀಯ ಟೆಸ್ಟ್‌: ವೆಸ್ಟ್‌ಇಂಡೀಸ್‌ ದಿಟ್ಟ ಹೋರಾಟ, ಪಂದ್ಯ ಡ್ರಾ

ಕಿಂಗ್‌ಸ್ಟನ್‌: ಭಾರತದ ವಿರುದ್ಧ ಎರಡನೇ ಟೆಸ್ಟ್‌ನ ಅಂತಿಮ ದಿನ ದಿಟ್ಟ ಹೋರಾಟ ಪ್ರದರ್ಶಿಸಿದ ವೆಸ್ಟ್‌ ಇಂಡೀಸ್‌ ಪಂದ್ಯ ಡ್ರಾ ಮಾಡಿಕೊಳ್ಳುವಲ್ಲಿ ಯಶಸ್ವಿಯಾಗಿದೆ.

ಬಲಗೈ ಬ್ಯಾಟ್ಸ್‌ಮನ್‌ ಚೇಸ್‌ (137*) ರನ್‌ಗಳೊಂದಿಗೆ ಮಿಂಚಿದರೆ, ಬ್ಲ್ಯಾಕ್‌ವುಡ್‌ (63), ಡೌರಿಚ್‌ (74) ಹಾಗೂ ಹೋಲ್ಡರ್‌ (64) ಉತ್ತಮ ಮೊತ್ತ ಕಲೆ ಹಾಕುವುದರೊಂದಿಗೆ ವೆಸ್ಟ್‌ ಇಂಡೀಸ್‌ ತಂಡವನ್ನು ಸೋಲಿನಿಂದ ಪಾರು ಮಾಡಿದ್ದಾರೆ.

ಇನ್ನಿಂಗ್ಸ್‌ ಸೋಲಿನಿಂದ ಪಾರಾಗಲು 304 ರನ್‌ಗಳ ಗುರಿಯೊಂದಿಗೆ ಮಂಗಳವಾರ ಎರಡನೇ ಇನ್ನಿಂಗ್ಸ್‌ ಆರಂಭಿಸಿದ ವೆಸ್ಟ್‌ ಇಂಡೀಸ್‌ ಮಳೆಯಿಂದಾಗಿ ದಿನದ ಆಟ ಅಂತ್ಯಗೊಂಡಾಗ 48 ರನ್‌ಗಳಿಗೆ 4 ವಿಕೆಟ್‌ಗಳನ್ನು ಕಳದುಕೊಂಡು ಆತಂಕಕ್ಕೆ ಸಿಲುಕಿತ್ತು.

ಬುಧವಾರ ಬ್ಯಾಟಿಂಗ್‌ ಮುಂದುವರಿಸಿದ ವೆಸ್ಟ್‌ ಇಂಡೀಸ್‌ ನಿಧಾನಗತಿಯಲ್ಲಿ ರನ್‌ ಗಳಿಸುತ್ತಾ ವಿಕೆಟ್‌ ಕಾಯ್ದುಕೊಳ್ಳಲು ಪ್ರಯತ್ನಿಸಿತು. ಆದರೆ, ತಂಡ 141 ರನ್‌ ಗಳಿಸುತ್ತಿದ್ದಂತೆ ಬ್ಲ್ಯಾಕ್‌ವುಡ್‌ ಆರ್‌. ಅಶ್ವಿನ್‌ಗೆ ವಿಕೆಟ್‌ ಒಪ್ಪಿಪಿಸಿದ್ದರು.

ನಂತರ ಶುರುವಾಗಿದ್ದು ಚೇಸ್‌ ಮತ್ತು ಡೌರಿಚ್‌ ಅವರ ಅದ್ಭುತ ಆಟ. 6ನೇ ವಿಕೆಟ್‌ಗೆ 144ರನ್‌ಗಳನ್ನು ಕೆಲಹಾಕಿದ ಈ ಜೋಡಿ ತಂಡ 285ರನ್‌ ಗಳಿಸುತ್ತಿದ್ದಂತೆ ಬೇರ್ಪಟ್ಟಿತ್ತು. 74 ರನ್‌ ಗಳಿಸಿದ ಡೌರಿಚ್‌, ಮಿಶ್ರಾ ಬೌಲಿಂಗ್‌ನಲ್ಲಿ ಎಲ್‌ಬಿಡಬ್ಲ್ಯು ಬಲೆಗೆ ಬಿದ್ದರು. ನಂತರ ಬಂದ ಹೋಲ್ಡರ್‌ (64*) ಜತೆ ಇನ್ನಿಂಗ್ಸ್‌ ಮುಂದುವರಿಸಿದ ಚೇಸ್‌ ತಂಡವನ್ನು ಅಪಾಯದಿಂದ ಪಾರುಮಾಡಿದರು.

ಪಂದ್ಯ ಮುಕ್ತಾಯಗೊಂಡಾಗ ವೆಸ್ಟ್‌ಇಂಡೀಸ್‌ 6 ವಿಕೆಟ್ ಕಳೆದುಕೊಂಡು ಪಂದ್ಯ ಡ್ರಾ ಮಾಡಿಕೊಂಡಿತು. ಭಾರತದ ಪರ ಮೊಹಮ್ಮದ್‌ ಶಮಿ, ಅಮಿತ್‌ ಮಿಶ್ರಾ ತಲಾ 2 ವಿಕೆಟ್ ಹಾಗೂ ಇಶಾಂತ್‌ ಶರ್ಮ, ಆರ್‌. ಅಶ್ವಿನ್‌ ತಲಾ ಒಂದು ವಿಕೆಟ್‌ ಪಡದುಕೊಂಡಿದ್ದರು.

ಸಂಕ್ಷಿಪ್ತ ಸ್ಕೋರ್‌: ಮೊದಲ ಇನ್ನಿಂಗ್ಸ್‌ ವೆಸ್ಟ್‌ಇಂಡೀಸ್‌ 196ಕ್ಕೆ ಆಲ್‌ ಔಟ್‌ ಹಾಗೂ 388/6 (ಚೇಸ್‌137*, ಡೌರಿಚ್‌ 74). ಭಾರತ 500/9 ಡಿಕ್ಲೇರ್‌.