ಟಿ-20ನಲ್ಲಿ ಮುನ್ರೊ ದ್ವಿತೀಯ ಶತಕ ಸಾಧನೆ

ರಾಜ್‌ಕೋಟ್: ನ್ಯೂಜಿಲೆಂಡ್‌ನ ಸ್ಫೋಟಕ ಎಡಗೈ ಆರಂಭಿಕ ಬ್ಯಾಟ್ಸ್‌ಮನ್ ಕಾಲಿನ್ ಮುನ್ರೊ, ಟ್ವೆಂಟಿ-20 ಅಂತರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ದ್ವಿತೀಯ ಶತಕ ಸಾಧನೆ ಮಾಡಿದ್ದಾರೆ.

ರಾಜ್‌ಕೋಟ್‌ನಲ್ಲಿ ಭಾರತದ ವಿರುದ್ಧ ಸಾಗುತ್ತಿರುವ ದ್ವಿತೀಯ ಟಿ-20 ಪಂದ್ಯದಲ್ಲಿ ಮುನ್ರೊ ಅಮೋಘ ಶತಕ ಬಾರಿಸಿದರು.

ಆರಂಭದಿಂದಲೇ ಭಾರತೀಯ ಬೌಲರ್‌ಗಳನ್ನು ದಂಡಿಸುತ್ತಾ ಸಾಗಿದ ಮುನ್ರೊ 26 ಎಸೆತಗಳಲ್ಲಿ ಅರ್ಧಶತಕ ಮತ್ತು 54 ಬಾಲ್‌ಗಳಲ್ಲಿ ಶತಕ ಸಾಧನೆ ಮಾಡಿದರು.

ಮುನ್ರೊ ಇನ್ನಿಂಗ್ಸ್‌ ಎಷ್ಟು ಭಯಾನಕ ಎನಿಸಿಕೊಂಡಿತ್ತೆಂದರೆ ತಲಾ ಏಳು ಸಿಕ್ಸರ್ ಮತ್ತು ಬೌಂಡರಿಗಳು ಸೇರಿದ್ದವು.

ಕ್ಯಾಚ್ ಮತ್ತು ರನೌಟ್ ಜೀವದಾನಗಳ ಸ್ಪಷ್ಟ ಲಾಭ ಪಡೆದ 30ರ ಹರೆಯದ ಮುನ್ರೊ ಭಾರತ ನೆಲದಲ್ಲಿ ಅಮೋಘ ಸಾಧನೆ ಬರೆದರು.