ಜಾಲಾವಾಡ್‌ ರಾಯಲ್ಸ್‌ ತಂಡದಲ್ಲಿ ಪೂಜಾರ

ರಾಜ್‌ಕೋಟ್‌: ಭಾರತ ಟೆಸ್ಟ್‌ ತಂಡದ ಪ್ರಮುಖ ಸದಸ್ಯ ಚೇತೇಶ್ವರ ಪೂಜಾರ ಚೊಚ್ಚಲ ಸೌರಾಷ್ಟ್ರ ಪ್ರೀಮಿಯರ್‌ ಲೀಗ್‌ ಟಿ20 ಟೂರ್ನಿಯಲ್ಲಿ ಜಾಲಾವಾಡ್‌ ರಾಯಲ್ಸ್‌ ತಂಡದ ಪರ ಆಡಲಿದ್ದಾರೆ ಎಂದು ಗುರುವಾರ ಸೌರಾಷ್ಟ್ರ ಕ್ರಿಕೆಟ್‌ ಸಂಸ್ಥೆಯ ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.

ಪೂಜಾರ ಮೊದಲು ಕುಚ್‌ ವಾರಿಯರ್ಸ್‌ ಪರ ಆಡಲಿದ್ದಾರೆ ಎಂದು ಸುದ್ದಿಯಾಗಿತ್ತು. ಆದರೆ, ಆ ತಂಡದಲ್ಲಿ ಜಯದೇವ್‌ ಉನಾದ್ಕಟ್‌ ಇರುವುದರಿಂದ ಪೂಜಾರರನ್ನು ಬಿಟ್ಟುಕೊಡಲು ವಾರಿಯರ್ಸ್‌ ತೀರ್ಮಾನಿಸಿತ್ತು.

ಹೀಗಾಗಿ ಸ್ಪರ್ಧೆಯಲ್ಲಿರುವ ಇತರ ನಾಲ್ಕು ತಂಡಗಳಾದ ಗೊಹಿಲ್‌ವಾಡ್‌ ಗ್ಲೇಡಿಯೇಟರ್ಸ್‌, ಸೊರಾತ್‌ ಲಯನ್ಸ್‌, ಹಲಾರ್‌ ಹೀರೋಸ್‌ ಮತ್ತು ಜಾಲಾವಾಡ್‌ ರಾಯಲ್ಸ್‌ ತಂಡಗಳ ಪರ ಚೀಟಿ ಎತ್ತಲು ತಿಳಿಸಲಾಯಿತು.

ಪೂಜಾರ ಜಾಲಾವಾಡ್‌ ರಾಯಲ್ಸ್‌ ಚೀಟಿ ಎತ್ತಿದರು ಎಂದು ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.