India vs Australia: ಆಸೀಸ್‌ಗೆ 183 ರನ್‌ಗಳ ಬೃಹತ್ ಮುನ್ನಡೆ

ಸಿಡ್ನಿ: ಭಾರತ ವಿರುದ್ಧ ನಡೆಯುತ್ತಿರುವ ಅಭ್ಯಾಸ ಪಂದ್ಯದಲ್ಲಿ ಕ್ರಿಕೆಟ್ ಆಸ್ಟ್ರೇಲಿಯಾ ಇಲೆವೆನ್ ತಂಡವು ಮೊದಲ ಇನ್ನಿಂಗ್ಸ್‌ನಲ್ಲಿ 183 ರನ್‌ಗಳ ಬೃಹತ್ ಮುನ್ನಡೆ ದಾಖಲಿಸಿದೆ.

ಭಾರತದ 358 ರನ್‌ಗಳಿಗೆ ಉತ್ತರವಾಗಿ ಅಂತಿಮ ದಿನದಾಟ ಮುಂದುವರಿಸಿದ ಆಸೀಸ್, 151.1 ಓವರ್‌ಗಳಲ್ಲಿ 544 ರನ್‌ಗಳಿಗೆ ತನ್ನೆಲ್ಲ ವಿಕೆಟುಗಳನ್ನು ಕಳೆದುಕೊಂಡಿತು.

ಅಮೋಘ ಇನ್ನಿಂಗ್ಸ್ ಕಟ್ಟಿದ ವಿಕೆಟ್ ಕೀಪರ್ ಹ್ಯಾರಿ ನೀಲ್ಸನ್ ಶತಕ ಸಾಧನೆ ಮಾಡಿದರು. ಇವರಿಗೆ ಉತ್ತಮ ಬೆಂಬಲ ನೀಡಿದ ಆ್ಯರೋನ್ ಹಾರ್ಡಿ 86 ರನ್ ಗಳಿಸಿ ಸ್ವಲ್ಪದರಲ್ಲೇ ಶತಕ ಮಿಸ್ ಮಾಡಿಕೊಂಡರು. ಈ ಮೊದಲು ಬೌಲಿಂಗ್‌ನಲ್ಲೂ ಭಾರತವನ್ನು ಕಾಡಿದ ಹಾರ್ಡಿ ನಾಲ್ಕು ವಿಕೆಟುಗಳನ್ನು ಕಬಳಿಸಿದ್ದರು.

ಇನ್ನುಳಿದಂತೆ ಕೆಳ ಕ್ರಮಾಂಕದಲ್ಲಿ ಡ್ಯಾನಿಯಲ್ ಫಾಲಿನ್ಸ್ (43), ಲ್ಯೂಕ್ ರಾಬಿನ್ಸ್ (38) ಹಾಗೂ ಜಾಕ್ಸನ್ ಕೋಲ್‌ಮ್ಯಾನ್ (36) ಉಪಯುಕ್ತ ಇನ್ನಿಂಗ್ಸ್ ಕಟ್ಟಿದ್ದರು. ಅಲ್ಲದೆ ಕೊನೆಯ ವಿಕೆಟ್‌ಗೆ 57 ರನ್ ಪೇರಿಸಿದ್ದರು.

ಭಾರತದ ಪರ ಮೊಹಮ್ಮದ್ ಶಮಿ ಮೂರು, ಆರ್. ಅಶ್ವಿನ್ ಎರಡು ಹಾಗೂ ನಾಯಕ ವಿರಾಟ್ ಕೊಹ್ಲಿ, ಉಮೇಶ್ ಯಾದವ್ ಹಾಗೂ ಜಸ್ಪ್ರೀತ್ ಬುಮ್ರಾ ತಲಾ ಒಂದು ವಿಕೆಟನ್ನು ಹಂಚಿಕೊಂಡರು.