ಧೋನಿ ಮುಡಿಗೆ ಮತ್ತೊಂದು ಗರಿ

ಮುಂಬಯಿ: ಟೀಮ್‌ ಇಂಡಿಯಾದ ಮಾಜಿ ನಾಯಕ ಮಹೇಂದ್ರ ಸಿಂಗ್‌ ಧೋನಿ ಭಾರತದ ಪರ ಅತಿ ಹೆಚ್ಚು ಪಂದ್ಯಗಳನ್ನಾಡಿದ 2ನೇ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.

ಏಷ್ಯಾ ಕಪ್‌ ಕ್ರಿಕೆಟ್‌ ಟೂರ್ನಿಯಲ್ಲಿ ಭಾನುವಾರ ಪಾಕಿಸ್ತಾನ ವಿರುದ್ಧ ಕಣಕ್ಕಿಳಿದ ಧೋಣಿ ಭಾರತ ತಂಡದ ಪರ 505ನೇ (ಟೆಸ್ಟ್‌, ಏಕದಿನ ಮತ್ತು ಐ-ಟಿ20) ಅಂತಾರಾಷ್ಟ್ರೀಯ ಪಂದ್ಯವನ್ನಾಡಿದರು. 37 ವರ್ಷದ ಅನುಭವಿ ಆಟಗಾರ ಈ ಮೂಲಕ ಮಾಜಿ ನಾಯಕ ರಾಹುಲ್‌ ದ್ರಾವಿಡ್‌ (504) ಅವರನ್ನು ಹಿಂದಿಕ್ಕಿದ್ದಾರೆ. ಕೇವಲ ಮಾಸ್ಟರ್‌ ಬ್ಲಾಸ್ಟರ್‌ ಸಚಿನ್‌ ತೆಂಡೂಲ್ಕರ್‌ (664) ಮಾತ್ರವೇ ಈ ಪಟ್ಟಿಯಲ್ಲಿ ಧೋನಿಗಿಂತಲೂ ಮುಂದಿದ್ದಾರೆ.

ವೃತ್ತಿ ಜೀವನದ ಅಂತಿಮ ಹಂತ ತಲುಪಿರುವ ಧೋನಿ, ಗಾಡ್‌ ಆಫ್‌ ಕ್ರಿಕೆಟ್‌ ಖ್ಯಾತಿಯ ಸಚಿನ್‌ ತೆಂಡೂಲ್ಕರ್‌ ಅವರ ದಾಖಲೆ ಮುರಿಯುವುದು ಕಷ್ಟವಿದೆ. ಧೋನಿ, 2014ರಲ್ಲೇ ಟೆಸ್ಟ್‌ ಕ್ರಿಕೆಟ್‌ಗೆ ವಿದಾಯ ಹೇಳಿದ್ದು ಸೀಮಿತ ಓವರ್‌ಗಳ ಕ್ರಿಕೆಟ್‌ನಲ್ಲಷ್ಟೇ ಸ್ಪೆಷಲಿಸ್ಟ್‌ ವಿಕೆಟ್‌ಕೀಪರ್‌ ಬ್ಯಾಟ್ಸ್‌ಮನ್‌ ಆಗಿ ಮುಂದುವರಿದಿದ್ದಾರೆ.

ಪಾಕ್‌ ವಿರುದ್ಧ ಭಾರತದ ಪರ ವೃತ್ತಿ ಬದುಕಿನ 322ನೇ ಏಕದಿನ ಪಂದ್ಯವನ್ನಾಡಿದ ಧೋನಿ, 90 ಟೆಸ್ಟ್‌ ಪಂದ್ಯಗಳನ್ನೂ ಆಡಿದ್ದಾರೆ. ಇದಲ್ಲದೆ ಭಾರತದ ಪರ ಅತಿ ಹೆಚ್ಚು ಅಂತಾರಾಷ್ಟ್ರೀಯ ಟಿ20 ಪಂದ್ಯಗಳನ್ನು ಆಡಿದ ದಾಖಲೆ ಧೋನಿ ಹೆಸರಲ್ಲಿದ್ದು, ಚುಟುಕು ಕ್ರಿಕೆಟ್‌ನಲ್ಲಿ 93 ಬಾರಿ ಕಣಕ್ಕಿಳಿದಿದ್ದಾರೆ.