ಕಾಂಪ್ಲಿಮೆಂಟರಿ ಪಾಸ್‌ ವಿವಾದ : 2 ಮತ್ತು 4ನೇ ಪಂದ್ಯ ಸ್ಥಳಾಂತರ?

ಹೊಸದಿಲ್ಲಿ: ಕಾಂಪ್ಲಿಮೆಂಟರಿ ಪಾಸ್‌ ವಿಷಯದಲ್ಲಿ ಬಿಸಿಸಿಐನ ಹೊಸ ನೀತಿ ಇದೀಗ ಆತಿಥೇಯ ಕ್ರಿಕೆಟ್‌ ಸಂಸ್ಥೆಗಳಿಗೆ ಮಾರಕವಾಗಿ ಪರಿಣಮಿಸಿದ್ದು, ಪಂದ್ಯಗಳನ್ನು ಆಯೋಜಿಸುವುದಕ್ಕೇ ಮೀನಮೇಷ ಎಣಿಸುವಂಥ ಪರಿಸ್ಥಿತಿ ನಿರ್ಮಾಣವಾಗಿದೆ.

ಕಡಿಮೆ ಪ್ರಮಾಣದಲ್ಲಿ ಕಾಂಪ್ಲಿಮೆಂಟರಿ ಪಾಸ್‌ ಸಿಗಲಿರುವ ಹಿನ್ನೆಲೆಯಲ್ಲಿ ಪಂದ್ಯ ಆಯೋಜಿಸಲು ಸಾಧ್ಯವಿಲ್ಲ ಎಂಬ ತೀರ್ಮಾನಕ್ಕೆ ಮಧ್ಯ ಪ್ರದೇಶ ಕ್ರಿಕೆಟ್‌ ಸಂಸ್ಥೆ ಬಂದಿರುವುದರಿಂದ ಆತಿಥೇಯ ಭಾರತ ಮತ್ತು ವೆಸ್ಟ್‌ ಇಂಡೀಸ್‌ ನಡುವಣ 2ನೇ ಏಕದಿನ ಪಂದ್ಯ ಇಂದೋರ್‌ನಿಂದ ವಿಶಾಖಪಟ್ಟಣಕ್ಕೆ ಸ್ಥಳಾಂತರಗೊಂಡಿದೆ. ಈ ಬಗ್ಗೆ ಬುಧವಾರ ಬಿಸಿಸಿಐ ಅಧಿಕೃತ ಪ್ರಕಟಣೆ ಹೊರಡಿಸಿಯೂ ಆಗಿದೆ.

''ಭಾರತ ಮತ್ತು ವಿಂಡೀಸ್‌ ನಡುವಣ 2ನೇ ಪೇಟಿಎಂ ಏಕದಿನ ಪಂದ್ಯವನ್ನು ವಿಶಾಖಪಟ್ಟಣದ ವೈ.ಎಸ್‌.ರಾಜಶೇಖರ ರೆಡ್ಡಿ ಎಸಿಎ-ವಿಡಿಸಿಎ ಕ್ರಿಕೆಟ್‌ ಕ್ರೀಡಾಂಗಣದಲ್ಲಿ ಆಡಿಸಲಾಗುವುದು,'' ಎಂದು ಬಿಸಿಸಿಐ ಪ್ರಕಟಣೆಯಲ್ಲಿ ತಿಳಿಸಲಾಗಿದೆ. ಪಂದ್ಯ ಅಕ್ಟೋಬರ್‌ 24ರಂದು ನಡೆಯಲಿದೆ.

ಬಿಸಿಸಿಐ ಹೊಸ ಸಂವಿಧಾನ ಏನು ಹೇಳುತ್ತದೆ?

ಮಂಡಳಿಯ ಹೊಸ ಸಂವಿಧಾನದ ಪ್ರಕಾರ, ಕ್ರೀಡಾಂಗಣದ ಒಟ್ಟು ಆಸನ ಸಾಮರ್ಥ್ಯ‌ದಲ್ಲಿ ಶೇ.90ರಷ್ಟು ಆಸನಗಳನ್ನು (ಟಿಕೆಟ್‌ಗಳು) ಮಾರಾಟ ಮಾಡಬೇಕು. ಉಳಿದ ಶೇ.10 ಟಿಕೆಟ್‌ಗಳನ್ನಷ್ಟೇ ಆಯಾ ಕ್ರಿಕೆಟ್‌ ಸಂಸ್ಥೆಗಳು ಕಾಂಪ್ಲಿಮೆಂಟರಿ ನೀಡಬಹುದು. ಆದರೆ, ಇದು ತೀರಾ ಕಡಿಮೆ ಎನ್ನುತ್ತಿವೆ ಕ್ರಿಕೆಟ್‌ ಸಂಸ್ಥೆಗಳು.

ಎಂಸಿಎನಿಂದಲೂ ಇದೇ ತೀರ್ಮಾನ?

ಕಾಂಪ್ಲಿಮೆಂಟರಿ ಟಿಕೆಟ್‌ ವಿಷಯದಲ್ಲಿ ಬಿಸಿಸಿಐನ ಹೊಸ ನಿಯಮದ ವಿರುದ್ಧ ಮುಂಬಯಿ ಕ್ರಿಕೆಟ್‌ ಸಂಸ್ಥೆ (ಎಂಸಿಎ) ಕೂಡ ತಿರುಗಿಬೀಳುವ ಸಾಧ್ಯತೆಗಳು ದಟ್ಟವಾಗಿವೆ. ಸದ್ಯಕ್ಕೆ ಕಾದು ನೋಡುವ ತಂತ್ರಕ್ಕೆ ಮೊರೆ ಹೋಗಿರುವುದಾಗಿ ಸಂಸ್ಥೆ ತಿಳಿಸಿದೆ. ''ವಾಂಖೆಡೆ ಸ್ಟೇಡಿಯಮ್‌ನ ಆಸನ ಸಾಮರ್ಥ್ಯ‌ 33,000. ಹೊಸ ನಿಯಮದ ಪ್ರಕಾರ, ಎಂಸಿಎಗೆ 3,300 ಕಾಂಪ್ಲಿಮೆಂಟರಿ ಪಾಸ್‌ಗಳಷ್ಟೇ ಸಿಗುತ್ತವೆ. ಅದರಲ್ಲಿ ಶೇ.5ರಷ್ಟು ಟಿಕೆಟ್‌ಗಳನ್ನು ಬಿಸಿಸಿಐಗೆ ನೀಡಬೇಕಿದೆ,'' ಎಂದು ಹೆಸರು ಹೇಳಲಿಚ್ಛಿಸದ ಹಿರಿಯ ಎಂಸಿಎ ಅಧಿಕಾರಿಯೊಬ್ಬರು ಬುಧವಾರ ತಿಳಿಸಿದ್ದಾರೆ. ಎಂಸಿಎ ಕೂಡ ಮಧ್ಯ ಪ್ರದೇಶ ಕ್ರಿಕೆಟ್‌ ಸಂಸ್ಥೆಯ ಹಾದಿ ಹಿಡಿದಲ್ಲಿ ಅಕ್ಟೋಬರ್‌ 29ರಂದು ವಾಂಖೆಡೆಯಲ್ಲಿ ನಡೆಯಬೇಕಿರುವ 4ನೇ ಏಕದಿನ ಪಂದ್ಯ ಕೂಡ ಬೇರೆಡೆಗೆ ಸ್ಥಳಾಂತರಗೊಳ್ಳಲಿದೆ.