ಸಚಿನ್‌, ಧೋನಿಗೆ ಕಮ್ಮಿಯೇನಲ್ಲ ಸುರೇಶ್ ರೈನಾ

ಹೊಸದಿಲ್ಲಿ: ಪ್ರಸಕ್ತ ಸಾಗುತ್ತಿರುವ ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) ಟ್ವೆಂಟಿ-20 ಚಾಂಪಿಯನ್‌ಶಿಪ್‌ನಲ್ಲಿ ಗುಜರಾತ್ ಲಯನ್ಸ್ ಕೆಟ್ಟ ಪ್ರದರ್ಶನವನ್ನು ನೀಡಿರಬಹುದು. ಆದರೆ ಉತ್ತಮ ಕ್ರೀಡಾಸ್ಪೂರ್ತಿಯನ್ನು ಮೆರೆದಿರುವ ನಾಯಕ ಸುರೇಶ್ ರೈನಾ ಗಮನ ಸೆಳೆದಿದ್ದಾರೆ.

ಎದುರಾಳಿ ತಂಡದ ಆಟಗಾರನಾಗಿರುವ ಹೊರತಾಗಿಯೂ ಆಟಗಾರರ ಸಾಧನೆಯನ್ನು ಶ್ಲಾಘಿಸಲು ರೈನಾ ಎಂದೂ ಹಿಂಜರಿಯುತ್ತಿರಲಿಲ್ಲ. ತಮ್ಮ ನೋವಲ್ಲೂ ಇತರರನ್ನು ಹುರಿದುಂಬಿಸುವ ಈ ಸರಳ ಸ್ವಭಾವವು ರೈನಾ ಅವರಿಗೂ ಸಾಕಷ್ಟು ಅಭಿಮಾನಿ ಬಳಗವನ್ನು ಕಟ್ಟಿಕೊಳ್ಳಲು ನೆರವಾಗಿದೆ.

ಇದರೊಂದಿಗೆ ಸುರೇಶ್ ರೈನಾ ಕೂಡಾ ಜನಪ್ರಿಯತೆಯಲ್ಲಿ ಕ್ರಿಕಟ್ ದಂತಕಥೆ ಸಚಿನ್ ತೆಂಡೂಲ್ಕರ್ ಹಾಗೂ ಮಹೇಂದ್ರ ಸಿಂಗ್ ಧೋನಿ ಅವರಿಗೆ ಸಮಾನವಾಗಿ ಬೆಳೆದು ನಿಂತಿದ್ದಾರೆ.

ಈ ನಡುವೆ ಐಪಿಎಲ್ ಪಂದ್ಯದ ನಡುವೆ ಮೈದಾನಕ್ಕೆ ಓಡೋಡಿ ಬಂದ ರೈನಾ ಅಭಿಮಾನಿಯೋರ್ವ ಮಂಡಿಯೂರಿ ನಿಂತು ಆಟೋಗ್ರಾಫ್ ಕೇಳಿಕೊಂಡಿದ್ದಾರೆ. ಇದರಿಂದ ಸ್ವಲ್ಪ ಹೊತ್ತು ಪಂದ್ಯಕ್ಕೆ ಅಡಚಣೆಯಾಗಿತ್ತು. ಈ ಕೂಡಲೇ ಸ್ಪಂದಿಸಿದ ರೈನಾ ಅಭಿಮಾನಿಯಲ್ಲಿ ಮೈದಾನ ಬಿಟ್ಟು ಹೊರ ಹೋಗುವಂತೆ ವಿನಂತಿಸಿಕೊಂಡಿದ್ದರು.

ಐಪಿಎಲ್ 10ರ ಆವೃತ್ತಿಯಲ್ಲಿ ಆಡಿರುವ 13 ಪಂದ್ಯಗಳಲ್ಲಾಗಿ ರೈನಾ 440 ರನ್ ಬಾರಿಸಿದ್ದಾರೆ. ಈ ಮೂಲಕ ಐಪಿಎಲ್‌ ಇತಿಹಾಸದಲ್ಲಿ ಅತಿ ಹೆಚ್ಚು ರನ್ ಗಳಿಸಿದವರ ಬ್ಯಾಟ್ಸ್‌ಮನ್‌ಗಳ ಪೈಕಿ ಮೊದಲ ಸ್ಥಾನದಲ್ಲಿದ್ದಾರೆ.

ಇದೇ ಮೊದಲ ಬಾರಿಗೆ ಪ್ಲೇ-ಆಫ್ ಮುಖ ಕಾಣದೆ ರೈನಾ ಟೂರ್ನಿಯಿಂದ ಹೊರ ನಡೆಯುತ್ತಿದ್ದಾರೆ. ಐಪಿಎಲ್ ಮೊದಲ 8 ಆವೃತ್ತಿಗಳಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ಭಾಗವಾಗಿದ್ದ ರೈನಾ, ಕಳೆದ ವರ್ಷ ಗುಜರಾತ್ ಲಯನ್ಸ್ ತಂಡವನ್ನು ಮುನ್ನಡೆಸಿದ್ದರಲ್ಲದೆ ಪ್ಲೇ ಆಫ್ ಹಂತಕ್ಕೆ ಪ್ರವೇಶಿಸುವಲ್ಲಿ ಯಶಸ್ವಿಯಾಗಿದ್ದರು.