ಅಪ್ಪುಗೆಯೊಂದಿಗೆ ಸ್ಮಿತ್, ವಾರ್ನರ್ ಬರಮಾಡಿಕೊಂಡ ಆಸೀಸ್

ದುಬೈ: ಬಾಲ್ ಟ್ಯಾಂಪರಿಂಗ್ ಪ್ರಕರಣದಲ್ಲಿ ಒಂದು ವರ್ಷದ ನಿಷೇಧ ಶಿಕ್ಷೆಯನ್ನು ಎದುರಿಸಿರುವ ಸ್ಟೀವ್ ಸ್ಮಿತ್ ಹಾಗೂ ಡೇವಿಡ್ ವಾರ್ನರ್‌ನ್ನು ಕ್ರಿಕೆಟ್ ಆಸ್ಟ್ರೇಲಿಯಾ ತಂಡದ ಆಟಗಾರರು ಅಪ್ಪುಗೆಯ ಮೂಲಕ ಬರಮಾಡಿಕೊಂಡಿದ್ದಾರೆ.

ದುಬೈಯಲ್ಲಿ ಪಾಕಿಸ್ತಾನ ವಿರುದ್ಧ ನಡೆಯಲಿರುವ ಏಕದಿನ ಸರಣಿಗೂ ಮುನ್ನ ಆಸೀಸ್ ಆಟಗಾರರ ಜತೆ ವಾರ್ನರ್ ಹಾಗೂ ಸ್ಮಿತ್ ಬೆರೆತುಕೊಂಡಿದ್ದಾರೆ.

ಪಾಕ್ ವಿರುದ್ಧ ಅಂತಿಮ ಎರಡು ಏಕದಿನ ಪಂದ್ಯಗಳಿಗೆ ಲಭ್ಯವಿದ್ದರೂ ಮುಂಬರುವ ಏಕದಿನ ವಿಶ್ವಕಪ್ ಗುರಿಯಾಗಿರಿಸಿಕೊಂಡು ಆಯ್ಕೆಗೆ ಪರಿಗಣಿಸಲಾಗಿಲ್ಲ. ಹಾಗಾಗಿ ವಾರ್ನರ್ ಹಾಗೂ ಸ್ಮಿತ್ ಐಪಿಎಲ್‌ನಲ್ಲಿ ಆಡಲು ಲಭ್ಯವಿರಲಿದ್ದಾರೆ.

ಈ ಬಗ್ಗೆ ಪ್ರತಿಕ್ರಿಯಿಸಿರುವ ವಾರ್ನರ್ ಹಾಗೂ ಸ್ಮಿತ್, ತಾವೆಂದೂ ತಂಡವನ್ನು ಬಿಟ್ಟು ಹೋದಂತೆ ಭಾಸವಾಗುತ್ತಿರಲಿಲ್ಲ. ತಂಡದೆಲ್ಲ ಆಟಗಾರರು ಅಪ್ಪುಗೆಯ ಮೂಲಕ ಸ್ವಾಗತಿಸಿದ್ದಾರೆ ಎಂದರು.

ಭಾರತ ನೆಲದಲ್ಲಿ ಐತಿಹಾಸಿಕ ಏಕದಿನ ಸರಣಿ ಗೆಲುವು ದಾಖಲಿಸಿರುವ ಆಸೀಸ್ ತಂಡವೀಗ ಹೊಸ ಹುರುಪಿನಲ್ಲಿದೆ. ಅಲ್ಲದೆ ನಮ್ಮನ್ನು ಎರಡು ಕೈಗಳಿಂದ ಬರಮಾಡಿಕೊಂಡಿದ್ದಾರೆ ಎಂದಿದ್ದಾರೆ.

ಇನ್ನೊಂದೆಡೆ ಗಾಯದಿಂದ ಪುನಶ್ಚೇತನದ ಹಾದಿಯಲ್ಲಿರುವ ಸ್ಮಿತ್, ಮಗದೊಮ್ಮೆ ಮೈದಾನಕ್ಕಿಳಿಯಲು ಕಾತರದಿಂದಿರುವುದಾಗಿ ತಿಳಿಸಿದರು.